Ankho ‘Wii Ondyila’
GUY Hollis Pierce ankho umwe Pononkhalamutwe mbo Nombangi mba Jeova, wanyima Muvali 18 ya Tyitalale yo 2014, ankho una omanima 79. Mokonda o umwe ponondenge mba Kristu, watutilisua apewa ondyambi yae yokuenda keulu.—Hebreus 2:10-12; 1 Pedro 3:18.
Guy Pierce ankho watyitilua mepundaumbo litiwa Auburn, mo Califórnia, Estados Unidos, monthiki 6 ya Kuhuhu yo 1934, iya wambatisalua mo 1955. Avelinepe na Penny mo 1977, avakala novana. Tupu ankho o he yovanthu ovanyingi. Guy Pierce na Penny vahimbikile ovilinga vioukokoli-ndyila mo 1982. Vahimbika ovilinga viokutalelapo omawaneno mo 1986, iya avaundapa movilinga ovio mo Estados Unidos omanima 11.
Guy na Penny Pierce, vahimbika okuundapa mo Mbetele yoko Estados Unidos mo 1997. Omukuatate Pierce waundapele Moseketa Yovilinga, iya mo 1998 apewa otyilinga tyokukuatesako o Comissão do Pessoal Yononkhalamutwe mbo Nombangi mba Jeova. Monthiki 2 ya Kulindi yo 1999 meliongiyo lilingwa kese enima, kuapopiwa okuti omukuatate Guy Pierce waholovonwa opo akale umwe Pononkhalamutwe mbo Nombangi mba Jeova. Momanima okualamba, waundapele mono Komisau ombu: Comissão do Pessoal, Redação, Editora, nomo Comissão dos Coordenadores.
Omukuatate Pierce ankho uyola nawa novanthu. Ovanthu aveho ankho vahambukwa okukala nae. Mahi ankho ovanthu vemuhole mokonda una oluembia, nonthilo novitumino via Huku no nondonga mbae, ankho weliola omutima, nokuna ekolelo enene mu Jeova. Ovikando ovinyingi, Guy Pierce ankho upopia okuti ekumbi lipondola okuahatundu, mahi omilao via Jeova kavipondola okuhafuisuapo, iya ankho uhanda ovanthu mouye auho vetyinoñgonoke.
Omukuatate Pierce ankho uundapela Jeova nombili, ankho uhimbika okuundapa komuhuka iya pamwe utualako alo kounthiki. Walingile oungendi mouye auho opo apameke ovakuatate vae nonomphange, iya ankho apeho wovola omuvo opo akuateseko vana vesukisa okukuatesuako. Namphila omukuatate Pierce alingaile oungendi kohale, ovakuatate ankho nkhele vahinangela onkhalelo atambula nawa vakuavo, noupanga wae novanthu aveho, nonkhalelo ankho apameka ovakuatate vae nonomphange Novihonekwa.
Omukai wae, novana vae epandu, novatekula vae, no nomphokole, novakuavo akuatesileko okunoñgonoka otyili, maveivaluka unene omukuatate wetu Pierce, epanga lietu. Elongomona lialingilwe etyi omukuatate Pierce akapakwa, lialingililwe mo Mbetele yoko Brooklyn Motyasapalo, 22 ya Tyitalale yo 2014. Walingile elongomona olio, o Mark Sanderson, umwe Pononkhalamutwe mbo Nombangi mba Jeova. Wapopile konthele yekevelelo liomukuatate Pierce liokuenda keulu, iya atange onondaka mba Jesus mbati: “Meumbo lia Tate yange muna onondyuo ononyingi. . . . Inkha ndyenda andyimupongiyila omphangu, mandyiya vali okumupola amukala naame. Opo nonwe mukale apa ame ndyikahi. Iya ondyila yoku ndyenda onwe mwii.”—João 14:2-4.
Matuivaluka unene omukuatate Pierce. Mahi tuahambukwa mokonda ‘wii ondyila’ yokuenda ‘oku makakala’ apeho.