Oityi Tuesukisila Okuyovolwa

Tunde kohale, ovanthu vasoka kouwa utuka kokukalako apeho tyihakulupa, nekongoko likahi nawa. Mahi tyotyili, onthue tunkhia. Onondaka mba Jobe mbukahi pombanda, mbapopiuale kohale, mahi nkhele mbakolela unene hono.

Ehando liokukala-ko apeho enene, iya lili movanthu aveho. Ombimbiliya itupopila okuti Huku wapaka momitima vietu ehando liokukala-ko apeho, nokunoñgonoka omokonda yatyi. (Eclessiastes 3:11) Pahe soka, okuti tyaviuka Huku woluembia okupaka momitima vietu ehando liokukalako apeho, ngwe katupondola okukalako apeho? Inkha wakumbulula okuti au, wakumbulula nawa. Ondaka ya Huku ipopia okuti ononkhia ondyale, iya ilaa okuti “mambukanyimuako.”​—1 Coríntios 15:26.

Tyotyili, ononkhia ondyale. Petupu omunthu uhole ononkhia. Tyina apa tuli pomoneka otyipuka tyipondola okutuipaa, tuhondovoka-po liwa, tukaholama ine okuenda nkholo. Tyina tuavela, tuovola okuhakulwa opo tuveluke. Tulinga atyiho tuvila opo tulityilike ovipuka vipondola okutuipaa.

Okuti pena etyi tyitutavelesa okuti ondyale oyo onkhulu maiya okuhanyuako? Enga, pena. Jeova Huku, Omutungi, katungile ovanthu opo vakaleko vala omanima ehehi avankhi. Huku kahande ononkhia tunde ponthyimbi. Ankho uhanda ovanthu vakaleko apeho kombanda yohi, iya etyi ahanda apeho utyifuisapo.​—Isaías 55:11.

Ngotyo, oñgeni ononkhia mambukanyimuako? Mokueenda kuomanima, ovanthu vehole okulinga ononkhono opo vatetulule otyitateka tyononkhia, mahi kavetyivilile. Alo hono nkhele vatualako. Ovanongo vouye vekahi nokulinga ovihemba vio nombasina, novikuavo ovinyingi pala okutepulula omauvela amwe. Vaovola okunoñgonoka oñgeni ovipuka vina omuenyo viatungwa. Movilongo ovinyingi hono, ovanthu vakalako vali omuvo omunyingi tyipona motyita tyokualamba. Ovanthu kavetyivili okumanako ononkhia. Ombimbiliya yati, ovanthu “aveho vakondoka konthata.”​—Eclesiastes 3:20.

Kuna onondaka onongwa mbokuti, katupondola okuyumba onthumbi movanthu vehena epondolo liokutetulula otyitateka otyo otyikulu. Jeova Huku waovolale onkhalelo yokutuyovola kononkhia, iya omunthu wakolela meonganeko olio Jeova alinga, o Jesus Kristu.