Oityi Tulilongesila Ombimbiliya?

Okuti uhole okulilinga omapulo ngoo? Inkha uhole okulipula ngotyo, have vala. Ovanthu mouye auho velilinga omapulo akolela unene momuenyo. Okuti upondola okuvasa omakumbululo?

Ovanthu ovanyingi mouye auho vapondola okuti, “Enga!” Omokonda yatyi? Omokonda vavasa mo Mbimbiliya omakumbululo ahambukiswa omapulo avo. Okuti ove uhanda okunoñgonoka etyi Ombimbiliya ipopia? Hamwe uhanda okupola ouwa kokulongeswa Ombimbiliya otyali no Nombangi mba Jeova.a

Tyina ovanthu vamwe vapopilwa konthele yokulongeswa Ombimbiliya, vapopia okuti: “Ame ndyina ovilinga ovinyingi.” “Tyipuiya unene.” “Himetyivili-ale.” Mahi, ovakuavo vena olusoke luelikalela. Vetavela nehambu okulongeswa Ombimbiliya. Tala onongeleka mbumwe:

• “Naile mongeleya yo Katolika, no mo Protestante, no mo kapela ko Sique, no ko Budista, iya andyilongeswa konthele ya Huku mosikola onene. No ngotyo, omapulo ange konthele ya Huku ankho kaakumbululwa-le. Mahi, Ombangi imwe ya Jeova, eya peumbo liange. Andyihuvu nonkhalelo akumbulula omapulo ange no Mbimbiliya, andyitavela okulongeswa Ombimbiliya.”​—Gill, ko Inglaterra.

• “Ankho ndyina omapulo omanyingi konthele yomuenyo, mahi omalombe omo ngeleya kaamphele omakumbululo ankhululukisa. Mahi, Ombangi imwe ya Jeova akumbulula omapulo ange no Mbimbiliya. Etyi amphula inkha ndyihanda okulilongesa vali, andyitavela nehambu.”​—Koffi, ko Benin.

• “Ankho nahanda okunoñgonoka oñgeni ovanthu vakala tyina vamankhi. Ankho ndyitavela okuti vokuankhia vamonesa ononkhumbi vo kuna omuenyo. Mahi ankho nahanda okunoñgonoka etyi Ombimbiliya ipopia. Andyihimbika okulongeswa Ombimbiliya nepanga liange ankho Ombangi.”​—José, ko Brasil.

• “Nalingile ononkhono mbokutanga Ombimbiliya, mahi aneheinoñgonoka. Onthiki imwe, Onombangi mba Jeova aveya peumbo liange, avahangununa nawa omaulo Ombimbiliya. Andyikala nehando liokunoñgonoka vali ovipuka ovikuavo.”​—Dennize, ko México.

• “Ankho ndyilipula inkha Huku tyili-tyili wesuka umwe na ame. Ngotyo, onthiki imwe andyitokola okulikuambela ku Huku yo Mbimbiliya. Onthiki yalandulako, Onombangi mba Jeova avatotola pepito liange, iya andyitavela okulongeswa Ombimbiliya.”​—Anju, ko Nepal.

Onongeleka ombo, mbutuhinangelesa onondaka mba Jesus, watile: “Vena ehambu ovovana vaimbuka okuti vesukisa okulongeswa na Huku.” (Mat. 5:3) Ovanthu aveho, vatyitwa nehando liokunoñgonoka Huku. O Huku vala upondola okufuisapo ehando olio, iya utyilinga Nondaka yae Ombimbiliya.

Ngotyo, oñgeni Ombimbiliya ililongeswa? Oñgeni upondola okupola-ko ouwa? Tala omakumbululo omapulo oo monthele mailandulako.