OSAPI YO KONDYE | OVE KUHANDE OKULILONGESA OMBIMBILIYA?

Oñgeni Ovanthu Aveho Vapondola Okulilongesa Ombimbiliya

Onombangi mba Jeova veiwe nawa, mokonda yovilinga viavo viokuivisa. Mahi ove utyii okuti tupu tulongesa ovanthu Ombimbiliya mouye auho?

Mo 2014, Onombangi vehungi po 8.000.000, movilongo 240, kese ohanyi ankho valongesa Ombimbiliya ovanthu vehungi po 9.500.000.a Kuna ovilongo vituuka 140, vina ovanthu vehehi. Tyotyili, ovanthu tulongesa Ombimbiliya, ovanyingi vali tyipona ovanthu vakala mu kese tyilongo povilongo ovio!

Opo Onombangi mba Jeova vafuisepo ovilinga ovio, valinga ono Mbimbiliya ononyingi, nomikanda omikuavo kese enima, momalaka alamba po 700! Ononkhono ombo valinga, mbukuatesako ovanthu okulilongesa Ombimbiliya momalaka vahanda.

“Okulongeswa kosikola ankho hityihande, mahi okulongeswa Ombimbiliya otyiwa unene. Iya ovipuka nonoñgonoka viamphameka unene!”—Katlego, ko Africa do Sul.

“Okulilongesa Ombimbiliya tyakumbulula omapulo ange aeho, novipuka ovikuavo vali.”—Bertha, ko México.

“Ankho ndyilongesilwa Ombimbiliya peumbo liange, poola nahanda. Oityi vali ankho nahanda!”—Eziquiel, ko Brasil.

“Pamwe ankho ndyilongeswa o nominutu 15, pamwe o nominutu 30, iya pamwe ankho tulambesa-po, ankho tyitei vala kuame.”—Viniana, ko Austrália.

“Okulongeswa Ombimbiliya otyali vala, ankho tyihuvisa!”—Aimé, ko Benin.

“Wo kuandongesa Ombimbiliya, ankho wapua elundo, nokuna oluembia. Atukala omapanga omanene.”—Karen, ko Irlanda do Norte.

“Ovanthu ovanyingi valongeswa Ombimbiliya, mahi kavakala Onombangi.”—Denton, ko Inglaterra.

OMAKUMBULULO OMAPULO OVANTHU VEHOLE OKULINGA KONTHELE YOVILINGA VIETU VIOKULONGESA OVANTHU OMBIMBILIYA

Oñgeni tyililongeswa Ombimbiliya?

Tukoya onosapi mbelikalaila, atuovola ono versikulu mbo Mbimbiliya mbupopia konthele yo nosapi ombo. Mongeleka, Ombimbiliya ikumbulula omapulo ngaa: Huku olie? Huku ukahi ñgeni? Okuti una enyina? Huku ukala-pi? Okuti tupondola okukala noupanga nae? Ovanthu ovanyingi tyivepuiya okunoñgonoka opi mavavasi omakumbululo mo Mbimbiliya.

Pala okukuatesako ovanthu okuvasa omakumbululo, onthwe tuvelongesa nomukanda Oityi Ombimbiliya Tyili Ilongesa? una omafo 224.b Omukanda oo, haunene walingua opo ukuateseko ovanthu okunoñgonoka ovipuka viakolela vali Ombimbiliya ilongesa. Omukanda oo, una ovikapitulu vipopia konthele ya Huku, na Jesus Kristu, no nonkhumbi mbovanthu, netutilo, nelikuambelo, novipuka ovikuavo vali.

Onalupi omunthu apondola okulongeswa Ombimbiliya? Iya opi alongesilwa?

Upondola okulongeswa oola uhanda, pomphangu uhanda.

Ulongeswa omuvo ulifwe-pi?

Ovanthu ovanyingi valongeswa Ombimbiliya oola ike kese osimanu. Mahi tyitei komunthu ulongeswa. Onthue tutei koola omunthu akoya. Vamwe valongeswa vala onominutu 10 ine 15 mosimanu.

Tyifetelwa otyiñgapi?

Omikanda, nokulongeswa, otyali vala. Otyo, tyelikuata no nondonga Jesus avelele ovalongwa vae, etyi ati: “Muetyipewa otyali, nonwe tyavei otyali.”—Mateus 10:8.

Onalupi omunthu amana okulongeswa?

Ove upondola okutualako okulongeswa alo apa wahandela. Omukanda Oityi Ombimbiliya Tyili Ilongesa?, una ovikapitulu 19. Upondola okulongeswa kese kapitulu monkhalelo ikukuatesako okupola-ko esilivilo.

Okuti ndyina okukala Ombangi ya Jeova?

Au. Onthue tutyii okuti kese omunthu una okuholovona etyi metavela. Mahi, tyina omunthu amanoñgonoka ovipuka viakolela vali vio Mbimbiliya, oe muene uholovona.

Opi ndyipondola okuvasa vali enoñgonoko?

Upondola okulivasa mo site jw.org, ipopia vali nawa konthele yomatavelo Onombangi mba Jeova, novilinga viavo.

Oñgeni ndyipondola okuita opo ndyilongeswe Ombimbiliya?

Upondola okuitila mo Internete, mo site www.jw.org.
Tupu upondola okuhonekela Onombangi potyilongo popepi nove, pomanyina ekahi pefo lia vali liomukanda ou.
Opo uvase “Onombangi mba Jeova” popepi na apa ukala, upondola okuovola momukanda wo nonumelu mbo no telefone mbo potyilongo.

a Tulongesa Ombimbiliya omunthu wike-wike, ine otyikundyi otyitutu.

b Walingua no Nombangi mba Jeova. Kualingua-le onomiliau 230 mbomukanda oo momalaka alamba po 260.

OKULONGESWA OMBIMBILIYA TYIKUATESAKO ONOMBUNGA

“Etyi omukai wange ahimbika okulongeswa Ombimbiliya, andyiimbuka okuti ukahi nokulinga omapiluluko omanene. Onkhalelo yombunga yetu yakala vali nawa. Mokonda yolumbwe luokuhanda okunoñgonoka etyi omukai wange alongeswa, na ame andyihimbika okulongeswa Ombimbiliya. Etyi nalongeswa, tyamphilulula unene. Okulilongesa Ombimbiliya tyakuatesako Ombunga yange okulikuata okapandi.”—Eziquiel.

“Etyi nahimbika okunoñgonoka Ombimbiliya, andyiyekepo otyituwa tyokupuena epangwe, nokunwa unene, iya andyililongesa okutyilika onyengo yange. Pahe eumbo liange liasukuka, iya liapama. Ndyihole vali unene ombunga yange, nokulinga ovipuka vivehambukiswa. Nahambukwa unene.”—Karen.

“Ovanthu vamwe vamphopia omapita mokonda ndyililongesa Ombimbiliya. Mahi omulume wange unkhuatesako kuetyi natokola, oe uti: ‘Ame hesukile netyi ovanthu vapopia. Etyi nasuka natyo, omapiluluko omawa ukahi nokulinga. Tualako netyi ukahi nokulinga.’ Ombunga yetu kainekale ngetyi ikahi pehepano!”—Viniana.