“Onthyulilo”​—Oityi?

Tyina wiiva onondaka, “onthyulilo ili popepi!” oityi usoka? Usoka komunthu tyina ankhia? Ine usoka kohi maiyokwa ine maihanyua? Okusoka kovipuka ovio, tyipondola okusukalalesa ovanthu vamwe, ovakuavo vapondola okuhetavela ine okuyola.

Ombimbiliya ipopia okuti: “Onthyulilo maiya.” (Mateus 24:14) Onthyulilo tupu iihanwa okuti, “onthiki onene ya Huku,” o “Armagedon.” (Revelação [Apocalipse] 16:14, 16) Tyotyili, onongeleya mbulongesa ovipuka ovinyingi vielikalaila konthele yonthyulilo, vipuiya okunoñgonokwa. Mahi, etyi Ombimbiliya ipopia konthele yonthyulilo tyayandyuluka nawa. Ihololola etyi matyiya okuhanyuako, netyi matyisalako. Ondaka ya Huku, tupu itukuatesako okunoñgonoka nawa inkha onthyulilo ikahi popepi. Haunene, itulongesa oñgeni tupondola okuhupa! Ngotyo, tete matuovola okunoñgonoka nawa omalusoke amwe apenga, netyi omalusoke oo alekesa. Ngetyi Ombimbiliya ipopia, “onthyulilo” tyili-tyili oityi?

OITYI TYIHE-NTHYULILO

1. ONTHYULILO HEKUNDUNGALA-KO LIOTUPIA MALIYOKO OHI.

   Ombimbiliya yati: “[Huku] watunga ohi pomphangu yaviuka nawa. Kamaikapolwa pomphangu yayo apeho, apeho.” (Salmo 104:5) Otestu ei, no nonkhuavo vali, mbutukalesa nonthumbi yokuti Huku kamakahanya-ko ohi, nii kamayeke ohi ihanyue-ko!​—Eclesiastes 1:4; Isaías 45:18.

2. ONTHYULILO HATYIPUKA-KO MATYUHULULA VALA TYIHAPANGELWE.

   Ombimbiliya ilekesa nawa okuti​—Huku wanaka omuvo onthyulilo maiya. Yati: “Onthiki oyo ine oola, na wike wii, nii o noandyu keulu nii Omona, mahi, o Tate vala. Tualeiko tyalunguka, tualeiko tyipahi, mokonda omuvo wanakua kamuwii.” (Marcos 13:32, 33) Tyayandyuluka nawa okuti Huku (“Tate”), “wanaka omuvo” maeta onthyulilo.

3. ONTHYULILO KAMAYETWA-KO NOVANTHU INE O NOVIPUKA VITUNDA MEULU.

   Oityi matyieta onthyulilo? Revelação 19:11 yati: “Ame namona eulu liaikuka, nonkhambe ituela. Una wavelama-ko utiwa o Wekolelo no Wotyotyili.” Oversikulu 19 itualako okuti: “Namona enyama liohika, novatumini vo kombanda yohi nomafualali avo, mavakaongiyua opo valwise una wapumphama konkhambe nembamba liae.” (Revelação 19:11-21) Namphila ovipuka ovinyingi viapopiwa apa ovilekeso vala, mahi tupondola okunoñgonoka okuti: Huku makatuma onoandyu, opo mbukahanye-ko onondyale mbae.

ONTHYULILO OITYI

1. ONTHYULILO OKUHANYAKO OMAUTUMINI OVANTHU.

   Ombimbiliya yati: “Huku yo keulu makavialeka ouhamba [outumini] umwe uhakahanyua-ko nalumwe. Ouhamba oo kamaukapita pomavoko elongo ekuavo. Maukahanya-ko omautumini atyo aeho nokuenyima-ko. Iya ouhamba watyo oo, ngoo ukakala-ko apeho.” (Daniel 2:44) Ngetyi tyapopiwa pombanda, ponthele 3, “ovatumini vo kombanda yohi nomafualali avo, vana mavakaongiyua opo valwise una wapumphama konkhambe nembamba liae,” mavakahanyua-ko.​—Revelação 19:19.

2. ONTHYULILO OKUMANAKO OVILWA, NOUNGANGALA, NOVIVI.

   “[Huku] makamana-ko ovita alo kuna kuaoyela ohi.” (Salmo 46:9) “Ovaviuki vala mavakakala kombanda yohi, iya vana vahavelwa onombei mavakatuala-ko okukala kombanda yohi. Anthi, onondingavivi mavakanyimua-ko kombanda yohi, iya onongangala keheke mavakatukulwa-ko.” (Provérbios 2:21, 22) Huku wati: “Tala! Ovipuka aviho ndyikahi nokuvilinga ovipe.”​—Revelação 21:4, 5.

3. ONTHYULILO OKUHANYAKO ONONGELEYA MBUPENGESA KU HUKU NO KOVANTHU.

   Ombimbiliya yati “Ovauli vapopia omatutu. Iya ovanakwa vatumina nounene wavo muene. . . . Mahi, oityi mamulingi tyina onthyulilo yameya?” (Jeremias 5:31) Tupu Jesus Kristu wati: “Ovanyingi monthiki oyo, mavakati ‘Tatekulu, Tatekulu, katualongesile menyina liove, katuapayele ovilulu menyina liove, nokulinga ovipuka ovinyingi vihuvisa menyina liove?’ Ame andyikevepopila okuti: ‘Ame himwii! Tundei ponthele yange, onwe vokulinga ovipuka ovivi!’”​—Mateus 7:21-23.

4. ONTHYULILO OKUHANYAKO OVANTHU VAKUATESAKO OUYE UNO OPO UTUALEKO OKUKALA NGETYI UKAHI.

   Jesus Kristu wati: “Pahe ekoyeso malikeye mokonda yetyi, otyitei tyeya mouye, mahi ovanthu vehole vali enthiki tyipona otyitei, mokonda yovilinga viavo ovivi.” (João 3:19) Ombimbiliya ipopia ehanyauno liotete liamonekele pononthiki mbomulume wekolelo Noe. Yati: “Ouye wo kononthiki ombo, auhanyaunwa-ko nomeva ombila onene. Mahi, nondaka yatyo oyo, eulu nohi vikahiko hono, viapakwa pala otupia, nonthiki yekoyeso no yehanyauko liovanthu onondingavivi.”​—2 Pedro 3:5-7.

Tala okuti “onthiki yekoyeso, nehanyauno” ikahi nokuya, yaelekwa nehanyauko “liouye” pononthiki mba Noe. Ouye patyi wahanyenue-ko? Ohi hayo-ko yahanyenwe-ko, mahi tyahanyenwe-ko “ovanthu vokuhena onthilo na Huku.” Onondyale mba​—Huku vala—​“mbahanyenwe-ko.” Tyina onthiki ya Huku yameya, “onthiki yekoyeso,” vana vakoya okukala onondyale mba Huku, tupu mavakahanyua-ko. Mahi, omapanga a Huku, mavakahupa, ngetyi Noe nombunga yae vahupile.​—Mateus 24:37-42.

Nkhele soka ohi ino maikakala nawa ngatyi tyina Huku amanyimiko atyiho tyihongiliya ovanthu okulinga ovivi! Tyayandyuluka nawa okuti etyi Ombimbiliya ipopia konthele yonthyulilo, onondaka onongwa, ha nombi-ko. Nkhele upondola okulipula okuti: ‘Okuti Ombimbiliya itupopila onalupi onthyulilo maiya? Okuti ili umwe popepi? Oityi ndyina okulinga opo ndyihupe konthyulilo?’