Ovanyingi Mavakahupa Konthyulilo Nove Upondola Okuhupa

Ombimbiliya itupopila okuti tyina onthyulilo yameya, pena ovipuka mavikahanyuako. Yati: “Makukakala ononkhumbi mbumwe ononene, mbuheneende-ko tunde konthyimbi youye alo pahe . . . Tyotyili, inkha ononthiki mbatyo ombo kambatepululilwe, ñgeno ohitu naike yayovoka.” (Mateus 24:21, 22) Mahi, Huku wetulaa okuti ovanthu ovanyingi mavakahupa. Ombimbiliya yati: “Ouye ukahi nokulamba . . . , mahi una ulinga etyi Huku ahanda makalako apeho.”​—1 João 2:17.

Oityi wesukisa okulinga opo uhupe kouye ou ukahi nokulamba, ‘otualako apeho’? Okuti wesukisa okuhimbika okuongiya ovikulia ine okuovola apa moholama, novikuavo vali? Au. Ombimbiliya itulondola nononkhono opo tuhaovole ovipuka ovio. Yati: “Mokonda ovipuka ovio aviho mavikasengululwa, muna okukala ovanthu patyi! Muesukisa okukala novituwa viasukuka novilinga vilekesa onthilo na Huku, putyina mukevelela nokuanoñgonoka nawa okuya kuonthiki ya Jeova.” (2 Pedro 3:10-12) Onoversikulu ononkhuavo mbulekesa okuti “ovipuka ovio aviho” vikahi pala okusengululwa, ovatumini ovakalavi vouye uno, novanthu aveho vakoya okutuminwa navo, vehetavelele okutuminwa na Huku. Tyimoneka nawa okuti, inkha tuliongiyila ovipuka ovinyingi oviwa, kamaviketuyovola kehanyauno.

Tyotyili, opo tuhupe, tyitei kokutokola okuhula ku Jeova Huku, nokulilongesa ovituwa, novilinga vimuhambukiswa. (Sofonias 2:3) Tuhalandulei etyi ovanyingi hono valinga, nokutomba omanyingilikilo ayandyuluka nawa alekesa okuti tukahi momuvo wakolela unene. Mahi, tuesukisa “okunoñgonoka nawa okuya kuonthiki ya Jeova.” Onombangi mba Jeova vapondola okukulekesa Mombimbiliya etyi una okulinga opo uhupe konthiki oyo ikahi nokuya.