OSAPI YO KONDYE | OKUTI OUNONGO WOVANTHU WAPINGA PO MBIMBILIYA?

Ounongo Wovanthu Una Apa Uhulila

Momanima okualamba, kualingwa omikanda ominyingi vihangununa omalusoke a vana vaihanwa okuti ovape mokuhetavela okuti kuna Huku. Ovanthu ovanyingi vetavela etyi omikanda ovio vipopia, iya tyihole okueta onondyaya ononene. Omunongo umwe utiwa David Eagleman, wahoneka okuti: “Ovanthu vamwe, vasoka . . . okuti ovanongo vei ovipuka aviho.” Tupu wati: “Mahi ovanongo ovawa apeho vatehelela omalusoke a vakuavo, iya movilinga viavo vavasa ovipuka ovipe, novipuka ankho vahakevelela-le okuvasa.”

Mokueenda kuomanima, ovanongo ovanene vekahi nokukula unene monkhalelo yavo yokuovolola omakumbululo omapulo akolela konthele youye. Mahi, vamwe tupu valinga ovipuka viapenga unene pokuovolola. Kohale kuali omunongo umwe utiwa Isaac Newton, wankhimana vali unene alo hono. Omunongo oo, walekesile oityi tyikuatesako ohi, novipuka ovikuavo vili meulu, no nonthungululu okukala po nomphangu mbavio, avihelipumu novikuavo. Tupu Newton wahinda onkhalelo yokuvalula yundapeswa mono komputadole, noungendi wokuenda kononthungululu, nonkhalelo yokulilongesa konthele yo oku kuatuka ouye Física Nuclear. Mahi tupu Newton waovolele okulilongesa onkhalelo imwe yokuundapesa omatambu opo apilulule ovivela ovikuavo vikale oolu.

Puetyi Newton ehenetyitwe, omunongo umwe omu Gregu utiwa Ptolomeu, waovolele okunoñgonoka ovipuka vikahi meulu nomaiho ae muene. Ankho utala kononthungululu kounthiki, iya atyimuavela ounongo wokulinga onomapa. Mahi, ankho upopia okuti ohi ili pokati-na-kati kovipuka aviho. Iya ovanthu avetavela elongeso olio mokueenda kuomanima 1.500. Omunongo Carl Sagan wahoneka okuti: “Olusoke luapenga lwa Ptolomeu, luetavelelwe mokueenda kuomanima 1.500. Otyo, tyilekesa okuti alo umwe omunongo omunene upondola okupengesa.”

Hono, ovanongo vena otyitateka ngotyo momaovololo avo. Okuti mavevili umwe okunoñgonoka oku kuatuka ouye, avetyihangununa umwe nawa? Tyotyili, ounongo wovanthu weliyawisa unene, tupu wetuetela ouwa omunyingi. Mahi, tupu tyakolela okuimbuka okuti ounongo oo, una apa uhulila. Omunongo Paul Davies wati: “Ovanthu kavetyivili okuhangununa nawa monkhalelo ike vala oñgeni ouye watungwa.” Onondaka ombo, mbulekesa nawa okuti: Ovanthu kavapondola okunoñgonoka umwe nawa ouye. Moluotyo, tyina ovanthu vapopia okuti ovanongo vapondola okuhangununa nawa ovipuka aviho vikahi mouye, otyiwa tuhinangele okuti ounongo wavo una apa uhulila.

Tyayandyuluka nawa okuti Ombimbiliya itukuatesako movipuka aviho, monkhalelo ounongo wovanthu uhevili

Ombimbiliya ipopia konthele yoku kuatuka ovipuka aviho okuti: “Tala! Oku okononthele vala mbonondyila mba [Huku]. Iya otyo tyeivala onthotovola vala!” (Jó 26:14) Kuna ovipuka ovinyingi ovanthu vehevili okunoñgonoka. Onondaka apostolu Paulu ahoneka omanima 2.000 konyima, nkhele ombotyotyili. Wati: “Omalumono a Huku nounongo wae nenoñgonoko viaya kohi unene ngatyi! Omakoyeso ae kaevilwa okunoñgonokwa, onondyila mbae kambuvilwa okuovololwa!”—Romanos 11:33.

Ehongolelo Ounongo Wovanthu Uhapondola Okuava

Ovanongo vaava enoñgonoko konthele youye, mahi Ombimbiliya yaava onondonga, nehongolelo likuatesako ovanthu okukala nombembwa na vakuavo, nehambu, nonkhalelo ongwa yomuenyo. Tala onongeleka mbumwe.

Okulityilika Okuipaa

Kala nonthilo nomuenyo

“Uhaipae.”—Êxodo 20:13.

“Kese munthu uyele omukulu wae ine ondenge, omuipai.”—1 João 3:15.

Kala nombembwa, otualako nayo

“Hondovoka kotyivi, olingi etyi tyaviuka. Ovola ombembwa, olingi ononkhono mbokuivasa.”—Salmo 34:14.

“Otyinyango tyouviuki tyikunwa nombembwa, na vana vahanda ombembwa.”—Tiago 3:18.

Lityilika oungangala

“Jeova utala nawa tyilinge omuviuki tyilinge ondingavivi. Mahi, uyele una uhole oungangala.”—Salmo 11:5.

“Uhakale nonkhi nomunthu ongangala, mokonda Jeova uyele omunthu wovivi.”—Provérbios 3:31, 32.
Ombunga Ina Ehambu

Tavela ko vo ho

“Vana, tavelei ko vo ho mu Tatekulu, mokonda otyo tyaviuka komaiho a Huku. ‘Humba ho na nyoko’, otyo otyitumino tyo tete tyina omulao. ‘Opo ukale nomuenyo omuwa nokukala omuvo omule kombanda yohi.’”—Efésios 6:1-3.

Longesa ovana vove monkhalelo yaviuka

“Muhanumanesei ovana venyi, mahi vetekulei, mokuveviyula, nokuvelongesa ngetyi Jeova apopia.”—Efésios 6:4.

“Muhanumanesei ovana venyi, opo vahakale tyasoya.”—Colossenses 3:21.

Kala nohole, nonthilo nou muelinepa nae

“Kese umwe puonwe, akale nohole nomukai wae, ngetyi oe muene elihole. Tupu, omukai akale nonthilo onene nomulume wae.”—Efésios 5:33.
Okuyunga nawa ohi

Konthele ya vana ankho vasilisa ohi mononkhalelo mbelikalaila, Ombimbiliya yapopilile ova Isilayeli okuti: “Otyilongo tyasiliswa na vana vakalamo . . . Vokukalamo ovo vavelwa onombei.” (Isaías 24:5, 6) Huku makavela onombei vana vekahi nokunyona omphepo, nomaande, nohika. “Makahanyako vana vekahi nokuhanya ohi.” (Revelação 11:18) Kamavakahupa mokonda yovituwa viavo.