Omapulo Ombimbiliya Akumbululwa
Omokonda yatyi mo Mbimbiliya muakalela omaulo?
Oityi Ombimbiliya ipopila ovipuka vikahi nokumoneka mononthiki mbetu?—Lucas 21:10, 11.
Mo Mbimbiliya muvasiwa omaulo omanyingi ahangununwa nawa. Nawike omunthu upondola okuula etyi matyiya komutwe nawa-nawa. Moluotyo, omaulo afuisuapo, alekesa nawa okuti Ombimbiliya Ondaka ya Huku.—Tanga Josué 23:14; 2 Pedro 1:20, 21.
Omaulo Ombimbiliya okuafuisuapo, etuavela ehunga enene liokukala nekolelo mu Huku. (Hebreus 11:1) Tupu etuavela onthumbi yokuti ovipuka Huku alaa komutwe, tyotyili mavikafuisuapo. Ngotyo, omaulo Ombimbiliya etuavela ekevelelo liotyotyili.—Tanga Salmo 37:29; Romanos 15:4.
Oñgeni omaulo Ombimbiliya etukuatesako?
Omaulo amwe alondola ovaumbili va Huku okulinga etyi evetuma. Mongeleka, etyi Ovakristau votete ankho vamona omaulo amwe afuiswapo, avatundu mo Jelusalei. Konyima, etyi epundaumbo olio liahanyua-po mokonda yovanthu ovanyingi vehetavelele Jesus, Ovakristau ankho vekahi kokule iya avahupu.—Tanga Lucas 21:20-22.
Hono, omaulo okuafuisuapo alekesa okuti Ouhamba wa Huku apa katutu mauya okunyimako omauhamba nomautumini ovanthu. (Daniel 2:44; Lucas 21:31) Moluotyo, kese munthu wesukisa okulumbana okuovola okupandwa na Jesus Kristu Ohamba yaholovonwa na Huku.—Tanga Lucas 21:34-36.