Omononkhalelo Patyi Jeova Etuhole?

1. Apostolu João wetulunda tusokolole konthele yatyi, iya omokonda yatyi?

APOSTOLU João wetuavela ondundo opo tusoke unene koluembia olunene Jeova ena nonthue. Mu 1 João 3:1, tutangamo okuti: “Talei oluembia Tate ekahi nokutulekesa!” Tyina tusokolola koluembia olunene Jeova ena nonthue noñgeni elulekesa, onthue tufuena vali kwe iya ohole tuna nae iliyawisa.

2. Omokonda yatyi tyipuiya ku vamwe okunoñgonoka oluembia Huku ena navo?

² Mahi ovanthu ovanyingi kavanoñgonoka inkha Huku uvehole. Vasoka okuti Huku kesukile novanthu. Vapondola okutavela okuti Huku upakako vala ovitumino nokukoyesa vana vehemutavela. Mokonda yomalongeso omatutu, vamwe alo umwe vasoka okuti Huku omukalavi iya katyitavela akale noluembia novanthu. Iya vamwe vasoka okuti Huku uhole ovanthu aveho katyesukisile etyi valinga. Mahi tyina ulilongesa Ombimbiliya tyikukuatesako okunoñgonoka otyili konthele ya Jeova. Ove utyii okuti oluembia otyituwa tyae tyevilapo iya wava omona wae ngotyilikutila opo ekuyovole. (João 3:16; 1 João 4:8) Ngotyo, mokonda yovipuka viaenda momuenyo wove, tyipondola okukupuiya okunoñgonoka oluembia olunene Jeova ena nove.

3. Oityi matyitukuatesako okunoñgonoka oluembia Jeova ena nonthue?

³ Opo tyikukuateseko okunoñgonoka oluembia Jeova ena nonthue, tete tuesukisa okunoñgonoka okuti Jeova oe wetutunga. Wetuavela omuenyo. (Tanga Salmo 100:3-5.) Otyo Ombimbiliya ipopila omulume wotete okuti “omona wa Huku.” (Lucas. 3:38) Iya Jesus wetulongesa opo tuihane Jeova okuti “Tate yetu keulu.” (Mateus 6:9) Jeova oe vala Tate yetu, iya utuhole ngetyi tate omuwa nokuna oluembia ehole ovana vae.

4. (a) Jeova o Tate ukahi ñgeni? (b) Oityi matulilongesa monthele ei nonkhuavo mailandulako?

⁴ Katyapepukile ku vamwe okusoka ku he woluembia. Mokonda hamwe uhinangela onya atekulilwe na tate yae. Jeova nalumwe atekula ngotyo ovana vae. O Tate wevilapo tupondola okukala nae. (Salmo 27:10) Jeova utuhole unene iya ututekula mononkhalelo ononyingi. Tyina tusokolola koluembia Jeova ena nonthue, tupu ohole yetu nae iliyawisa. (Tiago 4:8) Monthele ei, matulilongesa ononkhalelo ononkhuana Jeova etulekesa oluembia lwae. Iya monthele mailandulako, matukelilongesa ovipuka alinga vilekesa okuti una oluembia nonthue.

JEOVA OMUAVI NOKUNA OLUEMBIA

5. Oityi Huku avela ovanthu aveho?

⁵ Etyi apostolu Paulu apita ko Atena, mo Grécia, wamuene okuti muna ovilolo ovinyingi iya ovanthu ankho vetavela okuti ovihuku ovio viveavela omuenyo. Paulu apopi navo konthele ya “Huku walinga ouye novipuka aviho vikahiko.” Evepopila okuti Huku “wavela omuenyo ovanthu aveho, nomufuimo, novipuka aviho” tupu “tuna omuenyo, tuendaenda nokukahiko mokonda yae.” (Atos 17:24, 25, 28) Jeova wetuavela ovipuka aviho tuesukisa momuenyo nokukala nehambu. Soka kovipuka vimwe etuavela mokonda yoluembia ena nonthue.

6. Eumbo Jeova etuavela likahi ñgeni? (Tala olutalatu pefo pahimbikila onthele.)

⁶ Mongeleka, Jeova wetulingila eumbo limwe ewa. (Salmo 115:15, 16) Ovipuka aviho atunga petupu etyi tyelifwa nohi. Ovanongo velilongesa ovipuka ovinyingi Huku atunga mahi kavenevase ohi onkhuavo omu ovanthu vapondola okukala. Jeova ketuavelele vala ovipuka tuesukisa opo tukale nomuenyo, mahi tupu wetulingila ohi imwe ongwa, ikahi nawa, omu tupondola okukala nomuenyo wehambu. (Isaías 45:18) Tyina tusoka keumbo Tate yetu, Jeova etuavela, tuimbuka okuti utuhole unene.—Tanga Jó 38:4, 7; Salmo 8:3-5.

7. Oñgeni onkhalelo Jeova etutunga ilekesa okuti una oluembia nonthue?

⁷ Onkhalelo onkhuavo Jeova alekesa okuti utuhole, omokonda yokuetutunga nounongo wokumuhetekela. (Gênesis 1:27) Otyo tyihangununa okuti tuimbuka okuti Jeova utuhole, nonthue atulekesa ohole tuna nae. Jeova utyii okuti otyo tyituhambukiswa unene. Ovana vahambukwa unene tyina vaimbuka okuti ovohe vevehole. Hinangela okuti Jesus wetulongesa okuti matukala vala nehambu inkha tufuena ku Tate yetu, Jeova. (Mateus 5:3) Wetuavela “ovipuka aviho vituhambukiswa.” Tyimoneka nawa okuti, Jeova una otyali iya utuhole unene.—1 Timóteo 6:17; Salmo 145:16.

JEOVA UTULONGESA OTYILI

8. Omokonda yatyi tuhandela Jeova etulongese?

⁸ Ovohe vehole ovana vavo iya kavahande vakale novitateka. Mahi ovohe ovanyingi hono kavahande okutavela ovitumino vio Mbimbiliya konthele yetyi tyaviuka netyi tyapenga. Mokonda yotyo kavahongolela nawa-nawa ovana vavo, nokuna ovitateka nokuhena ehambu. (Provérbios 14:12) Mahi, Jeova wavela ovana vae ehongolelo lievilapo mokonda oe o “Huku yotyili.” (Salmo 31:5) Uhambukilwa okutulongesa otyili konthele yae. Tupu utulongesa oñgeni tupondola okumufenda nokutulekesa onkhalelo ongwa yomuenyo. (Tanga Salmo 43:3.) Ngotyo, okuti etyi Jeova etulongesa tyilekesa oluembia olunene ena nonthue?

9, 10. (a) Omokonda yatyi Jeova etulongesila konthele yae? (b) Oityi etulongesa konthele yehando liae?

⁹ Haunene, Jeova utupopila oñgeni ekahi. Uhanda tumunoñgonoke. (Tiago 4:8) Ngotyo utupopila enyina liae. Ombimbiliya ipopia vali enyina liae tyipona omanyina omakuavo. Tupu Jeova utupopila oñgeni atuwa. Tyina tutala ovipuka atunga, tulilongesa okuti una epondolo nounongo. (Romanos 1:20) Iya tyina tutanga Ombimbiliya, tulilongesa oñgeni elitehelela, nokuimbuka oluembia olunene ena nonthue. Mokonda tuii nawa ovituwa oviwa via Jeova, onthue tufuena vali kwe.

¹⁰ Tupu Jeova utulongesa ehando liae. Utupopila okuti tulinga onthele yombunga yae. Tupu utuhangununina etyi tuna okulinga opo tuundapele kumwe nombembwa novanthu aveho vomombunga yae. Ombimbiliya iyandyulula nawa okuti Huku ketutungile nepondolo liokuliholovonena etyi tyaviuka netyi tyapenga. (Jeremias 10:23) Jeova utyii etyi tyituetela ouwa. Tukala vala nombembwa nomuenyo una ehambu tyina tumutavela. Jeova utulongesa otyili otyo tyakolela mokonda utuhole.

11. Oityi Tate yetu etupopila konthele yetyi matyiya komutwe wandyila?

¹¹ He woluembia usoka etyi malingila ovana vae komutwe wandyila. Uhanda vakale nomuenyo wehambu. Mahi ovanthu ovanyingi hono vasukalala vali unene netyi matyikamoneka komutwe, iya ovanyingi vapesela omuenyo wavo okulinga ovipuka vihesilivila. (Salmo 90:10) Tupandula unene mokonda Tate yetu, Jeova, ketulongesa vala opo tukale nomuenyo omuwa pehepano, mahi tupu utulaa okukala nomuenyo omuwa komutwe wandyila!

JEOVA UHONGOLELA NOKUVIYULA OVANA VAE

12. Oñgeni Jeova akuatesileko Kaim na Baruke?

¹² Etyi Jeova amona okuti Kaim uhungi kokulinga otyipuka otyivi unene, ahetekela okumukuatesako etyi emupula okuti: “Omokonda yatyi wanumanena? Inkha ulinga vali etyi tyaviuka, okuti kumapandwa vali?” (Gênesis 4:6, 7) Kaim ehetavela okukuatesuako na Jeova, iya atyimuetela ononkhumbi. (Gênesis 4:11-13) Otyikando otyikuavo, Jeova aimbuka okuti otyituwa tyahaviukile tya Baruke tyikahi nokumusoyesa. Ngotyo, Jeova apopila Baruke okuti olusoke lwae luapenga iya wesukisa okupiluluka. Baruke atehelela elondolo lia Jeova iya ahupisa omuenyo wae.—Jeremias 45:2-5.

13. Oityi ovaumbili va Jeova vekolelo velilongesa momivo viovitateka?

¹³ Jeova utuhongolela nokutuviyula mokonda utuhole. Ketuviyula vala tyina tyesukisa, mahi tupu utulongesa. (Hebreus 12:6) Mombimbiliya, tutangamo ovaumbili vekolelo Jeova alongesa opo vakale ovanthu ovawa. Mongeleka, Jose na Moisesi na David vakalele momivo vio vitateka. Momivo ovio, Jeova wevekuatesileko. Ovipuka velilongesa mokueenda kuomivo ovio vievekuatesako etyi Jeova eveavela ovilinga ovinene. Tyina tutanga Mombimbiliya oñgeni Jeova akuatesako nokulongesa ovanthu vae, tuimbuka okuti Jeova tyilityili utuhole.—Tanga Provérbios 3:11, 12.

14. Inkha tulinga otyipuka tyimwe tyapenga, oñgeni Jeova alekesa oluembia lwae?

¹⁴ Namphila tutualako okulinga ovipuka ovivi, Jeova utualako okutulekesa oluembia lwae. Inkha tutavela tyina etuviyula iya atulivele, “metuevela.” (Isaías 55:7) Otyo tyihangununa tyi? Onondaka mba David konthele yokuevela kwa Jeova mbulekesa okuti onthue tuna Tate una okankhenda, etyi ati: “Wevela oviponyo viove aviho. Ukuvelula omauvela ove aeho, upola omuenyo wove metoto. Ukuyamba noluembia nokankhenda. Ngetyi outundilo ukahi kokule noutakelo, tupu Huku ononkhali mbetu wembupaka kokule nonthue.” (Salmo 103:3, 4, 12) Jeova utuviyula nokutuhongolela mononkhalelo mbelikalela. Okuti ove wafuapo pala okulinga liwa omapiluluko? Apeho hinangela okuti Jeova utuviyula tupu omokonda utuhole.—Salmo 30:5.

JEOVA UTUAMENA

15. Onkhalelo patyi onkhuavo Jeova alekesa oluembia lwae kuonthue?

¹⁵ He woluembia uyakulila ovana vae koviponga. Tupu ongotyo Tate yetu, Jeova, alinga. Omuhoneki wono salmu wapopia konthele ya Jeova okuti: “Wamena omuenyo wavana vakolela mwe. Uveyovola pomaoko onondingavivi.” (Salmo 97:10) Soka kuetyi: Ngetyi tuyakulila liwa omaiho etu mokonda akolela kuonthue, na Jeova uyakulila liwa-liwa ovanthu vae mokonda vakolela kwe.—Tanga Zacarias 2:8.

16, 17. Oñgeni Jeova ayakulila ovanthu vae kohale no mononthiki mbetu?

¹⁶ Onkhalelo imwe Jeova aamena ovanthu vae tyilinge kohale ine mononthiki mbuno, o putyina aundapesa onoandyu mbae. (Salmo 91:11) Oandyu ike yaipaele omafualali o Asiria ena 185.000 motyinthiki tyike iya aiyovola ovanthu va Huku. (2 Reis 19:35) Potyita tyotete onoandyu mbayovolele Petulu na Paulu novakuavo vali mokaleya. (Atos 5:18-20; 12:6-11) Mononthiki mbetu, kotyilongo tyimwe tyo mo África kualingilwe ovilwa vimwe ovinene. Ovanthu avatili owoma mokonda yovilwa, nokupundua ovipuka viavo nokuipawa. Namphila nawike povakuatate wankhile, ovipuka viavo vevipolelwe. Mahi nongotyo vaimbukile okuti Jeova uvehole, iya ankho vetyii okuti ukahi nokuvetekula. Namphila ovanyingi vamuene ononkhumbi, nongotyo ankho vena ehambu. Etyi omukuatate umwe watunda kombala yo nombangi ekevetalelapo iya apulu ovakuatate no nomphange oñgeni vekahi, avakumbulula okuti: “Tukahi vala nawa, tupandula Jeova!”

¹⁷ Tyotyili, ovaumbili vamwe va Jeova, mokonda yekolelo liavo vaipawa ngetyi tyalingilwe omulongwa Estevau. Jeova hapeho utyilika ovipuka ovio vimoneke. Mahi waamena ovanthu vae mokuvelondola kononkhalelo ononyingi Satanasi autukila ovanthu vae. (Efésios 6:10-12) Tuvasa omalondolo oo Mombimbiliya no momikanda vieongano lia Jeova. Mongeleka, tulilongesa konthele yoviponga vio Internet, nokukala nohole nonombongo, oundalelapo nokutala onosinema muna ovanthu valinga ovivi, nomikanda nomawela. Tyayandyuluka nawa okuti, Jeova utuhole iya uhanda okutuyakulila.

OMUNKHIMA OMUNENE

18. Oñgeni ove ulitehelela mokonda yohole Jeova ena noove?

¹⁸ Etyi Moisesi asokolola komanima aeho aumbila Jeova, akala nonthumbi yokuti Jeova umuhole. Moisesi ati: “Utuhambukiswa komuhuka nokankhenda kove, opo tuliyavele nehambu nokuhambukilwa ononthiki mbetu ambuho.” (Salmo 90:14) Tuna elao limwe enene liokunoñgonoka nokuimbuka okuti Jeova utuhole. Elao limwe enene okuhumbwa na Jeova! Onthue tulitehelela nga apostolu João wapopia okuti: “Talei oluembia Tate ekahi nokutulekesa!”—1 João 3:1.