OSAPI YO KONDYE | OKUTI OKULIKUAMBELA TYIETA OUWA?
Omokonda Yatyi Ovanthu Velikuambelela?
“Ame ankho ndyina otyituwa tyokuyumba omawela. Ankho ndyilikuambela opo ndyimone onombongo ononyingi momawela oo. Mahi, hinembumone nalumwe.”—Samuel,a ko Kenia.
“Mosikola ankho atuho tuna okulinga omalikuambelo tualongeswa tuapaka momutwe.”—Teresa, ko Filippina.
“Ame ndyilikuambela tyina ndyina ovitateka. Ankho ndyilikuambela opo ndyevelwe ononkhali, tupu opo ndyikale Omukristau omuviuki.”—Magdalene, ko Gana.
Ovipuka viapopiwa na Samuel, na Teresa, na Magdalene, vilekesa okuti ovanthu velikuambela mokonda yomahunga omanyingi. Omahunga amwe akolela vali tyipona omakuavo. Omalikuambelo ovanthu vamwe, atunda komutima. Mahi omalikuambelo avakuavo alingwa vala. Ovanthu vamwe velikuambela opo vapite mosikola, ine velikuambela opo vafinde momawela valinga, ine opo Huku ahongolele ombunga yavo, ine ovipuka ovikuavo. Mahi, ovanyingi vaimbuka okuti vesukisa okulikuambela. Tyotyili, omaovololo alekesa okuti, alo umwe vamwe veheli mongeleya naike, velikuambela apeho.
Okuti ove ulikuambela? Inkha utyilinga, uhole okulikuambela konthele yatyi? Tyilinge una otyituwa tyokulikuambela, ine utupu, upondola okupula okuti: ‘Okulikuambela Tyieta umwe tyili ouwa? Okuti kuna umwe omunthu utehelela omalikuambelo?’ Omuhoneki umwe wapopia etyi asoka, ati: “Elikuambelo onkhalelo imwe ivelula . . . tyikahi ngatyina upopia notyinyama tyove watekula.” Onondotolo mbumwe nambo mbusoka ngotyo. Vaihana elikuambelo okuti, “onkhalelo onkhuavo ivelula.” Okuti vamwe velikuambela okuhetekela vala vakuavo, opo vaveluke kouvela hamwe vena?
Mahi, Ombimbiliya ilekesa okuti elikuambelo, liavilapo vali unene tyipona onkhalelo ivelula. Itupopila okuti tyotyili kuna omunthu ukahi nokutehelela omalikuambelo alingwa monkhalelo yaviuka, nokuita ovipuka viaviuka. Okuti otyo otyili umwe? Tutalei elekeso limwe.
a Omanyina amwe apilululwa.