“Jeova Umuevela Tyihakuluminyua”

“Una wahaevela vakuavo uteya otyilalo nae aendela.” Ombo onondaka mba Edward Helbert woko Grã-Bretanha waliko motyita 17, mbulekesa omokonda yatyi tuesukisila okuevela vakuetu: Atuho nthiki imwe matusukisa okuita vakuetu opo vetuevele. (Mateus 7:12) Mahi, kuna ehunga liakolela vali lilekesa omokonda yatyi tuesukisila okuevela. Tala onondaka mbo apostolu Paulu mu Colossenses 3:13.​—Tanga.

Mokonda tuvakuankhali, pamwe tulinga ovipuka vinumanesa vakuetu, iya navo vapondola okutulinga ngotyo. (Romanos 3:23) Oñgeni tupondola okukala nombembwa navakuetu? Nehongolelo lia Huku, Paulu wetulondola opo tukale noluembia nokuevela. Pomuvo elondolo olio liahonekwa palambale omanima ehika povityita omakwi evali, mahi nkhele liakolela unene hono. Tutalei vali nawa onondaka ombo mba Paulu.

“Tualeiko okulikoleleya pokati na vakuenyi.” Onondaka “tualeiko okulikoleleya” mbatunda mondaka yo Gregu ilekesa okukala noluembia ine okupwa elundo. Omukanda umwe, wapopia okuti Ovakristau vakala notyituwa otyo “mokukala tyafuapo opo vakoleleye vana vevelinga ovivi ine vena ovituwa vivenumanesa.” Onondaka “pokati na vakuenyi” mbutulekesa okuti atuho tuesukisa okulievela. Otyo tyilekesa okuti tyina tuhinangela okuti tuna ovituwa vipondola okunumanesa vakuetu, kamatuyeke ovipuka pamwe tuyele kuvakuetu vinyone ombembwa tuna navo. Mahi oityi matulingi inkha vakuetu vetulinga tyimwe tuhahandele?

“Tualeiko . . . okulievela pokati tyihakuluminyua.” Ngetyi tyapopia omunongo umwe, ondaka yo Gregu yapitiyua “okulievela tyihakuluminyua,” handakako ipopiwa unene pala okupopia okuevela, mahi ilekesa nawa otyituwa tyokuevela nokankhenda. Omukanda omukuavo wati onondaka ombo mbupondola okuhangununa ‘okuaava tyimwe tyihambukiswa, nokulinga otyipuka tyimwe otyali, nokukuatesako.’ Tulekesa okuti tuna okankhenda mokukala tyafuapo pala okuevela alo umwe tyina tuna “ehunga liokunumana na mukuetu.” Mahi, omokonda yatyi tuesukisila okukala tyafuapo okulekesa otyali otyo? Omokonda hamwe matusukisa una wetuleva etuevele ngetyi onthue tuemuevelele.

“Ngetyi Jeova emuevela, nonwe evelei vakuenyi.” Olio ehunga liavilapo lilekesa omokonda yatyi tuesukisila okuevela vakuetu tyihakuluminyua: Jeova Huku utuevela tyihakuluminyua. (Miquéias 7:18) Nkhele soka okankhenda okanene Jeova alekesa kovakuankhali velivela. Jeova welikalela nonthue mokonda kalingi onkhali. Nongotyo, wafuapo pala okuevela ovakuankhali velivela namphila etyii okuti kamesukisa okuevelwa novakuankhali ovo. Tyotyili, Jeova ongeleka yavilapo yokuevela ovakuankhali velivela!

Okankhenda ka Jeova ketukuatesako okufuena kwe nokutuavela ondundo yokumuhetekela. (Efésios 4:32–5:1) Otyiwa tulipule okuti: ‘Inkha Jeova undyevela noluembia, oñgeni ame nahaevela ovakuankhali vakuetu velivela nomutima auho mokonda yokualinga tyimwe nahahandele?’​—Lucas 17:3, 4.