Omapulo Ombimbiliya Akumbululwa
Okuti tupondola okunoñgonoka otyili konthele ya Huku?
Oityi Huku ahandela tunoñgonoke otyili? Tanga João 17:3
Huku uhole okupopia novanthu. Waundapesile ospilitu sandu yae, ine ononkhono mbae, opo apake omalusoke ae momituwe vio vahoneki vo Mbimbiliya. (2 Pedro 1:20, 21) Ngotyo, tupondola okunoñgonoka otyili konthele ya Huku, mokutanga Ombimbiliya.—Tanga João 17:17; 2 Timóteo 3:16.
Mo Mbimbiliya, Huku uhololola ovipuka ovinyingi konthele yae. Upopia omokonda yatyi atungila ovanthu, oityi makalinga pala ovanthu, nonkhalelo ahanda tutyinde omuenyo wetu. (Atos 17:24-27) Jeova Huku, uhanda tunoñgonoke otyili konthele yae.—Tanga 1 Timóteo 2:3, 4.
Omokonda yatyi Huku ahambukilwa na vana vehole otyili?
Jeova o Huku yotyili, iya watumine Omona wae Jesus, opo eye okulongesa ovanthu otyili. Ngotyo, vana vehole otyili vetavela Jesus. (João 18:37) Huku uhanda ovanthu ovo vemufende.—Tanga João 4:23, 24.
Satanasi Eliapu ukahi nokutyilika ovanthu ovanyingi okunoñgonoka Huku, mokuyandyanesa omalongeso omatutu konthele ya Huku. (2 Coríntios 4:3, 4) Ovanthu vokuyele etyi tyaviuka, vekahi nokuyapulwa nomalongeso oo ounkhembi. (Romanos 1:25) Mahi, ovanthu ovanyingi ovakuatyili, vekahi nokuvasa otyili konthele ya Huku, mokulilongesa Ombimbiliya.—Tanga Atos 17:11.