Mphe-vo Vala Enima Like Liombembwa Nehambu

OMUENYO WANGE KOHALE:

Ombunga yange ankho ikala mo Tellancourt, koutakelo wo França. Tate ankho omu França, me omu Italia. Etyi natuukisa omanima etyinana, atuilukila kotyilongo tyimwe tyovanthu vahepa mo Roma, ko Italia. Meumbo lietu ankho muna ovitateka. Ovo tate ankho vatañguna unene mokonda yovitateka viokuhena onombongo.

Etyi ankho ndyina omanima 15, me amphopila opo ndyitunde meumbo, ndyovole omapanga. Moluotyo, andyihimbika okukakala omuvo omunyingi kondye, otyo ndyikondoka. Liwa-liwa andyilingi oupanga omuvi. Onthiki imwe omulume umwe, ankho ulilingisa ngoti epanga liange, eya puame. Amphe epangwe, iya andyitambula mokonda ankho ndyihanda okulekesa okuti pahe nekula. Liwa-liwa andyilipake mokupuena epangwe, nokulinga omaundalelapo. Ovikando ovinyingi ovanthu vankhuata avalala na ame kononkhono. Kuame omuenyo ankho utupu esilivilo. Ankho hesukile inkha ndyina omuenyo ine ndyinkhia. Ankho nehulilwa. Etyi natuukisa omanima 16 andyihande okuliipaa. Nanuine epindi liovinyu yo wiski, andyikolwa andyiliyumbu meiva. Moluotyo, andyikala enthuvia ononthiki ononthatu.

Andyihimbika okupanda omuenyo, mahi tupu andyikala ongangala nokulinga ovivi. Ankho ndyihanda ovakai, iya tyina nameya meumbo liavo ndyivekoleswa nomapangwe, andyivake-mo kese tyipuka tyakolela. Omaongano omanene ovifuanga, ankho anthuma ko Italia okukalandesa nokulanda omapangwe. Ankho ndyikuatwa apeho no pulisa. Omuenyo wange ankho utupu ehongolelo. Mahi, ankho ndyityii okuti kuna ou wampha omuenyo. Andyilikuambela ku Huku, okuita opo amphe vala enima like liombembwa nehambu.

OÑGENI OMBIMBILIYA YAPILULULA OMUENYO WANGE:

Etyi ankho ndyina omanima 24, andyitokola okuilukila ko Inglaterra. Omuenyo wange ankho ukahi motyiponga mokonda ndyiundapa novalandesi vomapangwe. Puetyi nkhele ne-heneiluke, andyikatalelapo me. Andyihuvu okumona omulume utiwa o Annunziato Lugarà, upopia na me konthele yo Mbimbiliya.a Ankho ndyimwii okuti otyifuanga. Andyivele owoma, iya andyimupulu oityi eya okulinga. Ngwe amphopila okuti walinga omapiluluko omanene momuenyo wae, opo akale Ombangi ya Jeova. Iya amphopila okuti tyina wamehiki ko Inglaterra kaovole Onombangi mba Jeova. Andyitavela. Mahi, etyi nehika ko Inglaterra, kapakalele ehimbwe andyihimbika vali okulinga ovivi ankho ndyilinga-le.

Onthiki imwe, andyihonyena Nombangi ya Jeova, ankho ukahi nokuava Omutala Womulavi no Despertai! metapalo lio Londre. Andyihinangela etyi Annunziato amphopilile, iya andyimuiti opo andongese Ombimbiliya.

Andyihuvu unene netyi ankho ndyililongesa mo Mbimbiliya. Mongeleka, onondaka mbuvasiwa mu 1 João 1:9, mbehika unene komutima wange. Onondaka mbuvasiwa-mo, mbupopia konthele ya Huku okuti: ‘Inkha tupopia ononkhali mbetu, ngwe omukuatyili, omuviuki pala okuevela ononkhali mbetu, iya tupu metusukula.’ Otestu oyo yankhuatesako unene, mokonda ankho nelitehelela okuti nasila unene mokonda yovivi ankho ndyilinga. Liwa-liwa andyihimbika okuenda komaliongiyo Onombangi mba Jeova. Avanthambula nawa. Etyi namona oupanga omunene vena, ngwe ankho otyo ndyiovola unene, andyihande okukala mewaneno olio likahi ngatyina ombunga.

Namphila ankho katyimphuiya okuyeka-po okupuena omapangwe nomaundalelapo, mahi ankho tyepuiya unene okusukukisa onkhalelo yomuenyo wange. Naimbuka okuti nesukisa okutekula ovanthu nehumbilo nonthilo. Na hono nkhele ndyilinga ononkhono opo ndyiyeke-po ovituwa vimwe ovivi. Mahi, Jeova wankhuatesako okuviukisa omuenyo wange. Etyi nelilongesa Ombimbiliya onohanyi 6, andyimbatisalwa, iya andyikala Ombangi ya Jeova. Otyo atyiho ankho o menima lio 1997.

OUWA NAPOLA-KO:

Konyima yombatisimu, andyinepe omuhikuena utiwa o Barbara. Nae ankho opo ambatisalwa iya akala Ombangi ya Jeova. Etyi umwe pomapanga ange o kohale amona okuti nalinga omapiluluko momuenyo wange, nae ahimbika okulilongesa Ombimbiliya. Mokueenda kuomuvo, oe kumwe nomphange yae, avakala Onombangi mba Jeova. Tupu, me kulu ankho wokuna omanima alamba po 80, ahimbika okulilongesa Ombimbiliya, ambatisalwa.

Pahe ndyimukulu wewaneno. Ame nomukai wange, tukahi movilinga viokuivisa omuvo auho, tukuatesako ova Italia mo Londre okulilongesa Ombimbiliya. Pamwe, ndyikala tyasoya mokonda yonkhalelo yomuenyo natyindile kohale, mahi, Barbara ukahi nokunkhuatesako unene. Etyi ankho ndyihanda ombunga ikahi nawa, iya pahe neivasa. Tupu, ndyina Tate woluembia ankho apeho ndyihanda. Ame naitile ku Huku opo amphe vala enima like liombembwa nehambu, mahi wampha vali unene!