OSAPI YO KONDYE | TYINA UMWE TUHOLE AMANKHI
Okuti Okulila Tyapenga?
Okuti onthiki imwe wakalele-ale noluihamo olunene mahi aluhakala ehimbwe? Hamwe lualambele liwa-liwa, pahe walimbua-ko. Mahi, oluihamo tuiva tyina wetu amankhi, luelikalela. Omunongo Dr. Alan Wolfelt, wahoneka momukanda wae okuti: “Kutupu natyike tyelifwa ‘nokulimbwa’ omuihamo tuiva tyina wetu amanyimi.” Ayawisa-ko okuti: “Tyesukisa omuvo omunyingi, nokukuateswa-ko na vakuenyi, opo omuihamo oo utepuluke.”Healing a Spouse’s Grieving Heart.
Mongeleka, tala oñgeni ohongoi yombunga Abraiau elitehelele etyi omukai wae anyima. Ombimbiliya ipopia okuti: “Abraiau ahimbika okuliyavela okulila Sara.” Ondaka “wahimbika,” ilekesa okuti wakalele omuvo omunyingi, opo etyivile okufinda oluihamo lwo nonkhia.a Ongeleka onkhuavo o ya Jako, wakembelue etavela okuti omona wae Jose waliwa notyinyama. Walilile “ononthiki ononyingi,” iya ombunga aiya okumuungumanesa, ehetavela. Apalambe omanima omanyingi, mahi no ngotyo ononkhia mba Jose ankho nkhele mbumuihama.—Gênesis 23:2; 37:34, 35; 42:36; 45:28.
Abraiau walilile ononkhia mbomukai wae onthyolwa Sara
Na hono ovanthu ovanyingi vokuankhisa vavo, velitehelela ngotyo. Tala onongeleka onombali.
“Omulume wange Robert, wanyima monthiki 9 ya Kakwenye yo 2008. Onthiki yotyiponga otyo, ankho ikahi vala ngo nonthiki ononkhuavo. Tualia nae omphiupiu, tuelipa onombesu nokuliti ‘ame ndyikuhole,’ ngetyi ankho tulinga-le. Etyi palamba omanima 6, ankho nkhele ononkhia ombo mbundyihama unene. Ankho hityii okuti nthiki imwe oluihamo luononkhia mba Robert, malutepuluka.”—Gail, una omanima 60.
“Namphila palamba omanima 18, tunde apa omukai wange anyima, mahi ame nkhele ndyilila, tupu nemuivaluka. Tyina ndyimona otyipuka otyiwa, ndyimuhinangela. Ndyisoka okuti ñgeno wahambukua unene okutala etyi ame ndyikahi nokutala.”—Etienne, una omanima 84.
Tyayandyuluka nawa, okuti okulitehelela ngotyo hatyivi-ko. Onkhalelo ovanthu velitehelela tyina vamankhisa wavo yelikalela. Moluotyo, katyaviukile okupopia omapita omunthu, mokonda yonkhalelo elitehelela povitateka ovio. Tupu, tuesukisa okulityilika okulivela onombei onthue muene, tyina ulitehelela omapita povitateka ovio. Oñgeni matutyivili okufinda oluihamo tyina umwe ankhia?
a Isake omona wa Abraiau, tupu walambelele motyitateka ngotyo. Ngetyi tuetyimona monthele yati “Hetekela Ekolelo Liavo” mo Mutala ou, Isake ankho nkhele ulila ina Sara, namphila ankho palamba-le omanima etatu.—Gênesis 24:67.