Oñgeni Mofindi Oluihamo Tyina Wankhisa Wove?

Kuna onondonga ononyingi konthele yotyo. Mahi, ha ambuho mbutukuatesako. Mongeleka, ovanthu vamwe vapondola okukupopila okuti uhalile vali, ine okulinga ovipuka ovikuavo vilekesa etyi ulitehelela. Ovakuavo vapondola okukutuma okulinga ovipuka ovikuavo vielikalela opo ulekese oñgeni ulitehelela. Mahi, Ombimbiliya ina olusoke luapola pokati, ovaovololi mononthiki mbuno vapanda.

Movilongo vimwe, omulume kapondola okulila. Mahi okuti kuna umwe ehunga liakolela, lilekesa okuti omulume una okukala nohonyi yokulilila mounyingi? Ovanongo konthele yekongoko, valekesa okuti okulila otyipuka tyikahi nawa. Okulila, tyipondola okukukuatesako okuenda no komutwe, namphila okusiwa-po otyitateka otyinene unene. Mahi, okuhalili tyipondola okukulinga unene omapita. Ombimbiliya kailekesa nalumwe okuti okulila tyina umwe amankhi tyapenga. Nkhele soka ongeleka ya Jesus. Etyi epanga liae ankhia Jesus watetekela okulila, namphila ankho ena epondolo liokumututilisa!​—João 11:33-35.

Ovanthu vokuasiwa-po pamwe vanumana unene, haunene tyina ononkhia mbuuhuluka vala. Kuna omahunga omanyingi anumanesa omunthu. Pamwe, omokonda yetyi vakuavo vapopia, haunene vana vahumbwa. Omulume umwe utiwa o Mike ko Afrika do Sul, wati: “Etyi tate anyima ankho ndyina omanima 14. Po kukemupaka, elombe limwe liongeleya Anglikanu, alipopi okuti Huku wesukisa ovanthu onondalawa, iya uvetyinda-po liwa.a Otyo, atyindumanesa unene, mokonda onthue ankho tuhole unene tate yetu. Pahe palamba omanima 63, mahi nkhele tyindyihama.”

Iya okulivela onombei? Haunene tyina ononkhia mbuuhuluka vala, una wasiwa-po upondola okusoka okuti ‘inkha nalingile ñgaa ine ngotyo, ñgeno kankhile.’ Ine hamwe onthiki yahulilila-ko muelivasile na una wanyima, ankho muatañgunine. Iya otyo, tyipondola okuyawisa vali konombei ove ulivela.

Inkha ukahi nokulivela onombei nokuna onyengo, otyiwa uhakale vala nomalusoke oo momutima. Mahi, popila epanga liove upondola okukutehelela, nokukukuatesako okuimbuka okuti omalusoke ngoo, have vala una-o, ovanyingi vokuasiwa-po navo velitehelela ngotyo. Mahi Ombimbiliya ituhinangelesa okuti: “Epanga liotyotyili una ohole omuvo auho, omukuatate watyitua pala okuvatela pomuvo wononkhumbi.”​—Provérbios 17:17.

Epanga enene wokuasiwa-po apondola okukala nalio, Omutungi wetu Jeova Huku. Mupopila etyi tyikahi momutima wove, mokonda “oe wesuka no ove.” (1 Pedro 5:7) Tupu, walaa okuti aveho valinga ngotyo, omalusoke avo nonkhalelo velitehelela, mavitepululwa “nombembwa ya Huku, ipona onondunge nomalusoke aeho.” (Filipenses 4:6, 7) Ngotyo, yeka Huku ekukuateseko okuveluka no Ndaka yae Ombimbiliya yungumanesa. Honeka ono testu ambuho mbuava epameko. (Tala okakasa keya nonthele ei.) Ove upondola alo umwe okumbupaka momutwe. Okukala nonondonga ombo nokumbusokolola nawa, matyikukuatesa-ko haunene movinthiki ukahi awike nokuhena olumphoki.​—Isaías 57:15.

Mononthiki mbokualamba, omukai umwe ankho una omanima 40, wanepua nomulume tuihana okuti Jack, wanyima nouvela utiwa câncer. Jack wati pamwe ukala nounye omunene. Mahi, okulikuambela tyikahi nokumukuatesa-ko. Wati: “Tyina ndyilikuambela ku Jeova, hikala vali nounye. Ovikando ovinyingi tyina napahuka-po kounthiki, olumphoki kaluya vali. Ngotyo ndyitanga Onotestu mbuungumanesa, andyisokolola nawa etyi natanga, iya andyilikuambela konthele yovitateka viange. Konyima andyikala nombembwa onene momutima iya olumphoki aluya, andyilala vali.”

Ina yomukai umwe utiwa o Vanessa, ankho uvela, iya anyimi. Tupu Vanessa waimbuka okuti elikuambelo lina ononkhono ononene. Wati: “Momivo viange viepuiya, ndyiihana enyina lia Huku andyihimbika okulila. Jeova watehelela omalikuambelo ange, iya apeho umpha epameko nesukisa.”

Vamwe vehole okuavela onondonga, vapopila vokuasiwa-po opo valinge ononkhono mbokukuatesa-ko vakuavo ine okuliava movilinga vio potyilongo. Okulinga ngotyo, tyipondola okuveetela ehambu nokutepulula oluihamo luavo. (Atos 20:35) Ovakristau ovanyingi vokuasiwa-po, vaimbuka okuti okukuatesa-ko vakuavo, tyihole okuveungumanesa unene.​—2 Coríntios 1:3, 4.