Okuti Upondola Okukuatesako Ewaneno Lienyi?

ETYI Jesus ehenekondoke keulu, wapopilile ovalongwa vae okuti: “Mamukala onombangi mbange . . . alo kononthele mbokokule-kule mbohi.” (Atos 1:8) Oñgeni ankho mavetyivili okuivisa mouye watyo auho?

Martin Goodman, omulongesi umwe Wosikola Onene, wati: “Otyilinga Ovakristau vapelwe tyevepungile konongeleya ononkhuavo, alo umwe ko va Judeu, moutumini wo Roma.” Jesus ankho wivisa po nomphangu ambuho. Ovakristau votyotyili ankho vena okuhetekela Jesus, okuivisa “onondaka onongwa Mbouhamba wa Huku” ko nomphangu mbatyo ambuho. Ankho vena okuovola ovanthu vahanda okunoñgonoka otyili. (Lucas 4:43) Otyo potyita tyo tete ankho kuakalela ovanthu vatiwa ono “apostolu.” Ondaka apostolu ilekesa vana vatumwa opo vende vakalinge otyipuka tyimwe. (Marcos 3:14) Jesus wapopilile ovalanduli vae okuti: “Endei, kalongesei ovanthu movilongo aviho opo vakale ovalongwa.”​—Mateus 28:​18-20.

Nanphila ono apostolu mba Jesus 12 ankho kavakala mouye auho, mahi ovaumbili ovanyingi va Jeova vekahi nokulandula ongeleka yavo yokuivisa.Tyina vakongwa opo vakaivise kuna kuesukisa ovaivisi, vetavela, avati: “Ame uno! Nthume!” (Isaías 6:8) Vamwe ngetyi ovo vana vakuata Mosikola yo Gileade vehole okuilukila kovilongo ovikuavo. Vamwe vailukila ko nomphangu ononkhuavo motyilongo tyavo. Ovanyingi velilongesa elaka ekuavo opo vakuateseko ewaneno limwe ine otyikundyi. Otyo, pamwe katyapepukile, mahi ovakuatate ovo no nomphange valinga ononkhono ononene tyilekese okuti vehole Jeova novanthu vakuavo. Vasoka nawa iya a vaundapesa omuvo, no nonkhono, no nombongo opo vakaivise kuna kuesukisa ovaivisi. (Lucas 14:​28-30) Etyi ovakuatate ovo no nomphange vekahi nokulinga tyakolela unene.

Hatuho tupondola okuilukila kuna kuakamba ovaivisi, nokulilongesa elaka ekuavo. Mahi atuho tupondola okukala onomisionaliu mewaneno lietu muene.

KALA OMISIONALIU MEUANENO LIENYI

Kotyita tyo tete, Ovakristau vakalele nombili movilinga viokuivisa namphila ankho vakala movilongo viavo muene iya ankho ha nomisionaliu. Paulu wapopila Timoteo okuti: “Linga ovilinga viomuivisi, fuisapo nawa ovilinga viove viokuivisa.” (2 Timoteo 4:5) Ovakristau vo tete valandulile onondaka ombo, nonthue tuna okumbulandula. Ovakristau aveho vena okutavela otyitumino tyokuivisa Ouhamba wa Huku, nokulinga ovalongwa. Alo umwe mewaneno lietu muene, muna ononkhalelo ononyingi tupondola okukala ngo nomisionaliu.

Mongeleka, tyina onomisionaliu vailukila kotyilongo tyimwe, vavasa ovipuka vielikalela, iya avevityiliya. Namphila tuhapondola okuilukila kuna kuakamba ovaivisi, okuti tupondola okuvasa ononkhalelo onomphe mbokuivisa? Mongeleka, mo 1940, ovakuatate vetu vapelwe ondundo opo vahimbike okuivisa mo nondyila onthiki ike kese simanu. Okuti nove uhole okuava oumbangi mo nondyila? Okuti uhole okuundapesa omitala viomikanda? Okuti wafuapo pala okuhetekela ononkhalelo onomphe mbokuivisa onondaka onongwa?

Inkha una olusoke luaviuka, mokala nombili nehambu pokuivisa. Vana vailukila kuna kuakamba ovaivisi, na vana velilongesa elaka ekuavo apeho vafuapo iya vapondola okukuatesako unene ewaneno. Mongeleka vahongolela ovilinga viokuivisa. Onomisionaliu tupu pamwe vahongolela ewaneno alo ovakuatate mewaneno olio navo vakala tyafuapo. Inkha umukuatate wambatisalua, okuti ukahi “nokuovola okuvasa” ovilinga ine okukala tyafuapo pala okukuatesako ovakuatate vove no nomphange mewaneno lienyi mokukala omukulu wewaneno ine omukuatesiko wovakulu vewaneno?​—1 Timóteo 3:1.

KALA “OMUKUATESIKO WA VAKUENYI”

Pena ononkhalelo ononkhuavo tupondola okukuatesako ewaneno lietu. Tyilinge ovakuendye tyilinge ovakulu, ovakuatate no nomphange, tupondola “okupameka” ovakuatate vetu.​—Colossenses 4:11.

Inkha tuhanda okukuatesako omukuatate ine omphange, tuesukisa okumunoñgonoka nawa. Ombimbiliya itupopila okuti, ‘tulipamekei,’ okusoka komasukasuka ovakuatate vetu no nomphange vana tuliongiya navo. (Hebreus 10:24) Otyo katyilekesa okuti tuna okukala nolumbwe, okuovola okunoñgonoka atyiho konthele yomuenyo wa vakuetu. Tyilekesa okuti tuna okunoñgonoka ovakuatate vetu no nomphange netyi vesukisa. Pamwe vesukisa okupewa otyipuka tyimwe, ine okuvepameka Nombimbiliya. Tyotyili povitateka vimwe ovakulu vewaneno vala novakuatesiko vavo vapondola okuvekuatesako. (Gálatas 6:1) Mahi atuho tutyivila okukuatesako ovakuatate vakulupa no nomphange, ine ombunga aiho, tyina vavasiwa novitateka.

Salvatore wakuatesilueko monkhalelo ngoyo. Mokonda ankho utupu onombongo, ankho una okulandesa onondando mbae, nondyuo yae, novipuka vimwe viombunga. Ankho wasukalala nombunga yae. Ovakuatate vamwe mewaneno avetyimono okuti wesukisa okukuatesuako. Avaavela Salvatore onombongo, avakuatesako omukai wa Salvatore okuvasa ovilinga. Tupu ononthiki ononyingi ankho velihungila otyo vatomphola iya nokuvepameka. Avakala noupanga omuwa. Pahe ombunga yovakuatate ovo nombunga ya Salvatore vahinangela omuvo vakalele kumwe momivo viovitateka.

Ovakristau votyotyili vetupu ohonyi yokupopila vakuavo omatavelo avo. Tuna okuhetekela Jesus okunoñgonokesa ovanthu aveho omilao omiwa via Huku. Tyilinge tupondola okuilukila kuna kuesukisa vali ovaivisi, tyilinge katutyivili, atuho tupondola okulinga atyiho tuvila opo tukuateseko vakuetu mewaneno lietu. (Gálatas 6:10) Tyina tuavela vakuetu, tukala nehambu iya “matuave ovinyango movilinga aviho oviwa.”​—Colossenses 1:10; Atos 20:35.