Onkhalelo Ongwa Yokueleka Ove Upondola Okulinga

OKUTI OVE ulitala ngatyina Umukristau? Inkha ongotyo, ove ukahi pokati kovanthu vehika ko nombiliau onombali ouye auho—iya povanthu ovo vetatu wike upopia okuti ndyimulanduli wa Kristu. Hono, kuna onongeleya ononyingi mbovanthu vapopia okuti Tuvakristau iya onongeleya ombo mbelikalela mononkhalelo valongesa. Etyi ove utavela tyipondola hamwe tyelikalela unene netyi vana vapopia okuti Tuvakristau valongesa. Mahi okuti etyi ove utavela tyakolela unene? Yoo, tyakolela—haunene inkha ove uhanda okueendela momalongeso a Kristu avasiwa Mombimbiliya.

Ovalanduli votete va Jesus Kristu ankho veiwe okuti “Ovakristau.” (Atos 11:26) Ankho kavesukisile okulukwa omanyina omakuavo opo vaimbukwe, mokonda ankho ovo vala Ovakristau vekolelo pomuvo opo. Ovakristau ovo ankho velikuata okapandi iya ankho vaendela muetyi valongeswa no monondonga mba Jesus Kristu, una Wahinda Oukristau. Iya ongeleya yove? Okuti ilongesa etyi Jesus Kristu alongesile netyi ankho Ovakristau vo tete valongesa? Oñgeni ove upondola okukala nonthumbi oyo? Kuna vala onkhalelo ike yokuundapesa Ombimbiliya ngatyina otyipuka tyimwe tyili kohi.

Tala: Jesus ankho una onthilo Novihonekwa mokonda Ondaka ya Huku. Jesus ankho kapande ovanthu vokupilulula omalongeso Ombimbiliya, avalandula oviso viahindwa novanthu. (Marcos 7:9-13) Onthue tupondola okupopia nonthumbi okuti omalongeso ovalanduli va Jesus atunda Mombimbiliya. Kese Omukristau una okulipula okuti: ‘Okuti omalongeso ongeleya yange elikuata umwe netyi tyipopia Ombimbiliya?’ Opo tukumbulule epulo olio, omokonda yatyi wahaelekela etyi ongeleya yove ilongesa netyi Ombimbiliya ipopia?

Jesus wapopia okuti efendelo lietu ku Huku lina okukala liotyotyili—otyili tuvasa Mombimbiliya. (João 4:24; 17:17) Apostolu Paulu wapopia okuti eyovo lietu litei “kenoñgonoko liafuapo liotyili.” (1 Tim. 2:4) Otyiwa etyi tulilongesa tyitunde menoñgonoko liafuapo lio Mbimbiliya. Mokonda eyovo lietu liotyotyili likahi motyiponga!

OÑGENI TUPONDOLA OKUELEKA ETYI TULILONGESA NETYI TYIKAHI MOMBIMBILIYA?

Onthue tukukonga opo utange omapulo epandu iya otale omakumbululo Ombimbiliya omapulo oo. Tala ono testu Mbombiliya mbapopiwa iya osokolola komakumululo oo. Moluotyo, lipula ove muene okuti: ‘Oñgeni ndyipondola okueleka omalongeso ongeleya yange netyi Ombimbiliya ilongesa?’

Onkhalelo oyo ipondola okutukuatesako okueleka nawa etyi Ombimbiliya ipopia. Okuti ove wafuapo pala okueleka omalongeso ongeleya yove netyi Ombimbiliya ilongesa? Onombangi mba Jeova mavakala nehambu liokukuatesako okutala nawa otyili tyo Mbimbiliya tyayandyuluka nawa. Omokonda yatyi wahaitila onombangi mba Jeova opo vekulongese Ombimbiliya? Ine upondola okukatala mo site jw.org.

1 EPULO: Huku olie?

EKUMBULULO: Jeova, Tate ya Jesus, o Huku yapeho iya Omutungi omukulami wovipuka aviho.

ETYI OMBIMBILIYA IPOPIA:

“Onthue tupandula Huku Tate ya Tatekulu yetu Jesus Kristu, apeho tyina tumuiitilako momalikuambelo.”—Colossenses 1:3.

“Jeova, Huku yetu, ove vala watokala okupewa omunkhima nehumbilo noutumini, mokonda ove watunga ovipuka aviho”—Revelação 4:11.

Tupu tala Romanos 10:13; 1 Timóteo 1:17.

2 EPULO: Jesus Kristu olie?

EKUMBULULO: Jesus Omona wotyiveli wa Huku. Jesus watungwa, moluotyo nae una onthyimbi. Jesus utavela ku Huku iya ulinga ehando Liae.

ETYI OMBIMBILIYA IPOPIA:

“Tate omunene vali kuame.” —João 14:28.

“[Jesus] otyifuika tya Huku uhamonwa, iya o mutete kovipuka aviho viatungwa.”— Colossenses 1:15.

Tupu tala Mateus 26:39; 1 Coríntios 15:28.

3 EPULO: Ospilitu sandu oityi?

EKUMBULULO: Ospilitu sandu ononkhono Huku aundapesa opo alinge ehando liae. Ha munthu ko. Ovanthu vapondola okukala nospilitu sandu iya avakala nepondolo.

ETYI OMBIMBILIYA IPOPIA:

“Etyi Elisabete eiva Maliya wakukuinya, olukembe meimo liae alupikita iya Elisabete akala tyeyula ospilitu sandu.”—Lucas 1:41.

“Tyina ospilitu sandu yamemulaukila, onwe mamupewa epondolo.”—Atos 1:8.

Tupu tala Gênesis 1:2; Atos 2:1-4; 10:38.

4 EPULO: Ouhamba wa Huku oityi?

EKUMBULULO: Ouhamba wa Huku outumini wokeulu. Jesus Ohamba Youhamba wa Huku. Apa katutu Ouhamba maukalinga ehando lia Huku.

ETYI OMBIMBILIYA IPOPIA:

“Oandyu yapanduvali aihiki onkhwino yayo. Iya akuivala onondaka mbakalavandya keulu, mbati: ‘Ouhamba wouye walinga ouhamba wa Tatekulu yetu no wa Kristu iya oe makatumina apeho.’”—Revelação 11:15.

Tupu tala Daniel 2:44; Mateus 6:9, 10.

5 EPULO: Okuti ovanthu aveho vokulinga ovipuka oviwa mavaende keulu?

EKUMBULULO: Au. Otyikundyi tyovanthu vekolelo, vaihanwa okuti “okahambo okatutu” ovo vaholovonwa na Huku opo vende keulu. Ovo makatumina na Jesus keulu ovanthu pano pohi.

ETYI OMBIMBILIYA IPOPIA:

“Muhakalei nowoma, vokahambo okatutu, mokonda Tate yenyi wemupanda opo emuavele Ouhamba.”—Lucas 12:32.

“Mavakakala ovanakwa va Huku na Kristu, avakatumina kumwe nae.”—Revelação 20:6.

Tupu tala Revelação 14:1, 3.

6 EPULO: Olipi ehando lia Huku pala ohi, novanthu?

EKUMBULULO: Mouhamba wa Huku, ohi maikakala omphangu yombembwa, ovanthu vokuna ekolelo mavakakala nekongoko liafuapo, nombembwa pala apeho iya nomuenyo wapeho.

ETYI OMBIMBILIYA IPOPIA:

“Ovaviuki mavakapiñgana ohi iya avakakala nombembwa onyingi.”—Salmo 37:10, 11.

“Makasekuna ononkhuka momaiho avo, ononkhia, nokulila, no nongembia kamavikakalako vali. Mokonda ovipuka ovio aviho mavikalamba.”—Revelação 21:3, 4.

Tupu tala Salmo 37:29; 2 Pedro 3:13.