Ame Ankho Ndyinumana Uneneiya Ndyilinga Ovivi

OMUENYO WANGE KOHALE:

Ame natyitilwa ko Ciudad Mante otyilongo tyimwe otyiwa tyikala mepundaumbo lio Tamaulipas Mexico. Ovanthu vakala motyilongo otyo vena otyali tupu vena okankhenda na vakuavo. Mahi mokonda youngangala, ankho otyilongo otyo tyitilisa unene owoma.

Tuatyitwa ovakuendye vekuana iya ame ndyi-wavali. Ame nambatisalelwa Mongeleya yo Katolika iya ankho ndyilinga onthele yotyikundyi tyo vokuimba. Ame ankho nahanda okuhambukiswa Huku mokonda ankho ndyina owoma wokukoyeswa iya andyiyokwa mo ifelunu.

Etyi ankho ndyina omanima etano, tate yange atundu meumbo. Mokonda yotyipuka otyo, andyinumana unene iya andyilitehelela omapita. Anehetyivili okunoñgonoka omokonda yatyi tate atundila meumbo, tyina onthue ankho tumuhole unene. Me ankho uundapa onoola ononyingi tupu ankho uundapa kokule opo etutekule.

Mokonda yotyitateka otyo, andyihimbika okulinga oupanga novanthu ovakulu vali kuame kosikola. Avandongesa okupopia onondaka onombi, nokupuena, nokuvaka iya nokulwa. Andyihimbika okuyondya vakuetu tupu andyililongesa o boxi (ovilwa viokuliveta no nosoko) novilwa viokulikama iya novikuavo vali. Andyikala omona umwe ondingavivi. Iya ankho pamwe tulwa nomauta iya alo umwe ovikando vimwe ndyipwila mohonde, pamwe andyikambela katutu okunkhila momatapalo. Otyipuka tyimwe tyakalesile vali omapita me, opuetyi ambasa metapalo tyehekahi nawa iya anthuala liwa-liwa kosipitali!

Puetyi ankho ndyina omanima 16, epanga liange utiwa Jorge eya okututalelapo meumbo lietu. Etupopila okuti Ombangi ya Jeova iya ankho uhanda okutulekesa esilivilo lionondaka onongwa ena. Ahimbika okuhangununa amatavelo ae Nombimbiliya. Ame nalumwe natangele otyipuka ngotyo, etyi nanoñgonoka konthele yenyina lia Huku nomilao viae andyihambukwa unene. Jorge eliave opo etulongese Ombimbiliya. Onthue atutavela.

OÑGENI OMBIMBILIYA YAPILULULA OMUENYO WANGE:

Ame andyihambukwa unene etyi nanoñgonoka otyili konthele yoifelunu​—otyipuka tyimwe Ombimbiliya yahalongesa. (Salmos 146:4; Eclesiastes 9:5) Okutuka opo, anahakala vali nowoma na Huku. Mahi, andyihimbika okumutala ngatyina o Tate una oluembia uhandela ovipuka oviwa ovana vae.

Mokonda ankho ndyiete okuti ndyikahi nokukula motyili, ame andyiimbuka okuti nesukisa okupilulula ovituwa viange. Ankho nesukisa okuliola omutima iya nokuyekapo otyituwa tyoungangala. Elondolo likahi mu 1 Coríntios 15:33 liankhuatesako. Yapopia okuti: “Omapanga omavi anyona ovituwa oviwa” ngetyi tyapopia onondaka okatoi “onondunge ongwa” Andyiimbuka okuti inkha nahanda okupilulula onkhalelo yomuenyo wange, nesukisa okuyekapo okulinga oupanga novanthu vana vanthyongiliya okulinga ovipuka ovivi. Andyiyekepo omapanga ana okohale, andyihimbika okuliwaneka Novakristau ovakuatyili mewaneno​—ovanthu vamwe ankho vatokola okukala novituwa oviwa, ha mokonda yokulwa ine oungangala, mahi omokonda yokuendela movitumino vio Mbimbiliya.

Onthele onkhuavo Yovihonekwa yankhuatesako, ikahi mu Romanos 12:17-19. Yati: “Muhakondolelei nawike otyivi notyivi. . . . Inkha tyitavela, muetyi muvila, kalei nombembwa novanthu aveho. . .  Muhakondolelei nawike ovivi. . . tyahonekwa okuti: ‘“Onyengo oyange,” otyo tyapopia Jeova.’” Ame andyitavela okuti Jeova meketyifuisapo monkhalelo ahanda iya no momuvo watyo. Katutu-katutu andyityivili okuyekapo onkhalelo yomuenyo wange wokulinga ovivi.

Nalumwe nalimbilueko otyipuka tyaendelepo kounthiki etyi ankho ndyikahi nokukondoka keumbo. Otyikundyi tyimwe tyo vakuendye ankho ndyienda navo kohale avambasi iya onkhalamutwe yavo aimphopila okuti: “Pahe liyakulila!” Pomuvo opo liwa-liwa andyilikuambela tyahasete ku Jeova andyiimuiti opo ankhuateseko okukoleleya. Namphila nelitehelela okuti ndyina ononkhono pala okuvekondolela, mahi ame ankho andyityivili okukahateka iya anahalu navo. Onthiki onkhuavo atulivasi nonkhalamutwe yomakongombanda. Otyipuka alinga tyanthyuvisile unene, etyi ambasa amphopila okuti: “Otyiponyo mokonda yetyi tyaendelepo mongulo kounthiki. Otyo otyili, ame nahandele ñgeno ndyikala ngove. Ame nahanda okulilongesa Ombimbiliya.” Elao liatyo, naame ankho netyivila okuyunga onyengo yange! Andyipandula unene, atuhimbika okulilongesa Ombimbiliya nae.

Tyimwe tyihahambukiswa, ovanyingi mombunga yange vakalele omuvo umwe otyo vehelilongesa Ombimbiliya. Moluotyo, ame andyitualako netokolo liange liokulilongesa iya hihande natyike tyindingisise okukondoka konyima. Ankho ndyityii okuti okuliwaneka apeho novanthu va Huku matyinkhuatesako okukala nawa iya mandyivasi ombunga ame nesukisa. Andyitualako okukula motyili iya mo 1991 andyimbatisalwa andyikala Ombangi ya Jeova.

OUWA PATYI NAPOLA-KO:

Ame ankho ndyimukalavi iya tupu ndyindigavivi. Mahi Ondaka ya Huku oyo yapilulula omuenyo wange auho. Pahe ndyipopila ovanthu ondaka ya Huku, ovanthu aveho nahanda veinoñgonoke. Nakalele nelao liokuundapa movilinga vioukokoli-ndyila omanima 23.

Momuvo umwe, naundapele movilinga viokutunga onondyuo mbomaliongiyo mo filiale Yonombangi mba Jeova ko México. Oko, andyivasiko Claudia, omuhikuena umwe Omukristau una ombili movilinga via Huku iya atulinepe mo 1999. Ndyipandula unene Jeova wankhuatesako okuvasa omukai omukuatyili!

Tuaundapa kumwe mewaneno mupopiwa Elaka lio Nompholo ko México, okukuatesako onompholo okunoñgonoka Jeova. Konyima, atukongwa opo tuilukile ko Belize opo tukalongese ovanthu kotyilongo otyo. Namphila onkhalelo yetu pahe yapepuka, onthue tuna ovipuka aviho tuesukisa opo tukale nehambu. Onthue katuapumbilwe otyipuka natyike.

Etyi palamba omuvo umwe, me yange ahimbika okulilongesa Ombimbiliya iya ambatisalwa. Tupu, omukulu wange, nomukai wae, nomona wavo pahe Onombangi mba Jeova. Umwe pomapanga ange napopilile onondaka Mbouhamba pahe nae umbila Jeova.

Otyipuka otyikuavo tyinumanesa, vamwe mombunga yange vankhia mokonda kavapilulule onkhalelo yavo ombi. Inkha naame natuaileko nomuenyo ngoo, ñgeno pehepano nankhiale. Ame ndyipandula unene Jeova etyi ankhuatesako opo ndyikale omuumbili wae, wandongesa noumphua-lundo iya ame andyuundapesa onondonga mbo Mbimbiliya momuenyo wange.