OITYI MATYITUKUATESAKO OPO TUAHAYALE VAKUETU

2 | Wahakale Nonkhongo Namukuenyi?

Ombimbiliya Ipopia Okuti:

“Muhakondolelei nawike otyivi notyivi. . . . Inkha tyitavela, lingei atyiho muvila, opo mukale nombembwa novanthu aveho. Muhakondolelei vakuenyi ovivi, . . . tyetyi tyahonekwa okuti: ‘“Tyokukondolela ovanthu otyange; ame mandyikondolela ovanthu ovivi valinga,” otyo tyapopia Siovaa.’” — OVA LOMA 12:17-19.

Otyo Tyihangununa-tyi?

Namphila katyapengele okunumana tyina umwe ametulingi otyipuka tyinumanesa, Huku kahande tumukondolele otyivi etulinga. Mahi utupopila tumuyumbe onthumbi, mokonda oe vala makamanako ovivi aviho. — Salmo 37:7, 10.

Oityi Ove Upondola Okulinga?

Tyina ovanthu ovakuankhali vaovola okukondolela vakuavo ovivi, otyo tyieta vala oundyale. Ngotyo, ine pena omunthu wekulinga otyipuka otyivi, wehemukondolele. Likondola omutima otetulula otyitateka nombembwa. Pamwe etyi wesukisa vala okulinga okuehesuku notyivi walingwa, otundupo. (Provérbios 19:11) Mahi pamwe wesukisa umwe okupopia etyi tyaendapo. Mongeleka, ankho pena umwe wekulinga otyipuka otyivi unene, upondola okukemukesala kopulisa.

Okunumana unene tyinyona

Iya ine walinga umwe atyiho opo utetululele otyiateka otyo nombembwa mahi atyehetavela, molingi ñgeni? Nongotyo, wehemukondolele. Ankho umukondolela, matyivilisapo vala ovipuka. Linga ononkhono mbokulipola oundyale. Upondola okulilongesa okuyumba onthumbi monkhalelo Siovaa atetulula ovitateka. “Yumba onthumbi mu Siovaa, olingi otyiwa.” — Salmo 37:3-5.

Etyi Tyaendele na Umwe—ADRIÁN

Wetyivila Okuyekapo Okunumana Unene

Etyi ankho Adrián omukuendye, ankho unumana unene. Wapopia okuti: “Ankho pamwe tulwa nomauta iya alo umwe ovikando vimwe ndyipwila mohonde, pamwe andyikambela katutu okunkhila momatapalo.”

Adrián ahimbika okulilongesa Ombimbiliya etyi ankho ena omanima 16. Wapopia okuti: “Mokonda ankho ndyiete okuti ndyikahi nokukula motyili, ame andyiimbuka okuti nesukisa okupilulula ovituwa viange.” Adrián wesukisile okuyekapo oukalavi nokunumana. Haunene tyemukuatesako okuanoñgonoka etyi tyipopia Ova Loma 12:17-19, ipopia okuahakala nonyengo. Adrián wapopia okuti: “Ame andyitavela okuti Siovaa meketyifuisapo monkhalelo ahanda iya no momuvo watyo. Katutu-katutu andyityivili okuyekapo okulinga ovivi.”

Nthiki imwe kounthiki, Adrián avasiwa novakuendye vamwe onongangala ankho aenda navo kohale. Onkhalamutwe yavo aimupopila okuti: “Pahe liyakulila!” Adrián wati: “Nelitehelela okuti ndyina ononkhono pala okuvekondolela.” Mahi ehevekondolela, elikuambela vala ku Siovaa, atundupo.

Adrián tupu wapopia okuti: “Onthiki onkhuavo atulivasi nonkhalamutwe yonongangala. Otyipuka alinga tyanthyuvisile unene, etyi ambasa amphopila okuti: “Otyiponyo mokonda yetyi tyaendelepo mongulo kounthiki. Otyo otyili, ame nahandele ñgeno ndyikala ngove. Ame nahanda okulilongesa Ombimbiliya.” Elao liatyo, naame ankho netyivila okuyunga onyengo yange! Andyipandula unene, atuhimbika okulilongesa nae Ombimbiliya.”