Oñgeni Ombimbiliya Ipondola Okuviukisa Omuenyo Wange?

Ombimbiliya omukanda welikalela nomikuavo. Muna onondonga mbatunda ko Mutungi wetu. (2 Timóteo 3:16) Onondonga ombo mbupondola okutukuatesako unene. Ombimbiliya yatyi: “Ondaka ya Huku ina omuenyo nononkhono ononene.” (Hebreus 4:12) Ombimbiliya ina epondolo liokupilulula omuenyo wetu mononkhalelo onombali​—hono itukuatesako momuenyo wetu ononthiki ambuho iya tupu itukuatesako okunoñgonoka Huku nomilao viae.​—1 Timóteo 4:8; Tiago 4:8.

Itukuatesako momuenyo wetu hono. Ombimbiliya ipondola okutukuatesako mononkhalelo ononyingi mbomuenyo wetu. Ituavela onondonga ombu:

• Youpanga wetu navakuetu.​—Efésios 4:31, 32; 5:22, 25, 28, 33.

• Yekongoko tyilinge molutu iya no momalusoke.​—Salmo 37:8; Provérbios 17:22.

• Yovituwa oviwa.​—1 Coríntios 6:9, 10.

• Yokuundapesa nawa onombongo.​—Provérbios 10:4; 28:19; Efésios 4:28.a

Ovalinepi vamwe ko Asia vapanda unene onondonga mbo Mbimbiliya. Ngo valinepi ovakuavo, navo valinga ononkhono opo vetyiliye ovituwa via kese umwe iya alo umwe nokukala ovanthu vatomphola nawa ine hamwe okukala netompho pokati kavo. Iya vekahi nokuendela muetyi vekahi nokutanga mo Mbimbiliya. Otyo tyihole okueta-tyi? Omulume umwe utiwa Vicent wapopia okuti: “Etyi natanga Ombimbiliya tyankhuatesako okulinga omapiluluko motyinepo tyetu noluembia. Okulandula onondonga mbo Mbimbiliya tyetuavela ehambu momuenyo wetu.” Omukai wange Annalou, nae wapopia okuti: “Okutanga onongeleka mbo Mbimbiliya tyetukuatesako. Ame pahetyino ndyina ehambu motyinepo tyetu, tupu pahetyino tualinga onomphango momuenyo wetu.”

Ombimbiliya ipondola okukuatesako okunoñgonoka Huku. Tyihe matompho vala konthele yovalinepi, Vicent wapopia okuti: “Mokuatanga Ombimbiliya, pahetyino ndyilitehelela okuti ndyina oupanga omuwa na Jeova tyipona kohale.” Ovipuka Vicent amona waimbuka ovipuka viakolela, tupu Ombimbiliya ipondola okukukuatesako okunoñgonoka Huku. Okulinga ngotyo, kamatyikukuatesako vala okuvasa onondonga mbukukuatesako, mahi tupu momuñongonoka iya akala epanga liove. Motale okuti Ombimbiliya ipopia ovipuka oviwa konthele yetyi matyikamoneka komutwe wandyila, nomuvo mokakala nehambu iya “nomuenyo wotyotyili.” (1 Timóteo 6:19) Otyipuka tyimwe tuhapondola okuvasa momukanda omukuavo.

Inkha utanga Ombimbiliya, tualako okutyilinga, tupu mopoloko ouwa, maitukuatesako momuenyo wove pahetyino iya onoñgonoka vali nawa Huku. Mahi, mokonda ove ukahi nokutanga Ombimbiliya, pahe mokala nomapulo omanyingi. Tyina ulinga ngotyo, tualako okusoka ko ngeleka ongwa yomutumini omu Etiopia wakalele-ko omanima 2.000 konyima. Ankho una omapulo omanyingi konthele yo Mbimbiliya. Etyi vemupula inkha etyi atanga wetyinoñgonoka, akumbulula okuti: “Tyotyili, oñgeni mandyityivili, inkha petupu ou upondola okunkhuatesako?”b Iya moluotyo, atavela okukuateswako naumwe ankho wafuapo pala okumulongesa Ombimbiliya, Filipe wali omulongwa wa Jesus komanima okohale. (Atos 8:30, 31, 34) Tupu, inkha ove uhanda okunoñgonoka vali konthele Yombimbiliya, upondola okuitila mo internet, mo site www.jw.org. ine upondola okuhonekela Onombangi mba Jeova potyilongo popepi naapa ukala, ine honekela pomanyina ovilongo vili momukanda ou. Tupu upondola okuenda Mondyuo Yomaliongiyo popepi naapa ukala. Omokonda yatyi wahaitila Ombimbiliya hono iya maikukuatesako okukala nomuenyo omuwa?