Etyi Matyikukuatesa-ko Okunoñgonoka Ombimbiliya

Soka ñgeno wenda kotyilongo tyihe-tyenyi. Movasi-ko ovanthu uhei novituwa viavo uhei, nokulia, no nombongo ove uhei. Otyo tyipondola okukupuiya.

Tupu onthiki yo tete motange Ombimbiliya, tyipondola okukupuiya. Mokonda ukahi nokukondoka kouye wovanthu vo kohale ove uhei. Ipopia ovanthu vatiwa ova Filisteu, novituwa viovanthu uhei, ngo ‘kutandula ovikutu,’ nokulia kutiwa o manaa, no nombongo mbutiwa dracma. (Êxodo 16:31; Josué 13:2; 2 Samuel 3:31; Lucas 15:9) Upondola okunguanguana novipuka ovio aviho. Otyo tyikahi ngatyina uli motyilongo tyihe-tyenyi. Inkha umona omunthu ukukuatesako okunoñgonoka nawa ovipuka ovio, kumahambukwa?

EKUATESO KOHALE

Tunde etyi Ombimbiliya yahimbika okuhonekwa motyita 16 Puetyi Kristu Eheneye, ovanthu ankho vakuateswako opo veinoñgonoke. Mongeleka, Moisesi onkhalamutwe yo tete yelongo lio Isilayeli, ‘walingile ononkhono opo ahangunune’ etyi tyahonekwa-mo.​—Deuteronômio 1:5.

Kuakalele ovalongesi vafuapo vo Vihonekwa mokueenda kuomanima omanyingi. Mo 455 Puetyi Kristu Eheneye, ova Judeu ovanyingi kumwe novana, ankho veliongiya pomphangu imwe onene mepundaumbo lio Jelusalei. Iya ovalongesi vo Mbimbiliya, ‘avevetangela [omukanda oo wa Huku.’] Mahi, ankho kavatange vala. “Ankho vakuatesako ovanthu okunoñgonoka etyi tyikahi nokutangwa.”​—Neemias 8:1-8.

Etyi palamba omanima ovityita vitano, Jesus Kristu nae alingi ovilinga ovio viokulongesa. Ovanthu haunene ankho vemuihana okuti omulongesi. (João 13:13) Jesus ankho ulongesa ovanthu tyilinge ovanyingi, tyilinge omunthu wike. Otyikando tyimwe, Melongomona liae liankhimana unene lio Komphunda, walongesile ovanthu ovanyingi. Iya ‘ovanthu aveho avahuvu unene nonkhalelo yae yokulongesa.’ (Mateus 5:1, 2; 7:28) Pondyovo yenima lio 33 Pomuvo wa Kristu, Jesus walongesile ovalongwa vae vevali metapalo, puetyi ankho vaya no potyilongo tyimwe popepi no Jelusalei. Iya “evehangununina nawa [ine okuyandyulula nawa] Ovihonekwa.”​—Lucas 24:13-15, 27, 32.

Ovalongwa va Jesus navo ankho ovalongesi Vondaka ya Huku. Onthiki imwe, omutumini umwe wo ko Etiopia, ankho ukahi nokutanga Ombimbiliya. Omulongwa umwe utiwa Filipe, afuene pomulume oo, emupulu okuti: ‘Ukahi umwe nokunoñgonoka etyi ukahi nokutanga?’ Omu Etiopia akumbulula okuti: ‘Ndyityinoñgonoka ñgeni, tyina pehena ou undongesa?’ Iya Filipe emuhangununina onotestu ombo.​—Atos 8:27-35.

HONO UPONDOLA OKUKUATESWA-KO

Ngetyi ankho tyilinga ovalongesi Vombimbiliya kohale, hono Onombangi mba Jeova, vekahi movilinga viokulongesa ovanthu Ombimbiliya, movilongo 239 ouye auho. (Mateus 28:19, 20) Onosimano ambuho, vakuatesako onomiliau etyive mbovanthu okunoñgonoka Ombimbiliya. Ovanyingi povanthu ovo, ha-Vakristau-ko. Ondongeso oyo, kaifetelwa. Omunthu upondola okulongesilwa meumbo liae, ine o pomphangu muene ahanda. Vamwe alo umwe valongesilwa mo telefone ine omo komputadole no novidiu.

Mbambavo, ita Kombangi ya Jeova, opo ekupopile vali nawa, oñgeni upondola okupola ouwa kelongeso olio. Moimbuka okuti, katyipuiya okunoñgonoka Ombimbiliya. Tupu, Moimbuka okuti Ombimbiliya ina “esilivilo pala okulongesa, nokuviyula, nokuviukisa ovipuka, nokulonga nouviuki. Opo omunthu wa Huku akale tyafuapo nawa, nokuapongiyua nawa pala ovilinga aviho oviwa.”—2 Timóteo 3:16, 17.