Okuti Ombimbiliya Nkhele Ina Esilivilo Hono?

VAMWE VAPOPIA OKUTI ITUPU. O ndotolo imwe yapopia okuti okuundapesa Ombimbiliya pala okutuhongolela o ngatyina undapesa omukanda wo kohale wenima 1920 pala okulongesa konthele younongo wo mononthiki mbetu. Omunthu umwe wokuhetavela Ombimbiliya wapula okuti: Olie upondola okuundapesa omukanda wono komputadole mbo kohale mbehekua-le vali opo elilongesa okuundapesa onokomputadole onomphe? Kovanthu ovo, Ombimbiliya itupu vali esilivilo.

Mononthiki mbetu kuna ononkhalelo ononyingi tupondola okutambula omahongolelo. Mahi okuti nongotyo nkhele tyesukisa umwe vali okuundapesa Ombimbiliya ngwe omukanda wo kohale? Mo Internete hono tuvasa-mo omahongolelo omanyingi omape. Tyihe-otyo vala, mo Televisau mupopiwa ovipuka ovinyingi no nondotolo, no vokuatanga unene iya no vahoneki. Kese nima kukahi nokulingwa omikanda ominyingi vikahi nokulandeswa monovenda iya viyawisa konombongo mbo valandesi.

Nomahongolelo omape avahiwa mo nominutu mbehehi, omokonda yatyi ndyiundapesila Ombimbiliya omukanda wahonekua-le kohale opo unthyongolele? Okuti vana vokuhetavela ko Mbimbiliya vetupu ehunga liokuti, okuundapesa omahongolelo Ombimbiliya ongatyina undapesa omukanda wo komputadole yokohale, opo ulilongese okuundapesa onokomputadole mbo nonthiki mbetu, ine okuundapesa omukanda wounongo uhaundapeswa vali? Okusoka monkhalelo ngoyo tyapenga. Onkhalelo yokulongesa konthele younongo ipilauluka liwa-liwa, mahi okuti omasukalalo ovanthu nao apilauluka? Ovanthu nkhele vahanda okukala nomuenyo ukahi nawa, nehambu, nepamo, nomapanga ekahi nawa iya nombunga ina ehambu.

Namphila Ombimbiliya o yokohale, mahi nkhele ipopia konthele yomasukalalo oo novikuavo vali. Tupu yatumwa okuhonekwa nomutungi wetu. Ombimbiliya ituhongolela mononkhalelo ambuho mbomuenyo wetu, itukuatesako okutala ovitateka monkhalelo yaviuka. (2 Timóteo 3:16, 17) Onondonga mbo Mbimbiliya kambupu iya apeho mbutualako! Ombimbiliya yati: “Ondaka ya Huku ina omuenyo.”—Hebreus 4:12.

Okuti etyi Ombimbiliya ipopia otyili umwe? Okuti Ombimbiliya omukanda wo kohale uhena vali esilivilo, ine omukanda utulongesa oñgeni tuna okukala? Omutala ou Womulavi, o umwe po vio tete viakolela unene, vitukuatesako okuvasa omakumbululo omapulo oo.