Kuove Oityi Tyihangununa Ouhamba Wa Huku?

Alo apa, tuavasale ekumbululo liepulo liati: Oñgeni Tupondola Okunoñgonoka Huku? Tuatanga Mombimbiliya okuti, utiwa Siovaa, iya otyituwa tyae otyinene vali ohole. Tupu tuelilongesa ovipuka atunga, nevi makalingila ovanthu. Namphila upondola okunoñgonoka ovipuka ovinyingi konthele ya Huku, mahi upondola okulipula okuti: Oñgeni matyinkhuatesako?

Siovaa wapopia okuti, “inkha umuovola mayeke umuvase.” (1 Crônicas 28:9) Tyina ulinga ononkhono mbokunoñgonoka Siovaa, ove upondola okukala “epanga lya Siovaa”! (Salmo 25:14) Oityi Oupanga oo upondola okukuetela?

Ehambu enene. Ombimbiliya ipopia okuti Siovaa, o “Huku wehambu.” (1 Timotiu 1:11) Inkha ukala epanga lya Huku, oendela monondyila mbae, mokala nehambu limwe enene mononkhalelo ambuho. (Salmo 33:12) Tupu, ove mokala nomuenyo ukahi naawa, olityilika okukala novituwa vinyona olutu, iya okala noupanga wapama na vakuenyi. Motavela etyi omuhoneki wono salmu apopia etyi ati: “Kuame okufuena ku Huku otyiwa.” — Salmo 73:28.

Mekukuatesako. Siovaa wapopia okuti makuatesako vokumufenda, wati: “Mandyikuavela onondonga neiho liange litala kuove.” (Salmo 32:8) Siovaa kaavela vala ovipuka ovinyingi ovaumbili vae, mahi tupu waavela kese umwe otyipuka esukisa. (Salmo 139:1, 2) Inkha ulinga ononkhono mbokukala epanga lya Siovaa, mayeke ove umuvase iya ngwe makala ponthele yove apeho.

Omuenyo ukahi nawa komutwe wandyila. Huku mekukuatesako okukala nehambu pahetyino nomuenyo ukahi nawa. Tupu Siovaa Huku mekekuavela omuenyo ukahi vali nawa komutwe wandyila. (Isaías 48:17, 18) Ombimbiliya yati vana mavakamona “Omuenyo uhapu, vena okunoñgonoka ove Huku wike wotyotyili, nokunoñgonoka una ove watuma, Sesusi Kilisitu.” (Suau 17:3) Namphila tuvasiwa novitateka hono, mahi Huku utuavela ekevelelo lipondola okutukuatesako okutualako “tyapama.” — Ova Hebeleu 6:19.

Ombo ononthele mbumwe mbakolela unene, mbutuavela ondundo yokunoñgonoka vali nawa Huku iya nokupameka oupanga wetu nae. Opo ukuatesueko vali, popia no Nombangi mba Siovaa ine tala mo jw.org.