OSAPI YOKONDYE | OVE UPONDOLA OKUFUENA KU HUKU
Kutupu Vali Omuenyo Omuwa Ngou
Oityi upondola okulinga opo ufuene ku Huku? Tuapopia ononthele ononthatu mbupondola okukukuatesako okukala noupanga na Huku:
Okunoñgonoka enyina lia Huku Jeova nokulitumbula.
Okutomphola nae apeho momalikuambelo, nokulilongesa Ondaka yae, Ombimbiliya.
Okulinga apeho etyi tyihambukiswa Jeova
Fuena ku Huku mokutumbula enyina liae, mokulikuambela kwe, mokulilongesa Ondaka yae, nokulinga etyi tyimuhambukiswa
Okusoka kovipuka ovio, ove upondola okupopia okuti ukahi nokulinga etyi tyesukisa opo ufuene ku Huku? Okuti una apa wesukisa okuviukisa? Tyotyili, tyesukisa okulinga ononkhono, mahi tala etyi tyieta.
Jennifer wo ko Estados Unidos, wati: “Tyesukisa okulinga ononkhono ononene opo ukale noupanga omuwa na Huku, oupanga oo weta oviwa ovinyingi: Ukala vali nonthumbi mu Huku, unoñgonoka vali ovituwa viae, haunene ukala vali noluembia nae. Kutupu vali omuenyo omuwa ngoo!”
Inkha uhanda okukala noupanga omuwa na Huku, Onombangi mba Jeova mavekukuatesako. Vapondola okulilongesa nove Ombimbiliya otyali. Tupu wakongua opo wende Kondyuo Yomaliongiyo potyilongo tyenyi kuna mokavasa ovanthu vapameka oupanga wavo na Huku.a Inkha ulinga ngotyo, molitehelela ngo muhoneki wo Salmu wati: “Kuame okufuena ku Huku otyiwa.”—Salmo 73:28.
a Opo wiite okulongeswa Ombimbiliya ine okuvasa Ondyuo Yomaliongiyo popepi na apa ukala popia nomunthu wekuavela omukanda ou ine ovola mo site yetu www.jw.org. Pombuelo apa pati POPIA NONTHUE.