Undapesa Nawa Omuvo Wove Movilinga Viokuivisa
1 Tuna otyilinga otyinene movilinga viokuivisa, iya omuvo wahupako kauhi. (João 4:35; 1 Cor. 7:29) Inkha tuonganeka nawa ovilinga vietu, nokulipongiya nawa matuundapa nawa movilinga vietu viokuivisa.
2 Lipongiya Nawa: Tyina nkhele wehenende keliongiyo liovilinga viokuivisa, tala nawa inkha omikanda mokaundapesa wevityinda nokupongiya nawa etyi mokapopia. Tyina eliongiyo liamanuhuka nelikuambelo, viukilila mepia okukaivisa. Otyo matyikukuatesako okuundapesa vali nawa omuwo wove movilinga viokuivisa.
3 Inkha ove waholovonua opo ulinge eliongiyo liovilinga viokuivisa, himbika momuwo waitua. Linga eliongiyo tyahasete mono minutu 10 ine 15. Tyina wamayapaula ovanthu noñgonoka kese umue olie atunda nae napa mavakaundapa.
4 Tyina Ukahi Movilinga Viokuivisa: Tyina eliongiyo liovilinga viokuivisa liamapu, wahasale vali konyima ohena etyi ulinga tyesukisa, mahi himbika okuenda napana mokaundapa. Inkha ove una otyilinga iya mokondoka liwa keumbo, kondoka awike oyeke vakuenyi vatualeko novilinga viokuivisa. Tyina mukahi nokuundapa navakuenyi kala nesuko navakuenyi okupopia tyahasete opo vahakevele ehimbue. Otyo tyesukisa okukala nounongo wokulekela omunthu mukahi nokupopia nae ine okumulaa omuwo mamukondoka okukemutalelapo. —Mat. 10:11.
5 Tyina wenda okukatalelapo ovanthu, lityilika okuvepopila okuti ndyikahi nokuya tyina ukahi nokutalelapo vamue ponthele yo maumbo oo. Inkha tyesukisa upondola okutyilinga okutelefonalela kovanthu ovo okutehela inkha opo vekahi peumbo tyina nkhele weheneende. (Pro. 21:5) Inkha utyii okuti ou mokatalelapo mamukapopia ehimbue, vakuenyi mukahi nokuundapa navo vapondola okuivisa popepi ine omunthu oo ukemutalelapo onthiki onkhuavo.
6 Hono tukahi momuwo umue wovilinga ovinene viokuteya viopaspilitu. (Mat. 9:37, 38) Apa katutu ovilinga ovio mavipu. Moluotyo, tuundapesei nawa omuvo wetu movilinga viokuivisa.