Ouwa Tuvasa Tyina Tuundapa Notyikundyi Tyetu Tyovilinga Viokuivisa
1. Ouwa patyi ankho tuna Melilongeso Liomukanda hono utualako motyikundyi tyovilinga viokuivisa?
1 Okuti ove walimbuako ovipuka vimwe konthele Elilongeso Liomukanda? Otyikundyi ankho otyitutu tupu ankho ovanthu velityiliya. Ankho tyapepuka okulinga oupanga upameka. (Prov. 18:24) Omukulu wotyikundyi tyelilongeso liomukanda ankho wii nawa etyi tuesukisa nokukuatesako kese umwe. (Pro. 27:23; 1 Ped. 5:2, 3) Hono ouwa oo utualako motyikundyi tyovilinga viokuivisa.
2. Oñgeni tupondola okukala ovatete kokulinga oupanga upameka motyikundyi tyetu?
2 Kala Omutete: Otyikundyi tyovilinga viokuivisa tyilifwe notyeliongiyo liomukanda. Pokuundapa movilinga viokuivisa “kumwe” na vakuetu tyikuatesako okupameka oupanga. (Fil. 1:27) Ovanthu veñgapi motyikundyi tyove waundapale navo? Okuti upondola “okuhandyulako” vali? (2 Cor. 6:13) Tupu, pamwe tupondola okukonga vamwe veye Melilongeso Liombunga ine okulia navo. Momauaneno amwe, ovikundyi viovilinga viokuivisa vitambula ovaenda veya okulinga omalongomona. Tyina osimano yotyikundyi ihikapo, ovakuatate votyikundyi veliongiya opo valie kumwe nokulipameka alo umwe tyina omulongomoni ehepo.
3. Onomphitilo patyi mbumwe tuna pokutalelwapo motyikundyi tyetu tyokuivisa?
3 Namphila ewaneno pahe liliongiya vala tuvali mosimano otyo katyilekesa okuti ovaivisi pahe kavanthitwa vali. Omukulu waholovonwa opo ahongolele otyikundyi una okukuatesako kese umwe nokuvelongesa movilinga viokuivisa. Inkha ove umukulu waholovonwa wotyikundyi mahi wii umwe uheneundape nae, oityi uhemuitila opo undape nae? Tupu, omukulu wovilinga una okutalelapo ovikundyi vielikalaila konthyulilo yosimano kese hanyi. Momauaneno omatutu muhena ovikundyi ovinyingi upondola okutalelapo kese tyikundyi tuvali menima. Okuti ove ulinga ononkhono opo wende movilinga viokuivisa tyina otyikundyi tyitalelwapo?
4. (a) Oñgeni omaliongiyo okuivisa aonganekwa? (b) Omokonda yatyi tupondola okuava eumbo lietu opo likale omphangu yeliongiyo liovilinga viokuivisa?
4 Otyiwa kese tyikundyi tyiundape atyike konthyulilo ya kese simano. Tyina ovikundyi vieliyandyana potyilongo, tyikuatesako okuhika liwa pomphangu yeliongiyo liovilinga viokuivisa napana mavakaivisa. Ovaivisi vapondola okupewa liwa una maundapa nae nokuhimbika okuivisa tyihasete. Otyo tupu tyikuatesako omukulu wotyikundyi okukuatesako ovanthu votyikundyi tyae. Pamwe tyipondola okusukisa okuhonyeka ovikundyi vivali ine vilambapo. Inkha ewaneno liliongiya kumwe Motyasapalo tyotete mohanyi ine tyina eliongiyo Liomutala Womulavi liamapu, otyiwa kese otyikundyi tyiumphame kumwe iya omukulu wa kese tyikundyi aonganeka otyikundyi tyae mono minutu mbehehi tyina vehenelinge elikuambelo liokumanuhula Eliongiyo Liovilinga Viokuivisa.—Tala okakasa “Okuti Upondola Okuava Eumbo Liove?”
5. Namphila Elilongeso Liomukanda Mewaneno liamanuhuka, onthumbi patyi tupondola okukala naayo?
5 Namphila Elilongeso Liomukanda Mewaneno liamanuhuka, Jeova utualako okutuavela atyiho tuesukisa opo tulinge ehando liae. (Heb. 13:20, 21) Jeova utuavela etyi tuhena (Sal. 23:1) Tupewa ononkhano ononyingi onongwa motyikundyi tyovilinga viokuivisa. Inkha tukala ovatete “okukuna unene tupu matukateya unene.”—2 Cor. 9:6.
[Olutalatu pefo 6]
Okuti Upondola Okuava Eumbo Liove?
Omawaneno amwe ahonyeka ovikundyi viovilinga viokuivisa konthyulilo yosimano mokonda vetupu onondyuo mbutuuka pala okuliongiya. Omaliongiyo ovilinga viokuivisa esukisa okulingilwa ponomphangu mbelikalaila mewaneno, ngotyo okuava eumbo lietu elao limwe enene. Okuti nove upondola okuava eumbo liove? Uhelikondole okusoka okuti eumbo liove liahepa. Ovakulu vewaneno mavatale ovipuka ovikuavo viesukisa ngetyi ankho valinga tyina vaholovona eumbo opo likale omphangu yelilongeso liomukanda. Inkha uhanda okuava eumbo liove, tyipopila omukulu wotyikundyi tyenyi.