Putyina Mukahi Movilinga Viokuivisa Lipamekei Kese Umue na Mukuenyi
1 Atuho tutyihole tyina tupewa ondundo nondaka ‘yapopiwa momuvo watyo.’ (Pro. 25:11) Tyina tuundapa navakuetu movilinga viokuivisa, oñgeni tupondola okukala nonthumbi yokuti etompho lietu likahi nokupameka vakuetu?
2 Etompho Lipameka: Putyina tukahi movilinga viokuivisa, tyakolela unene okutomphola novakuatate vetu no nomphange, ovipuka vitukuatesako okupameka oupanga wetu na Jeova. (Sal. 37:30) Tupondola okutomphola konthele yetyi matukapopia novanthu, ine okuhipulula ongeleka imue ongwa ipameka tuapita nayo movilinga viokuivisa. (Atos 15:3) Okuti tuelilongesa onthele imue yakolela pokutanga Ombimbiliya, nomikanda omikuavo, ine meliongiyo liewaneno? Tupondola okupopia ononthele mbumue mbapopiwa melongomona tuatehelela Mondyuo Yomaliongiyo.
3 Tupondola okukala tyasoya tyina omunthu umue etulinga epulo limue tuhetyivili okukumbulula. Mahi, okupopia onominutu mbehehi nomukuatate tukahi nokuundapa nae tyina tutunda meumbo olio, matyitukuatesako unene. Upondola okumupula oñgeni mokumbulula inkha pamoneka vali umue ukulinga epulo ngo olio komutue wandyila. Upondola okutala momukanda Raciocínios. Inkha omukuatate ine omphange tukahi nokuundapa nae movilinga viokuivisa alinga elekeso limue tuapanda, okumupandula nomutima auho, matyimuavela ondundo.
4 Tetekela okukonga vakuenyi: Okuti melilongeso liomukanda mewaneno muna omukuatate umue weheneundape nae movilinga viokuivisa? Okukapopia nae opo muundape kumue movilinga viokuivisa, matyimukuatesako ‘okulipameka pokati.’ (Rom. 1:12) Ovakokoli-ndyila vokuapola pokati, novakokoli-ndyila, vahambukwa unene tyina pena ovaivisi mavaundapa navo. Haunene kokamuhuka ine okekumbi, tyina pehena ovaivisi ovanyingi pala okuenda movilinga viokuivisa. Tukuatesako ovakokoli-ndyila tyina tuenda navo movilinga viokuivisa. Okuti pena omuivisi umue una ouvela umutyilika okuundapa unene movilinga viokuivisa? Okumukonga opo muende nae movilinga viokuivisa, pamue okukalongesa Ombimbiliya omulongwa, tyipondola okuvatela ove muene namukuenyi wakonga.—Pro. 27:17.
5 Tyipameka unene okupanda vakuetu apeho, alo umue movipuka ovitutu. Tusokei ngotyo tyina tuundapa navakuetu movilinga viokuivisa, mokonda tuhanda ‘okutualako . . . okulipameka pokati navakuetu.’—1 Tes. 5:11.