Kala Omuvateli Omuwa Tyina Muivisa Umbo na Umbo
1. Ouwa patyi tupolako tyina tuundapa nomuivisi mukuetu movilinga viokuivisa?
1 Etyi Jesus atuma ovalongwa vae 70 pala okukaivisa, oe “wevetuma vevali-vevali komutwe wae.” (Luc. 10:1) Tyotyili, epongiyo olio liayekele ovalongwa vae opo velikuateseko nokulipameka kese umwe na mukuavo putyina vaivisa. Tyina tuundapa nomuivisi mukuetu movilinga viokuivisa, oñgeni tupondola okulikuatesako?
2. Tyina mukuenyi ekahi nokupopia nomunthu, oñgeni iya omokonda yatyi otyiwa okutehelela?
2 Mokutehelela Nawa: Tehelela nawa tyina mukuenyi ekahi nokupopia nomuthu. (Tia. 1:19) Inkha ekahi nokutanga otestu, landula Mombimbiliya yove. Tala komunthu ukahi nokupopia, tyilinge mukuenyi ine omuene weumbo. Inkha ove utehelela nawa etompho, otyo tyipondola okuavela ondundo muene weumbo opo nae atehelele.
3. Onalupi mukuetu apondola okupopia tyina tuava oumbangi?
3 Mokusoka Kuetyi Mukuenyi Ekahi Nokupopia: Tyina mukuetu ekahi nokupopia nomunthu, onthue tumulekesa onthilo inkha tumuyeka atualeko nokupopia. (Rom. 12:10) Tuesukisa okulityilika okumuteta ondaka. Inkha walimbuako etyi ankho ahanda okupopia ine muene weumbo walinga epulo iya mukuetu aiti ombatelo, onthue tulinga ononkhono opo tuyawise kuetyi apopia atuhahimbika okupopia osapi onkhuavo. (Prov. 16:23; Ecl. 3:1, 7) Inkha tupopia, onondaka mbetu mambuvatela unene oumbangi ukahi nokuawa.—1 Cor. 14:8.
4. Oityi matyituavela ehambu movilinga vietu viokuivisa?
4 Etyi ovalongwa 70 vamanuhula okuivisa “vakondokele nehambu.” (Luc. 10:17) Tupu, nonthue matuhambukwa unene movilinga viokuivisa inkha tutehelela, nokusoka kuetyi mukuetu ekahi nokupopia, natyina tuvatela vana tukahi navo movilinga viokuivisa umbo na umbo.