Oñgeni Tupondola Okuvatela Ovanthu Veile Kehinangelo Liononkhia Mba Tatekulu?
1. Monthiki 22 ya Tyitalale, yo 2008 ovanthu mavakapewa Oumbangi patyi?
1 Monthiki 22 ya Tyitalale, yo 2008, ovanthu ovanyingi mouye auho mavatambula oumbangi umue omunene. Vana mavakala Pehinangelo Liononkhia mba Tatekulu, mavatehelela konthele yohole onene ya Jeova mokuaava ofeto yeyovo pala ovanthu aveho. (João 3:16) Ovo mavelilongesa konthele Youhamba no ñgeni Jeova maundapesa Ouhamba oo, opo afuisepo ehando liae pala ovanthu aveho kombanda yoohi. (Mat. 6:9, 10) Ovo mavelitalelako muene ohole nehonyeno likahi pokati kovanthu va Huku, nokutala otyali tyetu nokuliepesa ovanthu.—Sal. 133:1.
2. Oñgeni tupondola okuvatela ovalongwa Vombimbiliya vokueya Pehinangelo?
2 Ovalongwa Vombimbiliya: Vamue mavakala pehinangelo ovovana vahimbikale okulilongesa Ombimbiliya nonthue. Velekesa kovakuatate nonomphange. Vetolela konthele yomaliongiyo a kese simano, nokuvelekesa Ondyuo Yomaliongiyo. Mokueenda kuelongomona, omulongomoni maavela ondundo ovalongwa ovo Vombimbiliya opo vatualeko okukula mopaspilitu. Upondola okuundapesa onondaka mbapopiwa nomulongomoni opo wavele ondundo ovalongwa vove.
3. Oñgeni matuavela ondundo ovaivisi vayekapo ovilinga viokuivisa mahi veya Kehinangelo?
3 Ovaivisi Vayekapo Ovilinga: Vamue vokueya Pehinangelo, ovaivisi vayekapo ovilinga viokuivisa. Linga ononkhono pala okuvekukunya nohole. Lityilika okulinga omapulo wahatokalele okunoñgonoka ine okupopia ovipuka vipondola okuvekalesa nohonyi. Putyina Ehinangelo liamalambe, ovakulu vewaneno vesukisa okukatalelapo ovaivisi aveho vokuayekapo ovilinga viokuivisa, navakuavo vali veile kehinangelo olio, okuvepanda mokonda yononkhono valinga opo vakale pehinangelo, nokuvekonga opo veye komaliongiyo omakuavo.
4. Oñgeni kese umue puonthue apondola okuvatela ovaenda?
4 Ovaenda: Vamue vokueya Pehinangelo hamue ovovana tuii ine onombunga mbetu tuakonga. Ovakuavo hamue vatambula okamukanda kokukonga mokueenda kovilinga viokuivisa. Inkha wamona ovanthu vamue wahaimbukile, enda ukeveliepese nokuvetolela enyina liove. Tyipondola ovo hamue kavenekale pomaliongiyo etu. Metompho lienyi, ove hamue upondola okunoñgonoka opi vakala noñgeni mokeveovola. Putyina ehinangelo liamalambe, kevetalelepo ine okuvetelefonalela, oveavela ondundo opo velilongese vali konthele ya Jeova na Jesus. Vetolela okuti ove upondola okuvelongesa Ombimbiliya.
5. Oityi tupondola okupopia opo tutyivile okuhimbika okulongesa ovanthu Ombimbiliya?
5 Tyina ukatalelapo omunthu ankho ukahi Pehinangelo, upondola okuundapesa onondaka mbapopiwa melongomona pehinangelo olio, pala okulekesa omukanda Oityi Ombimbiliya Tyili Ilongesa. Mongeleka, omulongomoni Pehinangelo, matange Isaías 65:21-23. Putyina wenda okukatalelapo omunthu, upondola okupopia etyi tyapopiwa melongomona iya opopi okuti, ‘Yeka ndyikulekese ononkhano ononkhuavo onongwa matukamona mokonda yofeto yeyovo.’ Iya otange nae momukanda Ombimbiliya Ilongesa pomafo 4-5. Ine upondola okupopia okuti, ‘Ovanyingi vapula onalupi eulo lia Isaia malifuiswapo.’ Konyima otange okapitulu 9, pomafo 1-3. Onkhalelo onkhuavo yokuhimbika okulongesa Ombimbiliya, okupitulula etyi omulongomoni apopia iya olekesa omukanda Ombimbiliya Ilongesa, nokulekesa oñgeni tulilongesa novanthu Ombimbiliya.
6. Oityi tuna okuovola okulinga putyina tutavela otyitumino tya Jesus tyokuhinangela ononkhia mbae?
6 Kese umue puonthue, aovole omuwo pala okukuatesako ovalongwa Vombimbiliya, novaivisi vayekapo ovilinga viokuivisa, novaenda ankho vekahi Pehinangelo Liononkhia mba Tatekulu. (Luc. 22:19) Tyotyili, Jeova maavela ononkhano onongwa atyiho tulinga movilinga viokuivisa Ouhamba Wae.