Makupewa Oumbangi Umwe Omunene
1. Okuyawisa kelongomona, oityi vali tyipondola okuhuvisa vana veya Pehinangelo? Hangununa.
1 Onalupi? Monthiki Yehinangelo Liononkhia mba Tatekulu. Ngotyo, tulingei ononkhono opo tukonge ovanthu veye Kehinangelo. Etyi ovanthu mavatehelela hatyipuka vala matyivehuvisa. Konyima Yehinangelo, omukai umwe wapopia etyi amona konthele—youpanga ovanthu vena kese umwe namukuavo, nouwa, nomphangu yasukuka nawa yatungwa novanthu veliava. Ngotyo, hamulongomoni vala, mahi atuho, tuundapei opo tuave oumbangi monthiki oyo yakolela unene yenima.—Efé. 4:16.
2. Oñgeni kese umwe puonthue apondola okuava oumbangi ovanthu veya Kehinangelo?
2 Kukwinya Nohole Ovaenda: Okukukwinya nehambu ovaenda matyiave oumbangi. (João 13:35) Namphila kumetyivili okupopia novanthu aveho, nkhele upondola okupopia nehambu enyina liove komunthu upumphi ponthele yove. (Heb. 13:1, 2) Ovola ovanthu ulwete okuti kavei nawike. Tupu ovo vakongwa movilinga viokuava okamukanda kokukonga. Upondola okupula okuti, “Etyi otyikando tyotete weya pano?” Veihana opo vaumphame nove, nokuvepopila okuti upondola okukumbulula omapulo vena. Inkha ewaneno liove lina okutunda liwa opo ewaneno ekuavo liundapese omphangu, upondola okupopia okuti: “Ame nahanda okunoñgonoka etyi wasoka konthele yeliongiyo eli. Oñgeni ndyipondola okukuvasa?”
3. Oñgeni matuliepesa vana vayekapo okuivisa?
3 Liepesa Vana Vayekapo Okuivisa: Tyotyili, ovaivisi vayekapo okuivisa mavakalapo, okukutikinyamo vana veya vala kewaneno monthiki Yehinangelo. Veliepesa, opo vanoñgonoke okuti ove wahambukua mokonda yetyi wevemona. (Rom. 15:7) Konyima, ovakulu vewaneno vapondola okuenda komaumbo avo veveavele ondundo opo vatualeko okuliwaneka newaneno. Tukahi nokulikuambela opo ovanthu ovanyingi valundwe okunkhimaneka Huku hamokonda vala yetyi mavatehelela mahi tupu omokonda ‘yovituwa vietu oviwa veete.’—1 Ped. 2:12.