“Lekesei Olupandu”
1 Puetyi Jesus avelula ovalume ekwi ankho vena otyilundu, wike vala wakondokele pala okumupandula. Jesus wapula okuti: “Havelulile ovanthu ekwi? Ovakuavo etyive, vekahipi?” (Luc. 17:11-19) Tyakolela unene kuonthue okupandula mokonda yovipuka aviho oviwa tupewa na Tate yetu Jeova Huku, wokuna oluembia notyali!—Col. 3:15; Tia. 1:17.
2 Ovipuka patyi vimue tuna okupandula? Onthue tupandula ofeto yavilapo yeyovo Huku aava pala ovanthu aveho. (João 3:16) Tupu tupandula Jeova mokonda youpanga tualinga nae. (João 6:44) Ehunga ekuavo tuna pala okupandula Jeova, ehonyeko tuna novakuatate vetu mouye auho. (Sal. 133:1-3) Tyotyili, ove upondola okusoka kovipuka ovikuavo ovinyingi Jeova etuavela. Onthue katuhande okukala ngova Isilaeli vahapandulile, valimbwako ovipuka aviho Jeova alingile.—Sal. 106:12, 13.
3 Lekesa Olupandu: Namphila hamue ovalume aveho ekwi ankho vokuna otyilundu vahambukilwe mokonda yetyi Jesus evelingile, mahi wike vala weile okupandula. (Luc. 17:15) Tupu, nonthue tulekesa olupandu tyina tuundapa nombili movilinga viokuivisa. Tyotyili, inkha tupandula ovipuka aviho Tate yetu woluembia ekahi nokulinga, omitima vietu mavitulundu okuhetekela oluembia luae, nokupopila vakuetu konthele yae. (Luc. 6:45) Putyina tupopila vakuetu konthele ‘yovilinga oviwa via Jeova, nomalusoke ena pala onthue,’ ohole yetu nolupandu tuna na Jeova maviliyawisa.—Sal. 40:5.
4 Kuatesako Vakuenyi Okulekesa Olupandu: Tuna okuovola ononkhalelo ambuho pala okukuatesako ovana vetu, novalongwa Vombimbiliya, opo navo valekese olupandu. Ovohe vena onomphitilo ononyingi mbokutyilinga, haunene tyina vatala novana vavo ovipuka Huku atunga. (Rom. 1:20) Putyina tukahi nokulongesa Ombimbiliya, tupondola okupula ovalongwa vetu okuti: “Otyo tyitulongesa tyi konthele ya Jeova?” Tyina enoñgonoko liomulongwa liliyawisa, tupu, nohole yae na Jeova netokolo liokumufenda, maviliyawisa.
5 Mokueenda kuononthiki mbuno mbahulililako, ovanyingi kavapandula. (2 Tim. 3:1, 2) Jeova uhambukwa unene tyina ovaumbili vae valekesa olupandu, mokuundapa nombili movilinga viokuivisa!—Tiago 1:22-25.