Tulekesei Olupandu Luetu Ehinangelo Malilingwa mu 17 ya Tyikukutu
1. Mokueenda Kuehinangelo liononkhia mba Tatekulu olusoke patyi luomuhoneki wono salmu tuesukisa okukala nalo?
1 Mokuapandula onkhalelo ya Jeova yokuyovola, omuhoneki wono salmu wapula okuti: “Oityi mandyifete okukondolela Jeova, mokonda yovipuka aviho oviwa andingila?” (Sal. 116:12) Hono, ovaumbili va Huku vena omahunga omanyingi okupandula. Etyi onondaka ombo mbahonekwa, palamba omanima omanyingi, iya Jeova waavela ovanthu otyiawa otyinene—ofeto yeyovo. Putyina tulipongiya pala okuhinangela ononkhia mba Kristu mu 17 ya Tyikukutu, tuna omahunga omanyingi okulekesa olupandu.—Col. 3:15.
2. Omahunga patyi tuna okupandula ofeto yeyovo?
2 Ononkhano Onongwa Tupewa Mokonda Yofeto Yeyovo: Mokonda yofeto yeyovo, “tuevelwa ononkhali mbetu.” (Col. 1:13, 14) Otyo tyituvatela okufenda Jeova nomutima wasukuka. (Heb. 9:13, 14) Tupondola okupopia na Jeova noukuatyili tyina tulikuambela kwe. (Heb. 4:14-16) Aveho vakala nekolelo mofeto yeyovo vena ekevelelo enene liomuenyo wahapu!—João 3:16.
3. Oñgeni tupondola okulekesa olupandu luetu ku Jeova mokonda yofeto yeyovo?
3 Oñgeni Matulekesa Olupandu Luetu: Onkhalelo imwe yokulekesa olupandu okutanga kese nthiki onotestu Mbehinangelo Liononkhia Mba Tatekulu nokusokolola konotestu ombo. O Sentinela 1 ya Fevereiro yo 2011, muna onthele yati “Você está preparado para o dia mais importante do ano?” yapongiyua pala okutuvatela okulinga ngotyo. Tupu tupondola okutolela Jeova melikuambelo okuti tupanda unene ofeto yeyovo. (1 Tes. 5:17, 18) Tyina tutavela otyitumino tya Jesus atukala Pehinangelo, tulekesa olupandu. (1 Cor. 11:24, 25) Tupu, tuhetekela ohole onene ya Jeova tyina tukongo ovanthu veliongiye nonthue.—Isa. 55:1-3.
4. Oityi tuna okutokola?
4 Ovaumbili va Jeova kavatale Ehinangelo ngatyina eliongiyo vala ekuavo. Olio eliongiyo liakolela vali menima! Putyina Ehinangelo likahi popepi, tutokolei ngo muhoneki wono salmu wahoneka okuti: “Hande yange, hilivika Jeova, iya uhalimbueko ovilinga viove aviho.”—Sal. 103:2.