Ungumanesa Ononthyiwe
1. Omokonda yatyi ononthyiwe vesukisa okuungumaneswa?
1 Okunkhisa omunthu tuhole unene, tyiihama unene komutima, haunene pala vana vehena ekevelelo liomuenyo Mouhamba wa Huku. (1 Tes. 4:13) Ovanyingi pamue velipula okuti: ‘Omokonda yatyi ovanthu vankhila ? Tyina vamankhi vaya napi? Okuti nthiki imue mandyikamona vali omunthu una ndyihole wokuankhia?’ Pombuelo pena onondonga mbumue pala okuungumanesa vana tuvasa movilinga viokuivisa, vekahi nokulila ombunga, ine epanga wokuankhia.—Isa. 61:2.
2. Inkha omunthu ututolela okuti ukahi nokulila wae wankhia, okuti tyaviuka okupopia ehimbue nae okumuavela oumbangi?
2 Tyina Tuivisa Umbo Naumbo: Omunthu tuvasa hamue ututolela okuti pena umue wankhia mombunga yae. Okuti ukahi nokulila? Eumbo lieyula onombunga vekahi nokulila? Ngotyo, inkha tuhanda okuava oumbangi peumbo olio tuahapopie ehimbwe. (Ecl. 3:1, 7) Pamue tupondola okupopia oñgeni onthue tuliivite, atumuavela otratadu ipopia konthele yononkhia, omutala womulavi, no despertai ine ombrochula nokulekela nonondunge. Iya atukondoka vali monthiki onkhuavo opo tumupameke Nombimbiliya.
3. Inkha pena omuvo, onotestu patyi upondola okutanga nomunthu uvasa, ukahi nokulila?
3 Mononthiki ononkhuavo, hamue tutala okuti tupondola okupopia vali unene tyina tukatalelapo ovanthu otyikando tyotete. Namphila oo hamuvo pala okukembulula omalusoke omavi, mahi tupondola okutanga navo omilao Viombimbiliya konthele yetutilo. (João 5:28, 29) Ine tupondola okuvelekesa etyi Ombimbiliya ipopia konthele yavana vokuankhia. (Ecl. 9:5, 10) Tupu omahipululo Ombimbiliya apopia konthele yetutilo apondola okuveavela epameko. (João 11:39-44) Nkhele upondola okutanga onondaka mbapopiwa na Job konthele yekevelelo ankho ena mu Jeova. (Jó 14:14, 15) Putyina nkhele tuhenetundepo, tupondola okuava onombrochula Que Acontece Conosco Quando Morremos?, Quando Morre Alguém Que Amamos, ine ombrochula onkhuavo notratadu ipopia konthele yononkhia. Ine tupondola okusapo omukanda Ombimbiliya Ilongesa, atulekesa okapitulu 6, iya atulae okuti matuya okupopia vali kombinga yonthele ei tyina tuamakondoka.
4. Onomphitilo patyi ononkhuavo tuna pala okuungumanesa ovanthu vasiwapo?
4 Mononthiki Ononkhuavo: Inkha elongomona liokukapaka otyivimbi malilingilwa Mondyuo Yomaliongiyo, okuti ovanthu vehe Nombangi mba Jeova mavakalapo? Otyiwa tukale apeho nomikanda viavela ovanthu ovo eungumaneso. Monondyuo mbumue muna omutambo, ovanthu vehole okukala nomikanda pala okuungumanesa onombunga. Pamue, omaiviso omunthu wokuankhia amoneka mo jornale, iya otyo tyiikula ondyila pala okuhonekela okamukanda ko kuungumanesa onombunga mbasiwapo. Otyo tyapitile nomusa-lume umue nomona wae omuhikuena, konyima yokutambula omukanda notratadu ankho ikahi mokati komukanda, ovo vaile kondyuo yomuivisi iya apulu okuti: ‘Onue muanthumikisa omukanda ou? Ame nahanda okunoñgonoka vali konthele Yombimbiliya!’ Omulume oo nomona wae, vetavela okulilongesa Ombimbiliya, avahimbika okuenda komaliongiyo aeho omewaneno.
5. Omokonda yatyi tuna okuovola onomphitilo pala okupameka vana valila?
5 Eclesiastes 7:2 yati: ‘Hahe vali okuenda meumbo muna omutambo, tyipona okuenda meumbo muna otyipito.’ Vana vekahi nokulila omunthu onthyolwa wankhia, vafuapo vali pala okutehelela Ondaka ya Huku tyipona vana vasuka vala novipito. Atuho tuna okutala nawa opo tuimbuke onomphitilo onongwa pala okupameka vana valila onombunga mbavo ine omapanga vokuankhia.