‘Lipakei Mokanga Yange’
1 Mouye muno mueyula omahongaiyo, notyiho, onthue tuna eyovo liotyotyili mokonda tuatavela okukongwa pala okuvasa epameko Jesus ekahi nokuavela kovanthu. (Mat. 11:29, 30) Okutavela okanga yokulinga ovalongwa, kamukutikinya vala ovilinga vipwilisa, mahi tupu muakutikinya ovilinga vipameka. Okutavela okanga ya Jesus muakutikinya okuivisa onondaka onongwa Mbouhamba, nokukuatesako vakuetu opo vavase epameko kumue nonthue mombuelo yokanga ya Jesus.—Mat. 24:14; 28:19, 20.
2 Ovilinga Viokuivisa Vipameka: Jesus kaitile ovalanduli vae vayawise omutyindo wae komutyindo ankho venale. Jesus, weveita vayekepo omutyindo wavo walema opo vakale nomutyindo wae wapepuka. Katualemenenue vali nomasukalalo ouye uno, tupu katuundapela omalumono ehetuavela ombembwa. (Luc. 21:34; 1 Tim. 6:17) Namphila tuna okuundapa pala okukala novipuka tuesukisa kese nthiki, nokulinga vali ovipuka ovikuavo, tupakei tete momuenyo wetu Ouhamba wa Huku. (Mat. 6:33) Inkha tutualako okukala nolusoke luaviuka konthele yovipuka viakolela vali, matutale apeho okuti ovilinga viokuivisa kavileme, mahi vipameka.—Fil. 1:10.
3 Tyotyili onthue tuna ehambu liokupopia konthele ya atyiho tuhole tyikahi momutima wetu. (Luc. 6:45) Ovakristau aveho vapanda Jeova, nononkhano onongwa Mbouhamba Jeova alaa. Moluotyo, tyitupameka unene okupopia konthele “yonondaka onongwa mbovipuka oviwa,” nokusapo konyima omasukalalo a kese nthiki tyina tuundapa movilinga viokuivisa! (Rom. 10:15) Tyotyili, tyina tulinga apeho otyipuka tyimue, tukala vali ovanongo, nokukala vali nehambu enene. Ngotyo, okuundapa vali unene movilinga viokuivisa, matyitupameka. Tyotyili, tyipameka unene tyina ovanthu vetavela ondaka tukahi nokuivisa! (Atos 15:3) Na tyina tuvasa ovanthu vehetavela ine oundyale, ovilinga vietu mavituetela epameko mopaspilitu inkha tusoka okuti ononkhono mbetu mbuhambukiswa Jeova. Iya ononkhano onongwa mba Jeova mbupondola okutuvatela okuvasa ovanthu vafuapo pala okutehelela.—Atos 5:41; 1 Cor. 3:9.
4 Mokonda yokutavela ku Jesus, tuna elao enene liokuundapa kumue nae ngo Nombangi mba Jeova. (Isa. 43:10; Revelação [Apocalipse] 1:5) Natyike tyipondola okutuavela vali epameko tyipona otyo!