Ovilinga Viokuivisa Pala Okuava Otratadu Mavihimbika mo 20 ya Kulindi Alo mo 16 ya Kuhuhu!
1 Okupolelela Motyasikunda, mo 20 ya Kulindi, alo mo 16 ya Kuhuhu, matuundapa movilinga viokuivisa pala okuava otratadu omphe ina osapi yati Okuti Ove Uhanda Okunoñgonoka Otyili? Tukevelela otratadu oyo maiyandyaneswa ouye auho, iyawise esuko liovanthu ovanyingi liokunoñgonoka otyili.—João 17:17.
2 Otratadu ikumbulula omapulo epandu akolela Ombimbiliya: “Okuti Huku tyotyili wasuka umue nonthue”? “Okuti onthiki imue ovita, nononkhumbi mavikapwako umue”? “Oityi tyipita nonthue tyina tuankhia”? “Okuti vokuankhia vena ekevelelo”? “Oñgeni mandyilikuambela opo Huku anthehelele”? iya “Oñgeni mandyivasi ombembwa momuenyo”? Onongeleya mbo Vakristau Vomouye, nalumue mavaave omakumbululo ahambukiswa konthele yomapulo oo. Alo umue vana vehe Vakristau vehole okusoka komapulo oo, mahi, kavetyii okuti omakumbululo avasiwa Mombimbiliya. Tukevelela ovanthu ovanyingi vatehelele onondaka ombo.
3 Undapa Otelitoliu Yove Aiho: Inkha tyitavela, linga ononkhono opo uundape pomaumbo aeho otelitoliu yove. Inkha otelitoliu yove onene, ovakulu vewaneno mavekuavela ondundo opo usepo otratadu pomaumbo ana wahavasile nawike. Wahalimbueko okuavela otratadu o omunthele yove, ombunga, vana uundapa navo ine ulilongesa navo kosikola, novanthu ovakuavo. Hamue upondola okusoka okuundapa ngomukokoli-ndyila wapola pokati, mu Kulindi, na Kuhuhu. Okuti una omona ine omulongwa wo Mbimbiliya ukahi nokuenda nawa motyili, iya wafuapo pala okuundapa movilinga ovio ngomuivisi uhenembatisalwe? Inkha una, tyipopila ovakulu vewaneno.
4 Oityi Matupopi: Tuhapopiei unene, opo tutyivile okupopia novanthu ovanyingi. Tyina wavasa ovanthu, velinga vala epulo like pomapulo ekahi pefo liotete yotratadu, iya ovelekesa ekumbululo likahi motratadu. Otyo, matyivatela ovaivisi aveho opo valinge omalekeso elikuata nomasuka opo telitoliu. Inkha omunthu umue alekesa esuko, honeka enyina liae, napa akala, iya okondoka okukemutalelapo. Movityasapalo, novityalumingu, matuave omikanda omipe tuna mewaneno kumue notratadu. Tyina tuamamane okuava o tratadu mo 16 ya Kuhuhu, matuave omukanda Ombimbiliya Ilongesa. Inkha pesala onotratadu, mbuundapesei ngetyi muhole okulinga no notratadu ononkhuavo.
5 Himbika Okulongesa Omunthu Ombimbiliya: Otratadu ei, yapongiyua haunene pala okutuvatela okuhimbika okulilongesa novanthu Ombimbiliya. Tyina wamakondoka okukatalelapo omunthu walekesa esuko, upondola okumupula otyili patyi tyo Mbimbiliya tyemuavela epameko? Mulekesa pefo liahulililako yo tratadu, palekesa oñgeni onthue tulilongesa novanthu Ombimbiliya, iya omuavela omukanda Ombimbiliya Ilongesa. Inkha tyitavela, tanga nae opalagrafu ike ine onombali mokapitulu ipopia konthele yetyi aholovona.
6 Jeova ukahi nokuovola vana mavemufende “nospilitu, notyili.” (João 4:23) Atuho onthue tuundapei movilinga ovio opo tukuateseko vakuetu okunoñgonoka otyili!