Ove Upondola Okuhimbika Okulongesa Ovanthu Ombimbiliya Mokueenda Kuohanyi ya Kulindi?

1. Oityi matuave mohanyi ya Kulindi?

¹ Mohanyi ya Kulindi, matuave Omutala Womulavi no Despertai! Pala okukatalelapo vana valekesa esuko, tukahi nokupewa ondundo opo tuave otratadu Okuti Ove Uhanda Okunoñgonoka Otyili?, nokulinga ononkhono pala okuhimbika okulongesa omunthu Ombimbiliya. Oñgeni tupondola okutyilinga tyina tukatalelapo omunthu?

2. Oñgeni tupondola okuundapesa otratadu Okunoñgonoka Otyili pala okuhimbika okulongesa omunthu Ombimbiliya wetavela omikanda tyina tukemutalelapo?

² Oñgeni Matuundapesa Otratadu: Tupondola okupopia okuti: “Omikanda nekusile navio, vilunda ovanthu aveho, no nongeleya okutanga Ombimbiliya. [Avela omunthu otratadu Okunoñgonoka Otyili, iya olekesa omapulo ekahi pefo liotete.] Apa pena omapulo amwe omawa akumbululwa Nombimbiliya. Okuti nthiki imwe walingiliale omapulo ngaa?” Tyina omunthu amakumbulula, talei kumwe motratadu ekumbululo liepulo iya otange otestu ike ikahi potratadu. Iya ohangununa okuti ei ongeleka imwe vala onthutu konthele yetyi Ombimbiliya ilongesa, omuavela omukanda Ombimbiliya Ilongesa. Tupondola okupopia ono palagrafu mbotete mbo kapitulu aholovona. Ine tupondola okuenda pokapitulu pavasiwa onondaka tuapopia motratadu. Pombuelo apa pena omafo nono palagrafu tupondola okuundapesa:

● Okuti Huku tyotyili wasuka umwe nonthue? (pp. 9-11, pars. 6-10)

● Okuti onthiki imwe ovita nononkhumbi mavikapwako umwe? (p. 12, pars. 12-13)

● Oityi tyipita nonthue tyina tuankhia? (pp. 59-60, pars. 7-8)

● Okuti vokuankhia vena ekevelelo? (p. 71, pars. 13-15)

● Oñgeni mandyilikuambela opo Huku anthehelele? (pp. 166-167, pars. 5-8)

● Oñgeni mandyivasi ombembwa momuenyo? (p. 9, pars. 4-5)

3. Tyitei kovanthu tuvasa, oñgeni tupondola okupopia mononkhalelo mbelikalaila?

³ Tyotyili, inkha katuakalele nomuvo pala okuhimbika nokulekesa oñgeni tulilongesa novanthu momukanda Ombimbiliya Ilongesa, otyikando tyotete tuemutalelapo, tupondola okulipongiya opo tukondoke nokutualako netompho lietu. Iya tyitei kesuko liomunthu, tupondola okuholovona okupopia omapulo amwe motratadu ovikando aviho tukemutalelapo tyina nkhele tuhenelekese omukanda. Tuundapesei nawa otratadu oyo mokueenda kuohanyi ya Kulindi pala okuhimbika okulongesa ovanthu Ombimbiliya, nokuvatela vana vena omutima waviuka “okunoñgonoka otyili.”—João 8:31, 32.