“Linga Ovipuka Aviho Mokonda Yokuivisa Onondaka Onongwa”
1. Oityi omuivisi Wouhamba ena okulingila vakuavo, iya omokonda yatyi?
1 Apostolu Paulu ankho utyii okuti una otyilinga tyokuivisa onondaka onongwa kuvakuavo. (1 Cor. 9:16, 19, 23) Tupu, esuko tuna novanthu litulunda okulinga ononkhono pala okuvepopila onondaka onongwa.
2. Tyina tuivisa, omapiluluko patyi tuesukisa okulinga, iya omokonda yatyi?
2 Ivisa Pana Upondola Okuvasa Ovanthu: Omufwi wonohi omunongo, kakafwa vala onohi pomphangu oe muene ahanda, mahi, ukafwa pana etyi okuti upondola okuvasapo onohi ononyingi. Tupu, nonthue “ngovafwi vovanthu,” pamue tuesukisa okupilulula o programa yetu opo tuvase ovanthu motelitoliu yetu, nokukala nehambu liokuundapa movilinga viakolela “viokukuata onohi ambuho.”(Mat. 4:19; 13:47) Okuti tupondola okuundapa movilinga viokuivisa kokangulohi opo tuvase ovanthu pomaumbo avo, ine okukaivisa kokamuhuka momatapalo? Ehando lia Paulu ankho “okuivisa nombili onondaka onongwa Mbouhamba,” kese omphangu avasa ovanthu.—Atos 17:17; 20:20, 24.
3, 4. Putyina tukahi movilinga viokuivisa, oityi tuna okulinga? Iya inkha tulinga ngotyo ouwa patyi matupoloko?
3 Pilulula Onkhalelo Yove Yokuivisa Okutala Komasuka Ovanthu mo Telitoliu Yove: Omufwi wonohi ovikando ovinyingi upilulula onkhalelo yae yokufwa opo avase onohi ahanda. Oñgeni tupondola okuivisa onondaka onongwa Mbouhamba motelitoliu yetu monkhalelo imue ilunda ovanthu okutehelela? Tuna okupopia konthele yotyipuka tyimue tutyii okuti ovanthu aveho vesuka natyo, nokutehelela nawa etyi ovanthu vapopia konthele oyo. (Tia. 1:19) Tupondola okuvepula oityi vasoka konthele yetyi tukahi nokupopia, opo tuveavele ondundo yokupopia nonthue. (Pro. 20:5) Inkha tulinga ngotyo matutyivili okuivisa onondaka onongwa monkhalelo imue ihika komitima viavo. Paulu wakalele ovipuka aviho opo avatele ovanthu aveho. (1 Cor. 9:22) Tuesukisa okupilulula onkhalelo yetu yokuivisa opo tuvatele ovanthu aveho.
4 Tuna ehambu enene liokuivisa “onondaka onongwa mbovipuka oviwa!” (Isa. 52:7) “Tulingei ovipuka aviho mokonda yokuivisa onondaka onongwa” opo tupopie novanthu ovanyingi.—1 Cor. 9:23.