Okuti Wafuapo Pala Okupilulula Onkhalelo Yove Yokuivisa?
1. Omapiluluko ouye esukisa tulinge tyi?
1 Mu 1 Coríntios 7:31, Ombimbiliya yeeleka ouye notyila pelipinga-pinga ovanthu vanyana. Mokonda ouye upilauluka, tyasukisa okupilaulula ononkhalelo mbokuivisa, no muvo wokutalelapo ovanthu netyi tupopia. Okuti wafuapo pala okupilulula onkhalelo yove yokuivisa?
2. Omokonda yatyi tuna okupilaulula ononkhalelo mbetu mbokuivisa okulandula eongano?
2 Ononkhalelo mbove mbokuivisa: Ewaneno lio Vakristau lialinga omapiluluko omanyingi movilinga viokuivisa. Etyi tete Jesus atuma ovalongwa vae, wevetolela vahatyinde okulia ine onombongo movipapo viavo. (Mat. 10:9, 10) Mahi, konyima apilulula vali onondonga ombo, okutalela koundyale ovalongwa mavakamona komutwe novilinga viokuivisa mavikehika kovilongo ovikuavo. (Luc. 22:36) Mokueenda kuomanima, eongano lia Jeova liaivisale mononkhalelo mbelikalaila—okulimata omikanda monthulo, no nolaliu, nokuivisa nomatuku-tuku—okutalela kuetyi tyesukisa pomuvo opo. Hono, movilongo ovinyingi ovanthu kavavasiwa momaumbo, moluotyo katuivisa vala umbo-na-umbo mahi tupopila ovanthu kese apa tuvevasa natyina tuhekahi movilinga viokuivisa. Onthue tuavelwa ondundo yokuivisa umbo-na-umbo kokangulohi inkha ovanthu komutenya vakaundapa. Tyina etuku tuku lia Jeova lio keulu lipiluluka, okuti nove wahanda okuenda noku lienda nako?—Eze. 1:20, 21.
3. Oñgeni okupilaulula ononkhalelo mbokuivisa tyitukuatesako okuivisa nawa?
3 Etyi Mopopi: Oityi tyisukalalesa vali ovanthu potyilongo tyove? Onombongo? Ombunga? Ovita? Otyiwa okunoñgonoka ovitateka ovanthu vesuka vali navio opo tyikukuatesako okutala etyi mokapopia. (1 Cor. 9:20-23) Tyina omunthu apopia etyi asoka tyitukuatesako okupilulula onkhalelo yetu yokuivisa nokupopia etyi mesuku vali natyo.
4. Omokonda yatyi tyalumbana tupilulule ononkhalelo mbokuivisa?
4 Apa katutu ouye ou mauhiki konthyulilo iya ononkhumbi ononene mambuhimbika. “Omuvo wahupako kauhi.” (1 Cor. 7:29) Moluotyo tyesukisa unene tupilulule ononkhalelo mbokuivisa nokutyilinga tyihasete, ongotyo vala matufuisapo ovilinga vietu momuwo uno uhehi!