Otyonge Tyonthiki Ike Tyo 2010
1 “Talei Nawa Ovipuka Viakolela Vali,” “Kalei Tyapama Ngotyunda Tyike Vala,” “Tualeiko Okuava Oumbangi Konthele Yotyili” iya “Onthue Tunthata—Jeova Omuhongi Wetu.” (Fil. 1:9, 10, 27; João 18:37; Isa. 64:8) Ombo onosapi mbumue ponosapi ononyingi mbapopiwa movionge vionthiki ike vialingwa momanima okualamba. Okuti ove wafuapo pala okuenda kotyonge tyonthiki ike tyenima lio 2010? Otyo matyipopi konthele yosapi yati: “Omuvo Wahupako Kauhi,” yapolwa mu 1 Coríntios 7:29.
2 Tyina ewaneno liamapopi onalupi mamukala notyonge tyenyi tyonthiki ike, himbika okupopia nehambu konthele yotyonge otyo. Ovohe vamue vakuatesako ovana vavo okukevelela nehambu onthiki oyo pokuhoneka onthiki yotyonge mo kalendaliu yombunga, novipuka aviho mavesukisa monthiki oyo, avahimbika okuvalula alo onthiki ihikapo. Mokueenda Kuelilongeso Liombunga kokangulohi, upondola okupitulula etyi muelilongesa movionge viokualamba vionthiki ike. Tupu upondola okupongiya omutima pala onthiki oyo mokupitulula omukanda Beneficie-se da Escola do Ministério Teocrático pomafo 13-16, pala okukuatesako ove nombunga yove “okutala nawa oñgeni mutehelela.”—Luc. 8:18.
3 Undapesa Etyi Welilongesa: Apeho konyima yotyonge tuhole okupopia okuti, “otyonge etyi tyetuhambukiswa ngatyi!” Otyo apeho otyili, mokonda oyo onkhalelo imue Jeova aundapesa pala okutulongesa. (Pro. 10:22) Opo tupoleko esilivilo, tuesukisa okusoka nawa etyi tuelilongesa, nokutyipaka momutima. (Luc. 8:15) Konyima yotyonge, tyina wenda nokeumbo, tomphola nombunga yove, navana waendela navo metuku-tuku konthele yetyi muelilongesa. Tomphola navakuenyi etyi usoka okulinga, no nonthele mambukuvatela movilinga viokuivisa. Okulinga ngotyo, matyikukuatesako okupola esilivilo kuetyi tyapopiwa motyonge.—Tia. 1:25.
4 Onthue apeho tulitehelela nawa tyina tupewa otyipuka tyimue tuesukisa. Onthue tuhanda unene okunoñgonoka oityi Jeova etupongiyila pala otyonge tyetu tyonthiki ike. Tupondola okukala nonthumbi yokuti otyonge matyitukuatesako mononkhalelo ononyingi. Tupondola okukevelela okupewa na Tate yetu Jeova, epameko, nelongeso opo tufuisepo ovilinga etuavela.—2 Tim. 4:2; Tia. 1:17.
[Omapuko Elongeso]
1. (a) O nosapi patyi mbapopiwa movionge vionthiki ike vialingwa momanima okualamba? (b) Okuti motyonge tyonthiki ike tyokualamba welilongesamo onthele imue yakolela ikahi nokukuvatela movilinga viokuivisa?
2. Oñgeni tupondola okuyawisa ehambu liokukala potyonge otyo?
3. Oityi tupondola okulinga opo tupole esilivilo kuetyi matyikapopiwa?
4. Omokonda yatyi otyonge tyonthiki ike tyakolela pala onthue?