“Okulia Momuvo Wanakua”
1. Oñgeni otyonge tyokualamba tyonthiki ike tyavatela ove navakuenyi?
1 Ovikando ovinyingi, tyina tuamamane okutehelela otyonge tyetu tyonthiki ike, tupopia okuti, “Etyi otyo ankho tuesukisa!” Omukulu umwe omutalelipo womauaneno wapopia okuti etyi amana okutehelela otyonge tyalamba, vamwe momawaneno atalelapo valekesa ehando liokuundapa vali movilinga viavo viokuivisa. Omukulu umwe omutalelipo womauaneno wati: “Otyonge tyetukuatesako okusoka nawa kononthiki mbuno tukahi nokutala omaholovono tulinga momuenyo wetu.” Omukuavo wati: “Ovaivisi ovanyingi vapopia okuti eli ankho ehinangeleso enene pala okukala nonthumbi yokuti ovo ankho vekahi nokutala kuetyi tyesukisa vali, ovilinga viokuivisa.” Oñgeni otyonge tyonthiki ike tyekukuatesako?
2. Oityi matukelilongesa motyonge tyenima maliya?
2 Otyonge tyenima maliya, tupu matyilingwa okutala komasuka etu. Osapi yati, “Tilila ku Jeova,” yapolwa mo Salmo 118:8, 9. Ombu ononthele mbumwe mambukalingwa: “Oñgeni Jeova Omphameko Yetu Momuvo Wononkhumbi,” “Kuatesako Vakuenyi Okuvasa Etililo Momavava a Jeova,” “Hetekela Jeova Pokuavela Etililo,” “Vakuendye Novahikuena, Yumbei Onthumbi mu Jeova!”, “Opalaisu Yetu Yopaspilitu—Omphangu Yetililo Tuapewa na Jeova.”
3. Oñgeni tupondola okupola esilivilo tyina tukahi motyonge?
3 Oñgeni Matupolo Esilivilo Motyonge: Tyina tyamapopiwa onalupi mamukala notyonge, lipongiya opo ukalepo, nokukonga ovalongwa vove Vombimbiliya vaye nove. Opo “tuave ovinyango nekoleleyo,” tuesukisa okupaka momutima etyi tutehelela. (Luc. 8:15) Moluotyo tehelela nawa otyonge, nokuhoneka ononthele wesukisa okuhinangela, nonondonga ove mokaundapesa momuenyo wove nomovilinga viove viokuivisa. Ovola omuvo pala okupopia nombunga etyi muelilongesa kotyonge, nokutala ononthele ove nombunga yove mupondola okuundapesa momuenyo wenyi.
4. Omokonda yatyi tuesukisa okukevelela nehambu otyonge tyonthiki ike?
4 Ngetyi okulia kuatelekwa nawa, kupepa, otyonge tyonthiki ike tyenima lino tyapongiyua nawa, nohole onene. Jeova aavele ononkhano onongwa ononkhono mbove mbokukalapo, nokupolako esilivilo ‘kokulia oko kuopaspilitu momuvo wanakua’ kuapongiyilua Ovakristau.—Mat. 24:45.