Linga Ononkhono Pala Okuava Oumbangi Ovalume
1. Oityi tyesukisa unene pala okuvatela ovilinga Viouhamba?
1 Putyina ovilinga viokuivisa onondaka onongwa Mbouhamba vitualako nokuliyawisa mononthiki mbuno mbahulililako, kuesukisa unene ovalume vafuapo mopaspilitu pala okupita komutwe. (Mar. 4:30-32; Atos 20:28; 1 Tim. 3:1-13) Mahi, konomphangu mbumue, ovakai ovo vekahi vali nokutavela onondaka Mbouhamba tyipona ovalume. Kovilongo vimue, ovalume vasoka okuti ovakai ovo vena otyilinga tyokulongesa ovana ovipuka konthele ya Huku. Oñgeni tupondola okuavela vali ondundo ovalume okuimbuka okuti ovahepi mopamphepo, iya aveliongiya nonthue mefendelo liotyotyili?
2. Oñgeni ononkhono Paulu na Petulu valingile pala okuava oumbangi ovalume tyaavelele ovinyango oviwa?
2 Ovola Okuava Oumbangi Ovalume: Tyina onkhalamutue yombunga etavela otyili, ovikando ovinyingi uhongiliya vakuavo mombunga opo veliongiye nae mefendelo liotyotyili. Mongeleka, puetyi Paulu na Sila ankho vekahi mokaleya mokonda yokuivisa onondaka onongwa Mbouhamba, vaavelele oumbangi omuyungi wovikaleya. Omulume oo kumue nombunga yae avambatisalwa. (Atos 16:25-34) Etyi Paulu aivisila mo Korintu, “Krispu, onkhalamutue yokapela, kumue nombunga yae aiho, vetavela ku Tatekulu.” (Atos 18:8) Petulu waundapesilue na Jeova opo aave oumbangi ku Korneliu onkhalamutwe yomafualali wapopiua okuti ‘omulume omuviuki, nokuna onthilo na Huku.’ Korneliu, kumwe nombunga yae, nomapanga ae, avambatisalwa.—Atos 10:1-48.
3. Okuhetekela Filipe, olie ‘omutumini’ ove upondola okuava oumbangi?
3 Okuava oumbangi ovalume vekahi ‘kepondolo,’ tyipondola okuvatela unene. (1 Tim. 2:1, 2) Mongeleka, oandyu ya Jeova yalondolele Filipe akapopie ‘nomulume omunene’ ankho utumina omalumono aeho onkhai-hamba yoko Etiopia. Filipe weiva omulume ‘okutangela peulu omukanda womuuli Isaia,’ iya emupopila onondaka onongwa konthele ya Jesus. Omulume oo woko Etiopia akala omulongwa iya nae akatolela onondaka onongwa ovanthu vokotyilongo tyae. Mokutala, tupu waavelele oumbangi onkhai-hamba, navana ankho vakala mombala yae, ovanthu ankho vehena onomphitilo mbokutehelela onondaka onongwa Mbouhamba wa Huku.—Atos 8:26-39.
4. Oñgeni tupondola okuava vali onomphitilo ovalume opo veive onondaka onongwa?
4 Oñgeni Matupopi Novalume Ovanyingi: Mokonda komutenya ovalume vekahi kovilinga viavo, okuti upondola okuovola omuvo opo uundape vali unene movilinga viokuivisa kokangulohi, Movityasapalo, no Tyalumingu, ine mononthiki mbovipito viomouye ovanthu vahaundapa? Okuundapa apeho ponomphangu mbovitanda, matyituavela onomphitilo pala okuavela oumbangi ovalume vana vahakala unene peumbo. Tupu, ovakuatate vapondola okulinga ononkhono opo vaavele oumbangi ovalume vaundapa navo. Movilinga viokuivisa umbo na umbo, haunene ponomphangu pana paundapuale unene, ovakuatate vapondola okuita opo vapopie nomulume womeumbo.
5. Oityi omphange ena okulinga tyina omulume umue etavela ondaka Youhamba?
5 Tyina omphange aavela oumbangi omulume iya etavela, oe kapondola okukemutalelapo aike. Upondola okuenda nomulume wae, ine nomuivisi omukuavo omukuatate. Inkha watala okuti omulume wesuka umue nokulilongesa, otyiwa okumuavela komukuatate umue wafuapo.
6. Oñgeni tupondola okuhetekela apostolu Paulu opo tutyivile “okupopia novanthu ovanyingi”?
6 Holovona Ononthele Mbusukisa Vali Ovalume: Apostolu Paulu ankho una esuko novanthu, alo umue, ankho upilulula onkhalelo yae yokupopia opo etyivile “okupopia novanthu ovanyingi.” (1 Cor. 9:19-23) Nonthue tuesukisa okutala ononthele patyi matukapopia novalume hamwe tuvasa, nokupongiya nawa. Mongeleka, ovalume vesuka vali novitateka konthele yonombongo, outumini omuwa, nepamo lionombunga mbavo. Tupu vapondola okusuka netyi matyikapita noohi komutue wandyila, omokanda yatyi tualingilwa, iya omokonda yatyi Huku ayekelako ononkhumbi. Ovanthu mavetavela vali nawa ondaka Youhamba inkha tulekesa ounongo monkhalelo yetu yokupopia.—Pro. 16:23.
7. Oñgeni aveho mewaneno vapondola okuvatela unene ovalume vehelilongesa vokuenda keliongiyo?
7 Ovola Okuvatela Ovalume Vehelilongesa: Namphila pamwe ovituwa oviwa vio nomphange mbetu Ovakristau vipondola okuhongiliya unene ovalume vavo vehelilongesa, ovakuatate mewaneno tupu vapondola okuvatela unene. (1 Ped. 3:1-4) Tyina omulume uhelilongesa aya keliongiyo nomukai wae, okumuliepesa nohole matyimuavela oumbangi omunene. Tupu, okuenda keliongiyo tyilekesa okuti oe wesuka notyili, iya upondola okukala tyafuapo pala okutavela elilongeso Liombimbiliya.
8. Oñgeni ovakuatate vapondola okuovola okuvatela ovalume vana vehelilongesa vehole okulekesa katutu esuko kotyili Tyombimbiliya?
8 Tupu, ovalume vamue ponthyimbi kavalekesa esuko enene Mombimbiliya, anthi hamue vapondola okukala tyafuapo pala okupopia konthele Yombimbiliya nomukuatate umue ovo vena katutu oupanga nae. Ovakuatate mewaneno limue, tyina pamue vakatalelapo ombunga muna omulume uhelilongesa, ankho valinga ononkhono pala okupopia nae konthele yovipuka ovo ankho vetyii okuti vimusukisa unene. Tyafuile, otyo tyevevatela okupopia konthele Yombimbiliya, iya pahe omulume oo wambatisalua. Omukuatate umue wakuatesako omulume umue uhelilongesa okutunga otyimato tyeliseta neumbo liae. Okulekesa esuko monkhalelo oyo, tyemuvatela okuhimbika okulilongesa nae Ombimbiliya. (Gál. 6:10; Fil. 2:4) Inkha ove umukuatate Omukristau, omokonda yatyi wahalingila ononkhono pala okuvatela ovalume ovo vehelilongesa?
9. Oityi tyipondola okutundilila kelongeso liovalume Ovakristau?
9 Longesa Ovalume Ovakristau Pala Ovilinga Komutwe: Ovalume vokutavela ondaka Youhamba, nokuovola okuvasa ovilinga mewaneno lia Jeova, vapondola okukala ovakulu vewaneno vaundapesa ounongo, nononkhono mbavo pala okuvatela omawaneno ovanthu va Jeova. (Efé. 4:8; Sal. 68:18) Ovalume ovo, valisa ewaneno nombili. (1 Ped. 5:2, 3) Tyotyili, ovo vaetela ouwa ovakuatate vetu ouye auho!
10. Oñgeni ononkhono Anania alingile mbokuvatela Paulu mbaetela ouwa ovanthu ovanyingi?
10 Mongeleka, Saulu wakalele “apostolu yovilongo,” namphila amonesile ononkhumbi Ovakristau. (Rom. 11:13) Mokonda yotyo, omulongwa Anania ponthyimbi kahandele okukapopia na Saulu. Mahi, Anania walandulile ehongolelo lia Tatekulu, iya apopi nomulume oo weya okukala apostolu Paulu. Mokueenda kuomanima, ovilinga viokuivisa via Paulu viakuatesileko ovanthu ovanyingi okumutehelela. Tupu, ovanthu ovanyingi hono vatualako okupola esilivilo komikanda oe ahoneka vikahi Mondaka ya Huku.—Atos 9:3-19; 2 Tim. 3:16, 17.
11. Omokonda yatyi tuna okulinga kese epiluluko liesukisa opo tuavele oumbangi ovalume?
11 Moluotyo, nonthue tulingei kese epiluluko liesukisa opo tutyivile okuava oumbangi ovalume. Tupondola okukala nonthumbi yombatelo ya Jeova inkha tulinga ononkhono mbokulinga ehando liae nokufuisapo nawa omasuka Ouhamba.