Upondola Okulinga Ononkhono Opo Uvatele Omulume Uhelilongesa?
1. Omokonda yatyi Ovakristau velinepa na vana vehelilongesa havoko vala vesuka okukuatesako ovalume ine ovakai vavo vehelilongesa opo vetavele otyili?
1 Ovaivisi vamwe mewaneno liove vena omulume ine omukai uhelilongesa? Inkha ongotyo, tyotyili ovaivisi ovo vahanda vana velinepa navo vakale kumwe mefendelo liotyotyili. Mahi havoko vala vetyihanda. Nga Huku, ewaneno aliho lihanda “ovanthu vatyo aveho vayovolwe iya avakala nenoñgonoko liafuapo konthele yotyili.” (1 Tim. 2:4) Oñgeni tupondola okukuatesako ovalume ine ovakai vehelilongesa vovaivisi mewaneno lietu?
2. Oñgeni okukala nenoñgonoko matyitukuatesako okuvatela omulume wetu ine omukai uhelilongesa?
2 Tete, tuesukisa okuovola okutala ovipuka ngetyi vana vehelilongesa vevitala. Ovalume ovanyingi novakai vehelilongesa vaovola okukala nohole nombunga yavo, nokuovola okukala notyinepo otyiwa. Ovo hamwe vena omatavelo elikalela no etu. Ovo tyipondola vei vala katutu konthele Yonombangi mba Jeova, mokonda vatolelwa nomapanga vena okapungulula ine vahanoñgonokele nawa Onombangi mba Jeova. Vamwe vanumana novalume ine ovakai vavo mokonda pahe vakala vali omuvo omunyingi movilinga via Huku tyipona okukala nombunga. Enoñgonoko malitukuatesako okutekula nohole nonthilo una uhelilongesa, nokulityilika okukala tyanumana unene tyina tukahi ponthele yae.—Pro. 16:20-23.
3. Oipi onkhalelo ongwa pala okuvatela una uhelilongesa?
3 Lekesa Esuko: Onkhalelo ongwa pala okuvatela una tuelinepa nae uhelilongesa opo eye motyili, hakupopia vala konthele Yombimbiliya, mahi okukala novituwa oviwa. (1 Ped. 3:1, 2) Tyakolela vali konthele oyo, okulekesa esuko komunthu. Onomphange mewaneno vapondola okulekesa esuko komukai umwe uhelilongesa, iya ovakuatate navo otyo vena okulinga nomulume umwe uhelilongesa. Ñgeni?
4. Oñgeni tupondola okulekesa esuko komunthu uhelilongesa?
4 Inkha nkhele kunelivase nomukai ine omulume, hamwe upondola okutyilinga tyina wamapopi no Mukristau welinepa nae. Inkha una uhelilongesa kakumbululile nawa otyikando tyotete uhasoye. Oupanga wetu nesuko nomunthu oo, tyipondola okumulunda okutala Onombangi mba Jeova monkhalelo imwe yaviuka. (Rom. 12:20) Ovakristau vamwe vapama mopaspilitu vakonga vana vehelilongesa no nombunga mbavo opo valile kumwe, valinga ngotyo opo velinoñgonoke nawa nokuyekapo okapungulula kapondola okukalapo. Ovo vapopia konthele yetyi tyisukalalesa una uhelilongesa, tyipona okumukuluminya okutomphola konthele yovipuka viopaspilitu. Konyima, tyina una uhelilongesa ekahi nokupopia vali nawa, pahe tupondola okupopia konthele Yovihonekwa. Ine tupondola okumukonga opo aye komaliongiyo etu, akatale etyi omukai wae ekahi nokulilongesa, haunene inkha anoñgonokale vamwe mewaneno. Inkha kafuilepo pala okulilongesa otyili, oe upondola okupandwa mokonda yombatelo aavela omukai wae ulilongesa.
5. Oñgeni ovakulu vewaneno vapondola okuvatela una uhelilongesa?
5 Haunene ovakulu vewaneno vesukisa okuvatela ovalume novakai vehelilongesa nokutala nawa onomphitilo pala okuava oumbangi. Omunthu uhelilongesa uhetavela okutomphola konthele Yombimbiliya, upondola okutehelela epameko lio Vihonekwa tyina ekahi kosipitali ine tyina avasiwa novitateka ovinene konthele yekongoko. Inkha mombunga muna omulume ine omukai uhelilongesa mumoneka ovitateka, ngetyi ononkhia mbomunthu umwe mombunga, ovakulu vewaneno vapondola okukonga una uhelilongesa opo akalepo tyina vapameka ombunga.
6. Omokonda yatyi tuesukisa okuvatela omulume ine omukai uhelilongesa?
6 Soka kehambu Omukristau mewaneno makala nalio inkha omulume ine omukai wae etavela okulilongesa otyili! Tupu otyo tyihambukiswa unene Jeova, nonoandyu, navakuavo mewaneno. (Luc. 15:7, 10) Mahi, inkha una uhelilongesa ehetavela ponthyimbi, nkhele tupondola okuhambukwa okuti ononkhono mbetu mbuhambukiswa Jeova, una “uhahande na umwe ahanyueko, mahi uhanda ovanthu aveho velivele.”—2 Ped. 3:9.
[Olutalatu pefo 6]
Onkhalelo ongwa pala okuvatela una tuelinepa nae uhelilongesa opo eye motyili, hakupopia vala konthele Yombimbiliya, mahi okukala novituwa oviwa