Onalupi Tuna Okukatalelapo Ovanthu Vokualekesa Esuko?
1. Okulinga ovalongwa tyakutikinya tyi?
1 Okulinga ovalongwa tyakutikinya okukatalelapo ovanthu vokualekesa esuko liokulilongesa konthele Youhamba wa Jeova. (Mat. 28:19, 20) Ovikando ovinyingi, omuvo waviuka pala okukatalelapo omunthu, utei ko programa yetu, no yomunthu wokualekesa esuko. Omokonda yatyi tuesukisila okukondoka liwa okukatalelapo ovanthu tuapopia navo otyikando tyotete?
2, 3. Omokonda yatyi tuna okulinga ononkhono mbokukondoka liwa?
2 Omokonda Yatyi Tuna Okukondoka Liwa? Ovilinga viokuivisa “onondaka ombu onongwa Mbouhamba” apa katutu mavipu, iya onthyulilo youye uno ikahi popepi. (Mat. 24:14; 1 Ped. 4:7) Moluotyo, putyina nkhele ovanthu vekahi “monthiki yeyovo,” onthue tuna okutavela elondolo ‘liokuivisa ondaka nondyanga,’ iya otyo, tyakutikinya okukondoka liwa okukatalelapo ovanthu vokualekesa esuko.—2 Cor. 6:1, 2; 2 Tim. 4:2.
3 Satanasi una ehando enene liokuhanyauna kese ombuto yotyili tukuna momutima womunthu wokuesuka. (Mar. 4:14, 15) Ovikando ovinyingi, onombunga, navana aundapa navo ine elilongesa navo kosikola, valinga omukuele una wokualekesa esuko. Okukondoka liwa, matyitukuatesako okuvatela omunthu tyina nkhele ovakuavo veheneye okumulinga omukuele.
4. Oityi tupondola okulinga opo tulipongiye tyina tukatalelapo omunthu tuapopia nae otyikando tyotete?
4 Okulilaa Nomunthu: Tyikahi nawa okulipongiya pala okukondoka okukatalelapo omunthu tuapopia nae otyikando tyotete. Linga epulo moya okukumbulula tyina wamakondoka okukemutalelapo. Tyakolela okuhoneka pokamukanda onthiki yotete wapopia nae, nonthiki mokondoka okukemutalelapo. Inkha tyitavela, mupula inkha upondola okukondoka muhuka ine onthiki onkhuavo. Inkha wapopia nae tyasapalo ine tyalumingu, iya omunthu uundapa mokueenda kuosimano, oe hamwe metavela uye okumutalelapo motyasapalo ine otyalumingu tyilandulako. Tyina muelilaa okuti mokondoka, fuisapo ondaka yove.—Mat. 5:37.
5. Oñgeni okukatalelapo liwa ovanthu, tyitukuatesako okufuisapo otyilinga tuapewa na Jesus tyokulinga ovalongwa?
5 Tuna omahunga omawa pala okukondoka liwa okukatalelapo vana vokualekesa esuko. Moluotyo, popia onthiki no ola mokondoka iya okondoka liwa, mokonda “omuvo wahupako kauhi.” (1 Cor. 7:29) Tyina tukatalelapo liwa ovanthu vokualekesa esuko konondaka Mbouhamba, tupu ovo vapondola okutavela liwa okulilongesa.