Okuti Nafuapo Pala Okuivisa?
1. Omokonda yatyi katupondola okusoka okuti katuafuilepo pala okuivisa?
1 Inkha ove uhole okulilinga epulo olio, wahasukalale! Katyesukisile okulongeswa unene kosikola ine okukala nounongo wavilapo opo tukale tyafuapo pala ovilinga viokuivisa. Ovalongwa vamwe votete ankho vapopiwa okuti “kavatangele unene.” Mahi, ovo ankho ovaivisi ovanongo vonondaka onongwa mokonda vatokolele okulandula ongeleka ya Jesus.—Atos 4:13; 1 Ped. 2:21.
2. Oñgeni Jesus ankho alongesa?
2 Oñgeni Jesus Alongesile: Omalongeso ae ankho apepuka, nokunoñgonokwa navana vahatangele kosikola. Omapulo ae, no nongeleka, no nondaka mbae mbapepuka, ankho mbuhindila ovanthu okutehelela. (Mat. 6:26) Oe ankho ulekesa esuko liotyotyili kovanthu. (Mat. 14:14) Tupu, Jesus ankho upopia nonthumbi, nomutima wakola, okunoñgonoka okuti o Jeova wemutuma nokumuavela ononkhono pala okufuisapo ovilinga viae.—Lucas 4:18.
3. Oñgeni Jeova etukuatesako okufuisapo ovilinga vietu viokuivisa?
3 Jeova Utukuatesako: Omulongesi wetu Omunene, uundapesa Ondaka yae Neongano liae pala okutuavela elongeso tuesukisa opo tuivise nombili onondaka onongwa. (Isa. 54:13) Mokonda Jeova watuma okuhoneka onkhalelo Jesus alongesile, onthue tupondola okulilongesa nokuhetekela ononkhalelo mbae. Jeova utuavela ospilitu sandu yae, nokutulongesa momaliongiyo omewaneno. (João 14:26) Tupu, utuavela ovaivisi ovanongo vapondola okutukuatesako okukala vali ovanongo movilinga viokuivisa.
4. Omokonda yatyi tuna ehunga liokulitehelela okuti tuafwapo pala okuivisa onondaka onongwa kuvakuetu?
4 Onthue tuna omahunga aeho pala okulitehelela okuti tuafwapo pala okuivisa, mokonda “okukala kuetu ovanongo tyitunda ku Huku.” (2 Cor. 3:5) Tyina tuyumba onthumbi mu Jeova nokuundapesa nawa ovipuka aviho etuavela, matukala “tyafuapo nawa, nokuapongiyua nawa pala ovilinga aviho oviwa.”—2 Tim. 3:17.