Ovakristau Vesukisa Okulikuambela
1. Oityi tyesukisa opo tufuisepo ovilinga vietu viokuivisa?
1 Onthue katupondola okufwisapo ovilinga viokuivisa atuike. Jeova utuavela ononkhono opo tulinge ovilinga ovio. (Fil. 4:13) Oe uundapesa onoandyu mbae opo mbutuvatele okuvasa vana vekahi ngonongi. (Rev. 14:6, 7) O Jeova ukulisa ombuto yotyili tutuika nokuitapela omeva. (1 Cor. 3:6, 9) Tyakolela unene pala Ovakristau okuyumba onthumbi ku Tate yetu keulu pokulinga omalikuambelo!
2. Ovipi ovipuka tuesukisa okulikuambela?
2 Pala Onthue Muene: Tuesukisa okulikuambela kese omuwo tuivisa. (Efé. 6:18) Ovipuka patyi tuesukisa okulikuambela? Tupondola okulikuambela opo tukale nolusoke luaviuka konthele yotelitoliu yetu, nokukala tyehena owoma. (Atos 4:29) Tupondola okuita ku Jeova opo etuhongolele kovanthu vomutima waviuka vana tupondola okulilongesa navo Ombimbiliya. Inkha omulongwa etulinga epulo, tupondola okulinga liwa-liwa elikuambelo momutima opo Jeova etukuateseko okuava ekumbululo liaviuka. (Nee. 2:4) Tupu, tupondola okuita ounongo opo tupake tete momuenyo wetu ovilinga viokuivisa. (Tia. 1:5) Tyotyili, Jeova uhambukwa tyina tupandula mokonda yelao tuna liokukala ovaumbili vae.—Col. 3:15.
3. Oñgeni okuitilako vakuetu momalikuambelo tyivatela ovilinga viokuivisa?
3 Pala Vakuetu: Nonthue tupu tuna “okuliitilako pokati momalikuambelo,” alo umwe okupopia enyina liovaumbili vakuenyi tyina tyesukisa. (Tia. 5:16; Atos 12:5) Inkha utupu nawa ekongoko oityi upondola okulinga movilinga viokuivisa? Itilako ovaumbili vakuenyi vena ekongoko ewa. Omalikuambelo ove ena ononkhono ononene pala ouwa wavakuenyi! Tupu, tyaviuka okuitilako ovatumini vetavele ovilinga viokuivisa vilingwe, opo ovakuatate vetu “vatualeko okukala nomuenyo wahiliya.”—1 Tim. 2:1, 2.
4. Omokonda yatyi tuesukisila okutualako okulikuambela?
4 Okuivisa onondaka onongwa oohi aiho otyilinga tyimwe onthue tuhevili kononkhono mbetu muene. Inkha “tutualako okulikuambela,” matulingi ovilinga nombatelo ya Jeova.—Rom. 12:12.