Omapulo Akumbululwa

◼ Alo pi tuna okulilongesa nomulongwa ukahi nokukula nawa mopamphepo?

Otyiwa okutualako okulilongesa nomulongwa ukahi nokukula nawa mopamphepo alo amana omikanda vivali—Oityi Ombimbiliya Tyili Ilongesa? nomukanda ‘Mantenha-se no Amor de Deus.’ Alo umwe inkha omulongwa ambatisalwa tyina nkhele ehenemane omikanda ovio. Tyina ambatisalwa tupondola okutualako okuvalula oola, nomulongwa, novikando wemutalelapo. Inkha omuivisi tuaenda nae apopia melilongeso, tupu upondola okuvalula oola.—Tala Ovilinga Vietu Viouhamba, ya Tyitalale yo 2009 pefo 2.

Tyakolela omulongwa omupe akale nomii viapama motyili tyina nkhele tuhenetalame okulilongesa nae. Ovo vesukisa ‘okukakatela’ mu Kristu, “nokuapama mekolelo” opo veliyakulile kovitateka vapondola okukala navio. (Col. 2:6, 7; 2 Tim. 3:12; 1 Ped. 5:8, 9) Tupu, opo valongese vakuavo nounongo, vena okukala “nenoñgonoko liafuapo konthele yotyili.” (1 Tim. 2:4) Tyina tumanuhula omikanda vivali novalongwa vetu, tukahi nokuvekuatesako okukala tyapama “mondyila ituala komuenyo.”—Mat. 7:14.

Tyina nkhele omunthu ehenetavelwe pala okumbatisalwa, ovakulu vewaneno vesukisa okutala inkha oe anoñgonoka nawa omalongeso otete Ombimbiliya nokutyinda omuenyo welikuata nomalongeso oo. Ovakulu vewaneno vesukisa okutala nawa tyina valinga omapulo ombatisimu komunthu nkhele uhenemane okulilongesa omukanda wotete. Inkha ovakulu vewaneno vatala okuti omunthu kanoñgonokele nawa omalongeso otete Ombimbiliya, vena okumukuatesako akale nenoñgonoko opo akambatisalwe komutwe wandyila.—Tala Organizados para Fazer a Vontade de Jeová, pomafo 217-218.

[Ehangununo liolutalatu pefo 2]

Tyakolela omulongwa omupe akale nomii viapama motyili