Testemunhas de Jeová — Organizadas para Pregar as Boas Novas
Mokueenda kuomanima omanyingi, Onombangi mba Jeova vekahi nokuivisa onondaka onongwa monkhalelo yaongana. Ovio ovilinga vimwe ovinene viokuivisa viiwe nouye, tukahi nokuivisa onondaka ombo momalaka omanyingi no movilongo vilamba po 230. (Mat. 24:14) Omokonda yatyi ovilinga ovio viesukisila? Oñgeni vikahi nokulingwa ouye auho? Ovideo Testemunhas de Jeová—Organizados Para Pregar as Boas Novas maikumbulula omapulo oo pokuhangununa nawa konthele yovilinga vietu vikahi nokulingwa ouye auho. Tyina wamatale ovideo, kumbulula omapulo maalandulako.
Oñgeni ovideo ei yayawisa enoñgonoko liove konthele (1) yononkhono eongano lia Jeova likahi nokulinga pala okuivisa onondaka onongwa? (2 Tim. 4:2) (2) yombunga yo Mbetele ouye auho? (3) yelongeso lipewa onomisionaliu novatalelipo vomawaneno? (2 Tim. 2:2) (4) yesilivilo liokutanga otestu Yombimbiliya kese nthiki nokupongiya omaliongiyo a kese simano? (Atos 17:11) (5) youwa wokuenda apeho komaliongiyo? (Heb. 10:24, 25) (6) yononkhano onongwa matutambula tyina oohi yamakala Omphangu Yombembwa? (Isa. 11:9) (7) yelao tuna liokuundapa movilinga viokuteya? —João 4:35.
Ovideo ei otyiti otyiwa tyikahi nokukuatesako ovanthu valekesa esuko liokunoñgonoka otyilinga tyo Nombangi mba Jeova tyikahi nokulingwa ouye auho. (8) Onalupi upondola okulekesa ovideo kovalongwa vove Vombimbiliya, ombunga, navakuavo? (9) Oñgeni ovanthu vakala tyina uvelekesa ovideo?
Tyina tusoka kuetyi Jeova ekahi nokulinga, tyitulunda okutavela onondaka mbo muhoneki wono salmu mbati: “Ove walinga ovipuka ovinyingi Jeova Huku yange, enga omalusoke ove novilinga viove oviwa unene pala onthue. Kutupu nawike weelekua nove.” (Sal. 40:5) Tuundapesei nawa ovideo ei opo tukuateseko vakuetu okukala nolupandu na Jeova neongano liae!