Jeova Ukahi Nokutulongesa Pala Ovilinga Evi
1. Tyina Jeova aavela ovanthu otyilinga, tupu oityi alinga?
1 Tyina Jeova aavela ovanthu ovilinga, tupu uveavela ombatelo vesukisa pala okuvifuisapo. Mongeleka, etyi Jeova atolela Noe atunge owato, otyipuka tyimwe Noe ankho ehenelinge, Oe tupu wemutolela oñgeni ena okutyilinga. (Gên. 6:14-16) Etyi omunthita omutendi Moisesi apewa otyilinga pala okuenda kovakulu vo Isilayeli na Farao, Jeova wemutolela okuti: “Ame muene mandyikala nomulungu wove iya mandyikulongesa etyi una okupopia.” (Êx. 4:12) Tupu, motyilinga tyetu tyokuivisa onondaka onongwa Jeova utulongesa oñgeni tuna okutyilinga. Oe utulongesa opo tufuisepo ovilinga ovio, Mosikola Yovilinga via Huku, no Meliongiyo Liovilinga. Oñgeni tupondola okupola ouwa kelongeso olio?
2. Oñgeni tupondola okupola ouwa Mosikola Yovilinga via Huku?
2 Osikola Yovilinga Via Huku: Tyina uhenende keliongiyo tanga nokupongiya ononthele mambulilongeswa. Iya tyina utala vana vapewa ononthele valinga omalongomona avo, matyikukuatesako okuyawisa ounongo wokulongesa. (Pro. 27:17) Tyinda omukanda wove Escola do Ministério keliongiyo opo uhoneke etyi mosukisa. Tyina omuendesi wosikola atanga momukanda oo, konyima ya kese elongomona liomulongwa, nthinda onthele yakolela wesukisa, nokuhoneka komuoyo womukanda. Onkhalelo ongwa yokupola ouwa Mosikola Yovilinga via Huku, okulinga ononthele. Okuti welihonekesale? Tyina upewa elongomona lipongiya nawa nokulandula onondonga upewa. Tyina ukahi movilinga viokuivisa undapesa etyi welilongesa.
3. Oityi matyitukuatesako okupola esilivilo Meliongiyo Liovilinga?
3 Eliongiyo Liovilinga: Matuhinangela nawa ononthele mambupopiwa meliongiyo olio tyina tutanga ononthele ambuho nokupongiya pala okuava omakumbululo. Inkha katupopi unene tyina tuava omakumbululo, ovanthu ovanyingi mavetyivili okuava omakumbululo. Tehelela nawa ononthele, undapesa onondonga ove utala okuti mambukukuatesako okuivisa vali nounongo. Inkha utala okuti Movilinga Vietu Viokuivisa muna ononthele uhanda okuundapesa komutwe wandyila upaka nawa.
4. Omokonda yatyi tuna okuundapesa nawa etyi tulongeswa Mosikola Yovilinga via Huku?
4 Ngotyilinga tyapelwe Noe na Moisesi, otyilinga tyetu tyokuivisa onondaka onongwa Mbouhamba kovanthu aveho katyapepukile. (Mat. 24:14) Matutyivili inkha tuyumba onthumbi mu Jeova, Omulongesi wetu Omunene, nokuundapesa nawa etyi oe etulongesa.—Isa. 30:20.