2015 Osikola Yovilinga via Huku Itukuatesako Okuyawisa Ounongo Wetu Wokulongesa

¹ David omuhoneki wo salmu wahoneka okuti: “Onondaka mbomulungu wange, nomalusoke omutima wange, mbupandwe kolupala luove Jeova, Onkhanda yange Nomuyovoli wange.” (Sal. 19:14) Nonthwe tuhanda onondaka mbetu mbupandwe na Jeova, mokonda tuapewa elao liokupopia otyili mewaneno no movilinga viokuivisa. Osikola Yovilinga via Huku onkhalelo Jeova etulongesa opo tutyivile okuivisa. Elongeso olio tulipewa kese simano momawaneno alamba po 111.000 mouye auho. Otyo tyikuatesako ovakuatate no nomphange mouye novanthu velikalaila, okukala ovanongo vokuivisa onondaka onongwa, nokutyivila okulongesa nombili, monkhalelo ihanumanesa, tyihena owoma.​—Atos 19:8; Col. 4:6.

² Mehinangeleso lio sikola yo 2015 mamuya ononthele mbapolwa momikanda Noñgonoka Etyi Tyikahi Mondaka ya Huku [igw] no mo Estudo Perspicaz das Escrituras, volome 1 [it-1], volome 2 [it-2] e volome 3 [it-3]. Tupu, kualingwa omapiluluko konthele yomuwo monthele Yomulongwa 1, no monthele yavilapo yo Mbimbiliya. Omapiluluko oo no ñgeni ononthele ombo mbulingwa mosikola, mambupopiwa mo nopalagrafu mambulandulako.

³ Ononthele Mbavilapo mo Mbimbiliya: Omukuatate malingi onthele ei una ono minutu onombali opo apopie otyipuka tyike matyikuatesako ewaneno, apola Movikapitulu tuatanga Mombimbiliya mokueenda kuosimana. Okulifuiika nawa matyimukuatesako okupopia etyi tyakolela ahalambesa momuvo. Konyima, ovateheleli avaave omakumbululo mono minutu epandu ngetyi tulingale, wike upopia mono segundu 30 ine mbahavisipo onthele imwe ongwa avasa mokuatanga ovikapitulu Viombimbiliya vio simanu oyo. Tyesukisa okulifuiika nokulikondola omutima opo utyivile okupopia mono segundu 30 ekumbululo ewa, mahi okulinga ngotyo tyitulongesa. Tupu, tyikuatesako vakuetu navo vapopie etyi vavasa momaovololo avo.

⁴ Omulongwa 1: Omuwo omulongwa atanga Ombimbiliya watepuluwa aukala ono minutu 3 ine mbahavasipo iya, omuwo utuuka pala okutanga onthele apewa. Vana vapewa ononthele ombo vena okutangela peulu ovikando ovinyingi nokutala nawa oñgeni vekahi nokutumbula onondaka nokutanga monkhalelo yayandyuluka nokuivala nawa. Ovanthu va Jeova aveho vesukisa okulinga ononkhono mbokutanga nawa, mokonda otyo tyilinga onthele yakolela mefendelo lietu. Tyihambukiswa unene okutala ovana vetu ovanyingi vatanga nawa! Ovohe vapandulwa unene ononkhono valinga pala okukuatesako ovana vavo okutanga nawa.

⁵ Omulongwa 2: Onthele ei mailingwa nomphange mono minutu 5. Osapi apewa oyo alinga. Tyina onthele yamatundu momukanda Noñgonoka Etyi Tyikahi Mondaka ya Huku, ina okulinga monkhalelo yelikuata novilinga vietu viokuivisa netyi tyilingwa potyilongo tyetu. Tyina onthele yamapolwa mo Estudo Perspicaz das Escrituras, omulongwa upondola okulilongesa onondaka mbupopia konthele yovanthu vapopiwa Mombimbiliya, nokuholovona onotestu matange, nokulekesa oityi tupondola okulilongesila kovanthu ovo. Tupu upondola okutanga onotestu mbelikuata nosapi. Omuendesi wosikola uholovona una malingi nae.

⁶ Omulongwa 3: Onthele ei mailingwa nomukuatate ine omphange mono minutu 5. Tyina yamapewa omphange wilinga ngetyi tyilingwa onthele yomulongwa 2. Tyina yamapolwa mo Perspicaz ipewa omukuatate, uilinga ngelongomona. Omulongwa una okuovolola etyi tyelikuata nosapi, nokuholovona onotestu matange, nokulekesa etyi tulilongesila komunthu wapopiwa Mombimbiliya.

⁷ Onthele Omphe Yomulongwa 3 pala Ovakuatate: Tyina onthele yamapolwa momukanda Noñgonoka Etyi Tyikahi Mondaka ya Huku, omukuatate una okulinga elekeso lielilongeso liombunga ine liovilinga viokuivisa. Omuendesi wosikola una okuholovona una mavalingi nae no ñgeni mavalingi (cena). Una mavalingi nae o umwe mombunga ine omukuatate omukuavo mewaneno. Tupu onotestu mbelikuata nosapi mbupondola okukutikinyua melekeso. Pamwe-pamwe, maipewa omukulu wewaneno. Omukulu wewaneno upondola okuholovona vana malingi navo no ñgeni malingi. Tyotyili, otyo matyipameka unene ewaneno okutala ovakulu vewaneno valekesa ounongo wokulongesa kumwe nombunga yavo ine nomukuatate omukuavo.

⁸ Onondonga: Omuendesi wosikola mono minutu onombali konyima ya kese nthele yomulongwa upandula nokupopia onondonga mbapolwa momukanda Beneficie-se da Escola do Ministério Teocrático. Tyina omuendesi aihana omulongwa kapopi onthele ekahi nokuundapesa. Konyima ya kese nthele, omuendesi wosikola upandula omulongwa, apopi onthele ekahi nokuundapesa, mapopi haunene oityi omulongwa alinga nawa monthele oyo, ine nounkhengela apopi onthele omulongwa esukisa okutala vali nawa.

⁹ Ononthele omulongwa omu maendela mbuvasiwa pomafo 79 alo 81 momukanda wae Escola do Ministério. Tyina omulongwa amalingi onthele yae omuendesi wosikola uhoneka momukanda womulongwa evi esukisa okuviukisa nokumupulila pokamphengi inkha walinga etyi tyaitwa monthele yae. Okupandula nokumupakaila-mo upondola okutyilinga tyina eliongiyo liamapu ine monthiki onkhuavo. Onondonga kese mulongwa apewa mosikola mbutalwa ngatyina onomphitilo mbukuatesako omulongwa okukula motyili.​—1 Tim. 4:15.

¹⁰ Inkha omulongwa walamba momuvo, omuendesi wosikola ine omuviyuli omukuavo umulondola, okuyuelesa tyimwe, tyihamoneka kovanthu tyilekesa okuti omuwo womulongwa wapuapo. Omulongwa una okunoñgonoka okuti otyo tyilekesa okuti omuwo wapuapo atunduko.​—Tala omukanda Escola do Ministério, p. 282, § 4.

¹¹ Aveho vaendela movitumino vapewa ondundo opo velihonekese Mosikola Yovilinga via Huku. (Tala omukanda Escola do Ministério, p. 282, § 6.) Ondongeso tupewa mosikola oyo ikuatesako ovanthu va Jeova okuivisa nokulongesa onondaka onongwa Mbouhamba nonthumbi, nokuaviuka, noluembia. Tyotyili Jeova uhambukwa na aveho vapola ouwa omunene mosikola oyo!​—Sal. 148:12, 13; Isa. 50:4.