Kuatesako Ovanthu Okusokolola
1. Onkhalelo patyi yokupopia yaviuka movilinga viokuivisa?
1 Onkhalelo patyi yokupopia yaviuka vali movilinga viokuivisa, okupopia nomunthu tyihena ehumbilo ine okumukuatesako okusokolola nawa opo aimbuke etyi tyaviuka? Tyina apostolu Paulu ankho apopia no va Judeu ko Tesalonika, ankho uvekuatesako okusokolola, “moluotyo, vamwe avakala ovataveli.” (Atos 17:2-4) Okukuatesako vakuetu okusokolola nawa tyakutikinya tyi?
2. Oñgeni matuhetekela Paulu tyina tuivisa onondaka onongwa?
2 Soka Komalusoke Nenoñgonoko Ovanthu Vena: Opo ukuateseko ovanthu motelitoliu yove okusokolola nawa, una okusoka komalusoke avo. Elongomona Paulu alingilile ova Gregu vahaumbila Huku po Areopagu, wahimbikile, nokupopia ovipuka ankho veiale nokutavela. (Atos 17:22-31) Moluotyo, tyina upongiya etyi mokapopia soka nawa etyi ovanthu potelitoliu yove vetavela netyi vasoka. (1 Cor. 9:19-22) Inkha omunthu wavasa ukukumbulula tyokuanya, soka kuetyi ovanthu potelitoliu vetavela iya oko uhimbikila etompho liove.
3. Oñgeni matukuatesako vakuetu okusokolola nawa mokuundapesa omapulo nounongo?
3 Linga Omapulo Nounongo: Onthue katupondola okulekesa ongendi ondyila imukuatesako okuhika oku ahanda okuenda, inkha apa ekahi katupei. Tupu, onthue katupondola okukuatesako omunthu okuimbuka etyi tyaviuka, inkha olusoke lwe katulwi. Pala okukuatesako omunthu okusokolola nawa, Jesus ankho utetekela okulinga omapulo opo anoñgonoke etyi asoka. Mongeleka, etyi umwe apula Jesus okuti: “Oityi ndyina okulinga opo ndipiñgane omuenyo uhapu?” Jesus wahandele okunoñgonoka tete oityi omulume oo asoka tyina nkhele ehenekumbulule. (Luc. 10:25-28) Otyikando otyikuavo, etyi Petulu ava ekumbululo lihaviukile, Jesus nounongo walinga omapulo opo apilulule olusoke lwae. (Mat. 17:24-26) Ngotyo, inkha omunthu alinga epulo ine apopia monkhalelo yapenga etyi asoka, tupondola okulinga omapulo opo tumukuateseko okusokolola nawa.
4. Oityi tuesukisila okukuatesako ovanthu tuvasa okusokolola nawa?
4 Tyina tukuatesako omunthu okusokolola nawa, tuhetekela Jesus Omulongesi Omunene, novaivisi ovakuavo ovanongo vokohale. Tupu, tupanda ou tukahi nokupopia nae nokumuhumba. (1 Ped. 3:15) Moluotyo, oe upondola okutavela okutaleluapo otyikando otyikuavo.